12
Imǝnokalan win tawarzanen daɣ azzaman ǝn Musa
1 Ǝntanay da imǝnokalan win ǝššin ǝnɣan maddanǝs n Israyil daɣ azzaman ǝn Musa daɣ dǝnnǝg n agarew wa n Yordan. Obazan ikallan-nasan ǝntânen ɣur tǝsǝssǝgǝyt ta n Arnon, har ǝdɣaɣ wa n Xermon. Almaɣna n awen azawaɣ wa iddǝnnagan y agarew wa n Yordan.
2 Iyyan daɣ-san esǝm-net Sihon imosan ǝmǝnokal n Amoritatan ixsaran aɣrǝm wa n Xešbon. Ǝnta as kala ad ixkam fǝl aganna n aɣlal wa n Arnon, a d-ibazan ɣur ǝɣrǝm wa n Arawer d aganna n amadal wa n Galad har tǝsǝssǝngǝyt ta n Yaboq, tǝmosat iyyaka, gar-es d akal wa n Amonitatan. 3 Ixkam deɣ fǝl aganna wa iddǝnnagan y ǝɣlal n agarew wa n Yordan ǝd tamasna n agaraw wa n Gennezaret. Igla akal-net har agaraw wa n ǝsalaɣ dǝgman Bet Yešimot ǝd sas agala n akal wa ihan azagada n ǝdɣaɣ wa n Fisga.
4 Ǝmǝnokal wa hadan esǝm-net Og, imosan iyyan daɣ tawšet ta n Rafayitatan s ǝnta ɣas d arat n aytedan-net a d-ǝqqimnen ǝddâran. Ixkam fǝl Bašan, amaran aɣrǝm wa n Aštǝrot ǝd wa n Edreyi a daɣ iɣassar. 5 Ixkam deɣ fǝl ǝdɣaɣ wa n Xermon, ǝd Salka d akal wa n Bašan ketnet har iyyaka wa n Gešuritatan ǝd wa n Makatitan. Ixkam ǝntada fǝl aganna wa hadan n amadal wa n Galad har iyyaka n akal wa n Sihon imosan ǝmǝnokal ǝn Xešbon.
6 Irza Musa ǝd maddanǝs n Israyil imǝnokalan win ǝššin a. Tǝzzar iga ikallan-nasan daɣ tǝla ǝn maddanǝs n Israyil win tawšet ta n Ruben ǝd ta n Gad d aganna ǝn tawšet ta n Manasay.
Imǝnokalan win tawarzanen daɣ azzaman ǝn Joswe.
7 Ǝntanay da imǝnokalan win irza Joswe ǝd maddanǝs n Israyil daɣ ataram n agarew wa n Yordan. Imǝnokalan win den ikallan-nasan ǝbazan-du ɣur Bal-Gad daɣ aɣlal wa n Labnan sa sǝr tamasna, har ǝdɣaɣ wa n Xalaq illan dǝgman ǝn Sir sa sǝr agala. Ikfa Joswe ikallan win den i maddanǝs n Israyil, izun-tan gǝr tawšeten-nasan. 8 Ikallan win ǝmosan: akal wa ihan idɣaɣan, ǝd kallan win ǝhanen eres n ǝdɣaɣan, d ǝɣlal wa n Yordan, ǝd win ǝgdamnen y agarew, ǝd taneray, d amadal wa n Negab. Ǝntanay a daɣ ǝxsaran Xitatan, d Amoritatan, ǝd Kananitatan, ǝd Ferizitatan, ǝd Xiwitatan ǝd Yebusatan. 9 Ǝntanay da imǝnokalan win tawarzanen: ǝmǝnokal wa n Yerikaw ǝd wa n Ay ihan dagma ǝn Betel, 10 ǝd wa n Yerusalam ǝd wa n Xebron, 11 ǝd wa n Yarmut ǝd wa n Lakiš, 12 ǝd wa n Eglon ǝd wa n Gezer, 13 ǝd wa n Debir ǝd wa n Geder, 14 ǝd wa n Xorma ǝd wa n Arad, 15 ǝd wa n Libna ǝd wa n Adulam, 16 ǝd wa n Makeda ǝd wa n Betel, 17 ǝd wa n Tafuwax ǝd wa n Xefer, 18 ǝd wa n Afek ǝd wa n Lasaron, 19 ǝd wa n Madon ǝd wa n Xassor, 20 ǝd wa n Šimron-Meron ǝd wa n Akešaf, 21 ǝd wa n Tanak ǝd wa n Megidaw, 22 ǝd wa n Kedeš ǝd wa n Yoqnayam wa n akal ǝn Karmel, 23 ǝd wa n afay ǝn Dor ǝd wa n Goyim ihan Gilgal, 24 ǝd wa n Tirsa. Iqqal awen ketnet karadat tǝmǝrwen n ǝmǝnokal d iyyan.