13
Ǝtǝwizan n akal wa n Kanan
Ikallan win d-ǝqqimnen wǝr tawarzan
1 Iqqal Joswe aɣmar waššaran. Inn-as Amaɣlol: «Ǝmǝrǝdda kay da iqqalan da aɣmar waššaran ǝnta harwada akal iqqim-in daɣ-as a aggen wǝr nǝttǝrmas. 2 Ǝntanay da ikallan win wǝr nǝttǝrmas: amadal ketnet wa n Filistinatan ǝd wa n Gešuritatan; 3 almaɣna ikallan win Kanan, a d-ibazan ɣur tǝsǝssǝngǝyt ta n Sihor tahat iyyaka wa n Masar har amadal wa n Ekron sa sǝr tamasna. Ǝntanay a daɣ ǝɣsaran mǝnokalan ǝn taɣmaren šin sǝmmosat ǝn Filistinatan. Ǝxkaman fǝl akal wa n Gaza, ǝd wa n Ašdod, ǝd wa n Aškelon, ǝd wa n Gat, ǝd wa n Ekron. Fǝl aganna wa n agala deɣ ill-ay akal wa n Abitatan as harwada wǝr ittǝrmas. 4 Ilkâm abbaz n awa din-iqqiman kul daɣ tamasna n akal wa n Kanan, d akal wa n Mera s ǝnta a imosan akal ǝn Sidonitatan, har Afek, ihân iyyaka wa n Amoritatan, 5 d akal wa n Gibelitatan ǝd wa n Labnan ketnet sa sǝr dǝnnǝg, a d-ibazan ɣur Bal-Gad daɣ abada n ǝdɣaɣ wa n Xermon har iguz n akal wa n Xamat.» 6 Igla Amaɣlol iššewal inna: «Tamattay ketnet ta tǝxsarat adɣaɣ, a d-ibazan ɣur akal wa n Labnan har Misrefat Mayim ǝmosnen ketnasan Sidonitatan, nak iman-in Amaɣlol a daɣ-san z'abǝzan akal-nasan kul akfaq-qu i Kǝl-Israyil. Kay amaran tuzanaɣ-asan-tu ǝs tǝšaɣeren s ǝmmǝk was kay-omara. 7 Daɣ adi uzan akal wǝdi takfaq-qu i tawšeten šin tazayat d aganna tawšet ta n Manasay.»
Tǝzunt ta tǝgat daɣ dǝnnǝg n agarew wa n Yordan
8 Tawšet ta n Ruben ǝd ta n Gad d aganna ǝn tawšet ta n Manasay, a ǝgrawnen tǝzunt daɣ mǝdlan win dǝnnǝg ǝn Yordan, was Musa akli ǝn Mǝššina a dasnat-t-ikfan. 9 Imǝdlan-nasnat obazan-du sa sǝr agala ɣur ǝɣrǝm wa n Arawer iwaran efay ǝn tǝsǝssǝngǝyt ta n Arnon d ǝɣrǝm wa ihan ammas n ǝɣlal wen da, d afalla ketnet wa n Medeba har Dibon. 10 Ǝgrawan deɣ ɣǝrman kul win Sihon wa n ǝmǝnokal n Amoritatan, ixkaman fǝl Xešbon tǝwarat efay, har iyyaka n akal wa n Amonitatan. 11 Ǝgrawan ǝntada amadal wa n Galad, d amadal wa n Gešuritatan, ǝd wa n Makatitan, d ǝdɣaɣ ketnet wa n Xermon, d amadal ketnet wa n Bašan har wa n Salka, 12 ǝd taɣmar ketnet ta n Og, s ǝnta ɣas-net a d-iqqiman daɣ Rafayitatan, ixkam fǝl Aštǝrot d Edreyi daɣ amadal wa n Bašan. Ikallan win daɣ da a irza Musa ǝd maddanǝs n Israyil obazan daɣ tǝmattiwen-nasan awa ǝlanat. 13 Dǝr ig'awen da ya, wǝr ǝsteɣan Gešuritatan ǝd Makatitan, awen daɣ a fǝlas har azalada nimaɣsaran dǝr-san.
14 Tawšet ta n Lebi ɣas a wǝr nǝgrew tadagart daɣ amadal wa izun Musa da, fǝlas tadagart-nasan tǝggaz šikutawen šin tawaskatnen y Amaɣlol, Ǝmǝli n Israyil, s ǝmmǝk was dasan-t-inna Amaɣlol.
Amadal wa n tawšet ta n Ruben
15 Ǝntada amadal wa izun Musa i tawšet ta n Ruben, aɣaywan s aɣaywan: 16 Obaz-du daɣ agala n ǝɣrǝm wa n Arawer ihan efay ǝn tǝsǝssǝngǝyt ta n Arnon, d ǝɣrǝm wa ihan ammas n ǝɣlal wen daɣ n Arnon d afalla wa iɣalayɣalayan Medeba. 17 Obaz-du deɣ ɣur ǝɣrǝm wa n Xešbon, ǝd ɣǝrman kul win ǝwarnen afalla a tan-ǝmosnen: wa n Dibon ǝd wa n Bamot-Bal, ǝd wa n Betbal-Mewon, 18 ǝd wa n Yahatǝs, ǝd wa n Kedemot, ǝd wa n Mefat 19 ǝd wa n Kirǝyatayim, ǝd wa n Sibǝma, ǝd wa n Seret-Šahar ta tǝwarat tǝkašwart ta tǝmmodaɣat y ǝɣlal, 20 ǝd wa n Bet-Feyyor, d azagada n ǝdɣaɣ wa n Fisga ǝd Bet-Yešimot 21 Tǝgraw deɣ tawšet ta n Ruben iɣǝrman win ǝwarnen afalla, ǝd taɣmar ketnet ta n Sihon ǝmǝnokal n Amoritatan ixkaman fǝl Xešbon. Inɣa Musa Sihon ǝd muzaran ǝn Midǝyan a tan-ǝmosnen: Ebi ǝd Rekem ǝd Sur ǝd Xur ǝd Reba. Imuzaran win ketnasan Sihon a a fall-asan ixkaman, ǝxsâran deɣ amadal-net. 22 Aytedan win ǝnɣan maddanǝs n Israyil, ih-en amassaxar igân esǝm Balɣam, ag Behor. 23 Iqqal agarew wa n Yordan iyyaka wa n ataram n amadal wa n Ruben. Ǝntanay den daɣ iɣǝrman ǝd tǝɣarmaten win ǝqqalnen tadagart ǝn tawšet ta n Ruben.
Amadal wa n tawšet ta n Gad
24 Ikfa Musa tawšet ta n Gad tadagart aɣaywan s aɣaywan. 25 Amadal-nasan iga daɣ ǝɣrǝm wa n Yazer ǝd ɣǝrman ketnasan win Galad d aganna n akal wa n Amonitatan har aɣrǝm wa n Arawer dagma ǝn wa n Raba. 26 Obaz-du ɣur Xešbon har Ramat-Misfe ǝd Betonim, illil-du deɣ Mahanayim har iyyaka n akal wa n Lidebir. 27 Amadal-nasan iga daɣ ɣǝrman win ǝllilnen tama n agarew wa n Yordan, a tan-imosan: Betaram ǝd Betnimra ǝd Sukkot ǝd Safon. Iɣǝrman win da a d-ǝqqimnen wǝr ǝzunan daɣ taɣmar ta n Sihon ǝmǝnokal ǝn Xešbon. Akal wen iddǝnnag y agarew wa n Yordan s ǝnta a imosan iyyaka har agaraw wa n Gennezaret sas tamasna. 28 Iɣǝrman win nǝmal da ǝd tǝɣarmaten šin fǝl ǝxkaman ketnasan as ǝqqalan tadagart ǝn tawšet ta n Gad s aɣaywan aɣaywan.
Amadal wa n tawšet ta n Manasay
29 Ǝntada amadal wa ikfa Musa y aganna ǝn tawšet ta n Manasay aɣaywan s aɣaywan: 30 Iyyaka-net wa n agala ihoz tǝɣrǝmt ta n Mahanayim, iga daɣ taɣmar ǝn Bašan ketnet as kala ad imos Og ǝmǝnokal-net. Iga deɣ daɣ tǝɣarmaten kul šin Yahir ǝmosnen sǝdisat tǝmǝrwen s ǝntanatay da ǝhanat akal en da. 31 Iga deɣ daɣ aganna n amadal wa n Galad, ǝd ɣǝrman win Aštǝrot, ǝd win Edreyi ahanen taɣmar ta n Og daɣ amadal ǝn Bašan. Amadal en izun gǝr ɣawnatan n aganna n ǝɣrǝf wa n hayawan ǝn Makir ag Manasay. 32 Ǝntanatay den daɣ šidǝgren šin ikfa Musa daɣ dǝnnǝg ǝn Yerikaw d agarew wa n Yordan, assaɣa wad iha šizawaɣen šin Mowab.
33 Mišan Kǝl-Lebi ǝntanay wǝr tan-ikfa Musa tǝdagart daɣ ǝtǝwizan n akal. Ǝqqalan tamattay wǝr nǝgmed ar s ǝššǝɣǝl y Amaɣlol. Awen daɣ as inna Amaɣlol imos tǝdagart-nasan.