15
Akal wa itawakfan i Yahuda
1 Ǝntanay da ikallan win tawakfanen ǝs tǝšaɣeren i tawšet ta n Yahuda aɣaywan s aɣaywan: ibaz-du iyyaka-nasan daɣ agala daɣ dǝnnǝg har iyyaka wa n Edom. Tǝmos teneray ta n Zin aganna-net wa orayan sa sǝr agala.
2 Iyyaka wa n agala ibaz-du ɣur mǝdlan win namawalnen ǝd teneray daɣ agala n Agarew wa n Ǝsalǝɣ. 3 Illil agala ǝn tǝzǝggǝzzǝyt ta s itawannu ta n Akrabim, ǝd teneray ta n Zin. Sas agala n aɣrǝm wa n Kadeš-Barneya, ikka aɣrǝm wa n Xesseron iggǝzzay s Addar, innǝmad ǝɣrǝm wa n Karka. 4 Tǝzzar okay s ǝɣrǝm wa n Asmon, illil tǝsǝssǝngǝyt ta n Masar har ewad Agarew wa Zǝwwǝran. Den daɣ a d-iqqal iyyaka wa n agala n akal wa n Yahuda.
5 Iyyaka wa n dǝnnǝg ibaz ɣur Agarew wa n Ǝsalǝɣ har edag wa daq-q iggaz agarew wa n Yordan.
Ibaz-du iyyaka wa n tamasna daɣ adag wen da. 6 Tǝzzar iggǝzzay ǝs Bet-Xogla, illil tamasna ǝn Bet-Araba iggǝzzay ǝs tǝhunt tas itawannu ta n Bohan wa n iyyan daɣ maddanǝs ǝn Ruben. 7 Igmad iyyaka wa n tamasna en aɣlal wa n Akor, iggǝzzay ǝs Debir. Innǝmad tamasna sa sǝr Gilgal inamawal ǝd tǝzǝggǝzzǝyt ta n Adumim tahat agala ǝn tǝsǝssǝngǝyt. Tǝzzar ikka-du dagma ǝn tǝmǝksen šin En-Šemeš iggaz En-Rogel. 8 Dǝffǝr ǝddi innǝmad aɣlal wa n Hinnom iggǝzzay illil agala ǝn tǝkašwart ta n Yebusatan dad tǝlla Yerusalam. Tǝzzar ikka iyyaka afalla n ǝdɣaɣ wa ihan ataram n aɣlal wa n Hinnom, ǝd da d-iraz aɣlal wa n Rafayitatan daɣ tamasna. 9 Edag wen daɣ a daɣ innad sa sǝr tǝmǝksen šin Naftawax, ikka iɣǝrman win ahanen dagma n ǝdɣaɣ wa n Efron. Tǝzzar innad ǝs Balla, as itawannu ǝntada Kirǝyat-Yarim. 10 Innad iyyaka-net daɣ ataram sa sǝr ǝdɣaɣ wa n Seyir, illil tasaga ta n tamasna n ǝdɣaɣ wa n gorasan as itawannu adɣaɣ wa n Kessalon. Ilas izagaday s ǝɣrǝm wa n Bet-Šemeš okay ǝs wa n Timna. 11 Igla iga anamod ǝn tǝzagadayt ta n tamasna n ǝɣrǝm wa n Ekron, innad sa sǝr ǝɣrǝm wa n Šikaron illil adɣaɣ wa n Balla, ikka sas ǝɣrǝm wa n Yabne har d-iraz ɣur agaraw wa zǝwwǝran.
12 Iqqal agaraw wa zǝwwǝran iyyaka-net wa n ataram. Ǝnta den da tǝmǝwit tas ǝgan iyyakatan ǝn kallan win tawakfanen tawšet ta n Yahuda s aɣaywan aɣaywan.
Terazay n aɣrǝm wa n Xebron ǝd wa n Debir
13 Igraw Kaleb ag Yefunne tadagart daɣ amadal wa n Yahuda s ǝmmǝk was omar Amaɣlol Joswe. Itawakfa aɣrǝm wa n Kirǝyat-Arba, almaɣna n awen aɣrǝm n Arba imosan aljad n Anakitatan. Aɣrǝm wǝdi esǝm-net azalada Xebron. 14 Istaɣ Kaleb karad ɣawnatan n Anakitatan a tan-ǝmosnen: wa n Šešayi, ǝd wa n Aximan, ǝd wa n Talmayi. 15 Ifal aɣrǝm wa n Xebron iggǝzzay ibag šimattiwen šin n ǝɣrǝm wa n Debir. Aɣrǝm wa n Debir dat awen, esǝm-net Kirǝyat-Sefer. 16 Iga Kaleb tǝsusǝnt a daɣ inna: «Alǝs wa obazan aɣrǝm wa n Kirǝyat-Sefer ad t-akfaɣ Axsa ta n Ell-ay.» 17 Tǝzzar igla Otanǝyel ag Kenaz, imosan ara ǝn medan n Axsa, obaz aɣrǝm wǝdi. Tǝzzar ikf-ay Kaleb eles.
18 As din-tewad Axsa Otanǝyel tǝnn-as: «Ansǝy abba-nin amadal.» Tǝhin-in tǝtiraggat ajad-net, inn-as abba-net Kaleb: «Ma kam-igrawan?» 19 Tǝnn-as: «A areɣ a di-takfaɣ ikallan ahan aman fǝlas ikallan win di-tǝkfeɣ sas agala ǝqquran.» Ikf-et Kaleb šimǝksen ǝs šiyyad ǝhânat idɣaɣan, šiyyad deɣ ǝhânat abada-nasan.
Iɣǝrman win ǝmosnen tǝla ǝn tawšet ta n Yahuda
20 Ǝntada tǝdagart ta tǝgraw tawšet ta n Yahuda aɣaywan s aɣaywan: 21 Iɣǝrman-nasan win ahanen aganna wa n agala n amadal wa n Yahuda dagma n iyyaka wa orayan s Edom a tan-ǝmosnen: Kabsǝyel, Edir, Yagur, 22 Kina, Dimona, Adeyada, 23 Kedeš, Xassor, Itnan, 24 Zif, Telem, Beyalot, 25 Xassor-Xadatta, Keryot-Xesseron as itawannu deɣ Xassor, 26 Amam, Šema, Molada, 27 Xassar-Gadda, Xešmon, Bet-Felet, 28 Xassor-Šǝwal, Ber-Šeba ǝd Bitsǝyotǝya 29 Balla, Ǝyyim, Essem, 30 Eltolad, Kessil, Xorma, 31 Siklag, Madmanna, Sanesǝnna, 32 Lebawot, Šǝlexim, En ǝd Rimmon, iqqal awen sanatat tǝmǝrwen n ǝɣrǝm ǝd taza ǝd tǝɣarmaten šin fǝl ǝxkaman
33 Iɣǝrman win ahanen akal wa irasan daw ǝdɣaɣan a tan-ǝmosnen : Eštawol, Sora, Ašena, 34 Zanowax, En-Gannim, Tafuwax, Enam, 35 Yarmut, Adulam, Sokaw, Azeka, 36 Šarayim, Aditayim, Gǝdera, ǝd Gǝderotayim, iqqal awen maraw ɣǝrman d ǝkkoz ǝd tǝɣarmaten šin fǝl ǝxkaman. 37 Ǝd ɣǝrman wiyyad a tan-ǝmosnen : Senan, Xadaša, Migdal-Gad, 38 Dilan, Misfe, Yoktel, 39 Lakiš, Boskat, Eglon, 40 Kabbon, Lahimas, Kitliš, 41 Gederot, Bet-Dagon, Nama ǝd Makeda, iqqal awen maraw ɣǝrman ǝd sǝdis ǝd tǝɣarmaten-nasan šin fǝl ǝxkaman. 42 Ǝllan-tu harwa ɣǝrman wiyyad a tan-ǝmosnen : Libna, Eter, Ašan, 43 Ifta, Ašena, Nessib, 44 Kayla, Akǝzib, ǝd Mareša, iqqal awen taza ɣǝrman ǝd tǝɣarmaten-nasan šin dǝr ǝhhǝragan. 45 Ill-ay deɣ Ekron ǝd ɣǝrman ǝd tǝɣarmaten-nasan šin fǝl ǝxkaman 46 Ǝd ɣǝrman ǝd šiɣarmaten ketnasnat šin ahanen iɣǝliɣǝlayan n Ašdod gǝr Ekron d agaraw wa zǝwwǝran, 47 d Ašdod ǝd Gaza ǝd ɣǝrman ǝd tǝɣarmaten šin dǝr ǝhhǝragan, har agarew wa n Masar d afay n agaraw wa zǝwwǝran.
48 Ǝllan-tu deɣ ɣǝrman win ahanen akal wa n ǝdɣaɣan a tan-ǝmosnen : Šamir, Yattir, Sokaw, 49 Danna, Kirǝyat-Sanna as itawannu deɣ Debir, 50 Anab, Aštemowa, Anim, 51 Gošen, Xolon, ǝd Gilaw, iqqal awen maraw ɣǝrman d iyyan ǝd tǝɣarmaten-nasan šin fǝl ǝxkaman. 52 Ǝllan-tu deɣ ɣǝrman wiyyad a tan-ǝmosnen : Arab, Ruma, Ešan, 53 Yanum, Bet-Tafwax, Afeka, 54 Xumayta, Kirǝyat-Arba as itawannu deɣ Xebron, ǝd Sǝyyor, iqqal awen taza ɣǝrman ǝd tǝɣarmaten-nasan šin fǝl ǝxkaman. 55 Ǝllan-tu deɣ ɣǝrman a tan-ǝmosnen : Mawon, Karmel, Zif, Ǝyyuta, 56 Jizreyel, Yokdeyam, Zanowax, 57 Kayin, Gibǝya, ǝd Timna, iqqal awen maraw ɣǝrman ǝd tǝɣarmaten-nasan šin fǝl ǝxkaman. 58 Ǝllan-tu deɣ ɣǝrman a tan-ǝmosnen : Xalul, Bet-Sur, Gǝdor, 59 Marat, Bet-Anot, d Eltekon, iqqal awen sǝdis ɣǝrman ǝd tǝɣarmaten-nasan šin fǝl ǝxkaman. 60 Ǝllan-tu deɣ ɣǝrman a tan-ǝmosnen : Kirǝyat-Bal as itawannu Kirǝyat-Yarim, ǝd Raba, iqqal awen ǝššin ɣǝrman ǝd tǝɣarmaten-nasan šin fǝl ǝxkaman.
61 Ǝntanay da iɣǝrman win ahanen teneray a tan-ǝmosnen: Bet-Araba, Middin, Sekaka, 62 Nibšan, Ir-Melax ǝd En-Gedi, iqqal awen sǝddis ɣǝrman ǝd tǝɣarmaten-nasan šin fǝl ǝxkaman.
63 Amaran tawšet ta n Yahuda wǝr tǝgrew fǝrregat n asataɣ ǝn Yebusatan win ǝxsarnen Yerusalam. Nimaɣsaran d ǝzzurrǝyya ǝn Yahuda daɣ aɣrǝm wen da har azala.