11
Abbaz ǝn tamasna n akal wa n Kanan
1 As isla Yabim wa n ǝmǝnokal n aɣrǝm wa n Xassor terazay ta iga Joswe imǝnokalan win, issǝgla inammazalan ǝs Yobab wa n ǝmǝnokal n aɣrǝm wa n Madon issǝgl-en deɣ s ǝmǝnokal n ǝɣrǝm wa n Šimron ǝd wa n aɣrǝm n Akešaf. 2 Izammazal deɣ ǝs mǝnokalan win ǝxsarnen daɣ tamasna n akal, daɣ ǝdɣaɣan, ǝd win ǝxsarnen daɣ aɣlal n agarew wa n Yordan, daɣ agala n agaraw wa n Gennezaret, ǝd win ǝxsarnen akal wa irasan, ǝd win ǝxsarnen sa sǝr ataram daɣ afay n agaraw wa zǝwwǝran, dǝgma ǝn Dor.
3 Izammazal harwa s aytedan win Kanan ǝxsarnen sa sǝr dǝnnǝg, ǝd win ǝxsarnen sa sǝr ataram n agarew wa n Yordan, a tan-ǝmosnen: Amoritatan, ǝd Xitatan, ǝd Ferizitatan, ǝd Yebusatan, axsarnen akal n ǝdɣaɣan, ǝd Xiwitatan, axsarnen daɣ abada n ǝdɣaɣ wa n Hermon daɣ akal ǝn Misfa. 4 Ǝbazan mǝnokalan ketnasan tarrayt, ǝddewan ǝd nammagaran-nasan ǝganen igǝt wǝr ǝgenat tǝblalen n amadal. Ǝlan ǝggǝsan d amalankaytan ǝn tǝzoli sinahalnen igǝt ǝqqânnen daɣ ǝggǝsan. 5 Ǝgan mǝnokalan win eɣaf, ǝzzǝbben ketnasan dǝgman ǝn tǝmǝksen šin ahanen Merom, fǝl ad ǝbǝgan maddanǝs n Israyil.
6 Inna Amaɣlol i Joswe: «A kay wǝr tǝggǝz tasa-nasan, fǝlas nak iman-in a tan-z-agin gǝr fassan-nawan. As du-z-iɣlǝy alwaq wa tufat tǝrzam-tan. Ǝɣtǝs agozan n ǝggǝsan-nasan, tǝsǝbbǝlǝglǝgam amalakaytan-nasan win ǝmǝgǝr.»
7 Igla Joswe ǝd nammagaran-net ketnasan y ad ǝɣdǝran izǝnga-nasan ammǝgaran dǝr-san dagma ǝn tǝmǝksen šin Merom. 8 Iga Amaɣlol šimattiwen šin kul gǝr fassan ǝn maddanǝs n Israyil, a tan-naqqin. Ǝstaɣan-tan sa sǝr tamasna har aɣrǝm wa zǝwwǝran ǝn Sidon, ǝglan ǝstaɣan-tan har Misrefat Mayim. Wǝr ǝmmǝzzayan-du a tan-ǝstâɣan har dǝr-san ewadan dǝnnǝg n ǝɣlal wa n Misfa. Ǝgan-asan terazay tǝkmalat. Wǝr daɣ-san oyyen awedan idaran. 9 Ig-asan Joswe awa as t-omar Amaɣlol a t-imosan as ifras agozan n ǝggǝsan-nasan, isabbalaglag amalankaytan-nasan win ǝmǝgǝr.
10 Dǝffǝr adi, ikka Joswe aɣrǝm wa n Xassor obaz-tu, inɣa ǝmǝnokal-net. Daɣ azzaman win den Xassor a imosan aɣrǝm wa azzaran i taɣmaren n akal en šin tamasna. 11 Ihlak Joswe tamattay ǝn Xassor ketnet. Wǝr oyya i iddaran, tǝzzar isabbalaglag aɣrǝm.
12 Irza Joswe imǝnokalan win fall-as ǝganen eɣaf ketnasan. Obaz iɣǝrman-nasan. Ihlak-kan ǝntanay ǝd tǝmattiwen-nasan s ǝmmǝk was t-omar akli ǝn Mǝššina Musa. 13 Eges maddanǝs n Israyil wǝr ǝgeran temsay daɣ ɣǝrman win ǝwarnen afalla ǝn tǝkašwaren. Aɣrǝm wa n Xassor ɣas a ǝntasan. 14 Ǝhlakan šimattiwen ǝn ɣǝrman win den. Wǝr oyyen awedan iddaran. Aratan amaran win ǝlanen almaqam ǝdkalan-tan, oɣan deɣ ihǝrwan. 15 Aratan win ǝganen da ketnasan, Amaɣlol a sǝr-san omaran Musa. Musa amaran omar sǝr-san Joswe. Immozal-tan Joswe s ǝmmǝk wa daɣ as sǝr-san omar Amaɣlol Musa.
Aɣrud ǝn Joswe abbaz n akal
16 Obaz Joswe amadal ketnet a t-imosan: akal ǝn Yahuda wa n ǝdɣaɣan, d akal ketnet wa n Negab, d akal kul wa n Gošen, d akal wa irasan, d aɣalal wa n agarew wa n Yordan d akal wa n ǝdɣaɣan ǝd tǝzawaɣen šin tamasna. 17 Irza imǝnokalan obaz ikallan-nasan ǝntânen ɣur ǝdɣaɣ wa n Xalaq, dagma ǝn Seyir sa sǝr agala, har Bal-Gad daɣ ǝɣlal wa n Labnan, daɣ abada n ǝdɣaɣ wa n Xermon sa sǝr tamasna. Iɣrad tenaɣay ǝn mǝnokalan win. 18 Ǝmǝgǝr wa gǝr Joswe ǝd mǝnokalan win den, ihôg wǝllen. 19 Xiwitatan ɣas win ǝxsarnen Gabawun, a ǝganen alxer ǝd maddanǝs n Israyil. Iɣǝrman win hadatnen kul tawarzan daɣ ǝmǝgǝr. 20 Fǝlas Amaɣlol a isaggarmaman iwallan ǝn tǝmattiwen-nasan da fǝl ad ammagaran ǝd maddanǝs n Israyil. Awen daɣ a fǝl dasan-wǝr-hanatten maddanǝs n Israyil, kala ǝnɣan-tan, ǝɣradan-tan ahluk s ǝmmǝk iman-net was omar Amaɣlol Musa.
21 Azzaman en daɣ ad igla Joswe y ad ammagar ǝd tawšet ta n Anakitatan tǝxsarat idɣaɣan win Xebron, ǝd Debir, d Anab, ǝd kallan ketnasan n ǝdɣaɣan win Yahuda d akal n ǝdɣaɣan wa n tamasna. Ihlak šimattiwen-nasan, iddǝgdag šiɣarmaten-nasan. 22 Ab-as d-iqqim awedan iddaran daɣ tawšet ta n Anakitatan daɣ akal wa ǝhan maddanǝs n Israyil ar daɣ Gaza, ǝd Gat d Ašdod.
23 Ibaz Joswe akal ketnet, s ǝmmǝk was omar Amaɣlol Musa. Dǝffǝr adi ikf-ay i maddanǝs n Israyil. Ǝzunan-tu gǝr tawšeten ketnasnat. Amaran tǝssǝnfa tamattay dǝffǝr ǝmǝgǝr.