2
Tǝhǝwt ǝn Musa ǝd tadwala-net
1 Inkar alǝs n iyyan daɣ Kǝl-Lebi izlaf du tantut tǝmosat ǝnta da wǝlǝt Lebi. 2 Ǝllan ǝddi har d-ihǝw barar-nasan iyyan, tǝnay-tu mas wǝr ila malad, tǝɣbar-tu har iga karadat tǝlil. 3 As tǝnay as ab'as tǝfrag aɣabar-net, tǝdkal-du azmam igan daɣ ǝzzǝnǝf ǝn telant iyyat, tǝɣrad-tu adabaɣ s ǝzzǝnǝfan ǝššin ǝn kolta iyyan, amaran tǝga daɣ-as barar, tǝsǝls-ay. Tǝzzar tǝssǝnsa azmam wen daɣ ammas ǝn telant iyyat du-tǝdaggalat fǝl fayyan n agarew wa n Ǝnnil. 4 Tǝbakammat tǝmǝqqart ǝn barar daɣ ihǝz n adag wen y ad tǝssǝn awa z'agin.
5 Arat n amazay dǝffǝr awen tǝzagaday-du elles ǝn Firɣawna s agarew wa n Ǝnnil, tara ǝširǝd. Saɣlaynat tǝnalkimen-net ǝllilnat efay n agarew. Togga azmam iha ammas n annabat wen, tǝzzar tǝssǝdkal-t-idu i tǝklit-net. 6 Tolam azmam tǝnay daɣ-as barar. Zaɣnin awen arat n ajanɣay ihallin. Tǝggaz-tat tahanint-net tǝnna: «Awa barar ǝn Ɣibritan!» 7 Den daɣ a tat-du-tǝhoz tǝmǝqqart ǝn barar tǝnn-as: «Ǝngǝm a dam-d-aɣra iyyat daɣ tǝdoden šin Ɣibritan a dam-tǝsankas barar a?» 8 Tǝnn-as elles ǝn Firɣawna: «Awalla, aglu!» Tǝzzar tǝgla tabarart tǝɣra-du anna ǝn barar iman-net. 9 Tǝnna elles ǝn Firɣawna i tǝntut ten: «Awǝy barar wa a di-tu-tǝsankasa, a kam hakka tefert-nam.» Teway tǝntut barar, a tu-tǝsankas. 10 As idwal barar wen teway-tu y elles ǝn Firɣawna. Tǝg-ay tǝntut ten barar-net, tǝzzar tǝg-as esǝm Musa fǝlas tǝnna aman daqq idu-tǝkkas.
Ǝdǝrrǝg ǝn Musa s akal ǝn Midǝyan
11 As d-ewad Musa iggǝdaz-in Ɣibritan (esǝm iyyan ǝn Kǝl-Israyil) ǝmosnen imǝdrayan-net daɣ tawšet. Inay alɣazab wa taggin. Ogaz-in iyyan daɣ Kǝl-Masar izba iyyan daɣ Ɣibritan ǝs tǝwit. 12 Iwaraɣwaraɣ fǝl aganna ketnet wǝr ihǝnnǝy awedan, tǝzzar inɣa aw Masar wen, inbal-tu daɣ ǝzazǝl. 13 As affaw iqqal-in ogaz-in ǝššin Ɣibritan ǝknasan gar essan. Inna i wa wǝr nǝla tidǝt: «Mafel as tǝggataɣ ǝmidi-nak?» 14 Inn-as alǝs wen: «Ma kay igan ǝmǝnokal-nana? Ǝngǝm a tareɣ a di-taga tenaɣay ta tǝge y aw Masar?» Den daɣ ad tǝggaz tasa Musa, inna daɣ adi batu ten tǝqqal arat iwizawazan.
15 Isla Firɣawna batu ten igmay ǝd tanaɣay ǝn Musa. Mišan ifal daw-ǝs Musa iddǝggag ikka akal ǝn Midǝyan.
Ewad-in, iqqim dagma n anu iyyan. 16 Alǝs imosan ǝlimam n akal ǝn Midǝyan ila ǝssayat tǝbararen. Ǝwarnat-du anu. Ǝjjojalnat y aharay n abba-nasnat. 17 Osan-du madanan wiyyad ǝstaɣan-tanat. Tǝzzar inkar-du Musa ogaz-tanat iššǝšw-asnat eharay-nasnat. 18 As din-osanat abba-nasnat Rawǝl, inn-asnat: «Ma dakmat-d-igan ǝsǝtrǝb ogdan d awa azala?» 19 Ǝnnanat-as: «Alǝs iyyan ǝn Masar dana-ogazan daɣ madanan, ijjojal-ana har nǝktar.» 20 Inn-asnat: «Ma iga za alǝs wen? Mafel as t-in-tǝtayyimat? Aglimat aɣrimat-t-idu a dǝr-na idrǝw imensewan.» 21 Irda Musa s amel ɣur alǝs wen. Ikf-ay tabarart-net tǝgat esǝm Ziffora, izlaf-tat. 22 Tǝla barar ig-as Musa esǝm Geršom (Ǝɣǝrib den) fǝlas inna akal a d-igmad daɣ imos ǝɣǝrib.
Ǝsǝnnǝfrǝn ǝn Mǝššina Musa y ad isǝllǝllǝt tamattay-net
23 Tǝga tamert tagget. Aba Firɣawna wa nad. Tǝgla tamattay n Israyil tǝzzirza d ǝkkǝlu, tǝzzar tewad-in tǝzarzawt-nasan Mǝššina. 24 Isla Mǝššina i tǝzarzawt-nasan, tǝzzar inna ad ixkǝm s arkawal ǝn tassaq wa inamagga d Ibrahim, d Isǝhaq, ǝd Yaqub. 25 Ihannay Mǝššina maddanǝs n Israyil, issan fǝl taɣara-nasan.