Ǝlkǝttab wa n Joswe 14

Tǝzunt n akal wa n Kanan daɣ ataram n agarew wa n Yordan

¹ Ǝnta ǝddi tǝdagart ta ǝgrawan maddanǝs n Israyil daɣ akal wa n Kanan. Ǝlimam wa igan Elɣazar, ǝd Joswe ǝd muzaran ǝn ɣawnatan a ǝzunnen amadal wa gǝr tawšeten ǝn maddanǝs n Israyil. ² Tawagganat tǝšaɣeren fǝl kallan i tawšeten šin tazayat d aganna, s ǝmmǝk was omar Amaɣlol ǝs tarrayt ǝn Musa. ³ Dat adi ikfa Musa tawšeten šin sanatat d aganna ikallan win ǝdǝnnagnen y agarew wa n Yordan ǝqqalan tǝdagart-nasan. Mišan wǝr ikfa tadagart waliyyat y ǝzzurrǝyya wa n Lebi. ⁴ Wǝr ǝgrewan amadal waliyyan, eges ikf-en iɣǝrman i tǝmǝɣsurt ǝd ɣǝlǝyɣǝlayan-nasan i mǝssǝdan. Amaran ǝzzurrǝyya ǝn Yusǝf iga daɣ sanatat tawšeten ǝmosnen: ta n Manasay ǝd ta n Efrayim. ⁵ Tǝmǝwit ten daɣ as ǝzunan maddanǝs n Israyil akal s ǝmmǝk was omar Amaɣlol Musa.

Agaraw ǝn Kaleb akal wa n Xebron

⁶ Ǝzǝl iyyan osan-du aytedan ǝn tawšet ta n Yahuda Joswe daɣ Gilgal. Inn-as Kaleb ag Yefunne wa n aɣaywan ǝn Kenaz: «Tǝkittǝwa awa inna Amaɣlol i Musa imosan ǝmiksad ǝn Mǝššina daɣ batu-nana nak dǝr-ǝk daɣ akal ǝn Kadeš-Barneya. ⁷ Ǝmosaɣ alǝs n ag ǝkkozat tǝmǝrwen n awatay as di-izzamazal Musa, akli ǝn Mǝššina daɣ akal wa n Kadeš-Barneya y a d-ǝnǝyaɣ akal wa nǝha da ǝbazaɣ-du isalan-net. As d-ǝqqalaɣ ǝgeɣ isalan kul n awa ǝnaya. ⁸ Meddan win dǝr ǝddewaɣ ǝgân tasa daɣ tamattay-nana, nak amaran ǝlkama y Amaɣlol Ǝmǝli-nin s ǝwǝl iyyanda. ⁹ Ǝzǝl wen daɣ a di-ihad Musa as ad ǝgrǝwaɣ tadagart daɣ akal wa daɣ ǝdyazan daran-in ileq-qu nak d ǝzzurrǝyya-nin har faw, fǝl ǝddǝlil ǝn lǝkkum-in y Amaɣlol Ǝmǝli-nin s ǝwǝl iyyanda. ¹⁰ Ila adi ǝmǝrǝdda ǝkkozat tǝmǝrwen n awatay ǝd sǝmmos as iga Amaɣlol ammaran win i Musa daɣ azaman win daɣ ǝllilan maddanǝs n Israyil teneray. A iga adi issân daɣ-i Amaɣlol s ǝmmǝk was t-inna i Musa, har as nak da azalada ilan da ǝttamat tǝmǝrwen n awatay ǝd sǝmmos. ¹¹ Mišan harwada ǝgeɣ assahat tanad da ǝgeɣ da as di-izammazal Musa y ad aglaɣ ǝnǝya-du akal ǝbaza-du isalan-net. Šiɣurad-in wǝr ǝmmǝttaynat harwada, gǝr za y ǝmǝgǝr wala deɣ ǝššǝɣalan wiyyad. ¹² Ǝmǝrǝdda, akf-i akal n ǝdɣaɣan was inna Amaɣlol di-t-akfu danad. Kay da tǝsle daɣ adan di as Anakitatan ǝxsaran daɣ ɣǝrman win zawwarnen tawagaznen ǝs fǝrgan zagrotnen ǝn tǝhun. Kud za Amaɣlol ill-ay dǝr-i, a tan-ǝstǝɣa s ǝmmǝk was t-inna Amaɣlol.» ¹³ Ikfa Joswe Kaleb Ag Yefunne aɣrǝm wa n Xebron iqqal tǝdagart-net, ittar-as deɣ Joswe a das-igan albaraka.

¹⁴ Aɣrǝm wa har azalada, il-ay ǝzzurrǝyya ǝn Kaleb ag Yefunne wa n aɣaywan ǝn Kenaz fǝlas lǝkkum a iga Kaleb y Amaɣlol Ǝmǝli n Israyil s ǝwǝl iyyanda. ¹⁵ Amaran aɣrǝm wa n Xebron da, ǝnta as dat awa esǝm-net Kirǝyat-Arba, almaɣna aɣrǝm wa n Arba. Arba alǝs a imos ogaran Anakitatan kul tebadday. As iɣrad awen ketnet tǝsǝnfa tamattay dǝffǝr ǝmǝgǝr.