3
Ǝtǝwǝɣra ǝn Musa ǝd tǝkawent-net.
1 Illa Musa den imos amadan n aharay wa mallan y ǝdaggal-net Yitraw, was itawannu Rawǝl, imosan ǝlimam ǝn Midǝyan. Idan eharay daɣ ǝsuf har ewad adɣaɣ wa n Xoreba, itawann-as adɣaɣ wa n Mǝššina. 2 Tǝzzar inafalal-as-du angalos n Amaɣlol daɣ tǝfsǝq tǝbilaglagat. Isammaklal ǝs Musa as wǝr tǝtǝrǝkǝmmit tǝfsǝq ten. 3 Den daɣ ad inna gar-es ǝd man-net: «A din-ihaza ad ǝnǝya ǝlmaɣiza wa, ad ǝssǝna mafel as wǝr tǝtǝrǝkǝmmit tǝfsǝq ten».
4 Inay Amaɣlol as Musa itihaz-in arat wen. Tǝzzar iɣr-ay Mǝššina inn-as: «Musa, Musa!» Inn-as Musa: «Nak da!» 5 Inn-as Mǝššina: «Zakkat-in fǝl adag wa, ǝkkǝs iɣateman, edag wa tahe da amadal zǝddigan a imos.» 6 Inn-as tolas dǝffǝr awen: «Nak Ǝmǝli n abba nak, Ǝmǝli n Ibrahim, Ǝmǝli n Isǝhaq, Ǝmǝli ǝn Yaqub.» Den daɣ a d-issǝlsa Musa udǝm-net fǝlas iksud ad inǝmǝswǝd ǝd Mǝššina.
7 Inn-as Amaɣlol tolas: «Ǝnaya alɣazab wa tǝtaggu tamattay-nin daɣ Masar, amaran sallaɣ i tǝkurayt-net fǝl win tat-ǝssasnen. Ǝssana wǝllen as taɣazzaban.» 8 «Awen daɣ a fǝl d-ǝzzǝbbe y a tan-ǝkkǝsa daɣ tarna ǝn Kǝl-Masar, ǝkkǝsaq-qan daɣ Masar ǝšǝššiwǝdaq-qan akal ihossayan, elwan, ahanat-tu tǝsǝssǝngay n ǝx ǝd turawat. Akal wen ǝnta a ǝhan Kananitatan, ǝd Xiwitatan, d Amoritatan, ǝd Fǝrizitatan ǝd Ɣifatan ǝd Yǝbusatan.» 9 «Ǝmǝrǝdda tǝkurayt ǝn maddanǝs n Israyil ǝsleɣ as, ǝnaya tolas awa dǝr ogda alɣazab wa tan saknin Kǝl-Masar.» 10 «Aglu daɣ adi ǝmǝrǝdda takka Firɣawna. Zimazalaq-qay sǝr-ǝs fǝl a du-tǝssǝrdǝɣa tamattay-nin ta n maddanǝs n Israyil ahanen Masar.»
11 Inna Musa i Mǝššina: «Nak za ma mosa, as takka Firɣawna wala takkasa-du maddanǝs n Israyil daɣ Masar?» 12 Inn-as Mǝššina: «Adi ǝddewa dǝr-ǝk. Arat wa tǝhannaya da ǝnta tǝgǝyya n as nak kay-in-issǝglan. As du-tǝkkasa tamattay daɣ Masar, tǝɣbǝdam-i ɣur ǝdɣaɣ wa.» 13 Ilas Musa inn-as: «Ad agla daɣ adi akka maddanǝs n Israyil annaɣ-asan: "Ǝmǝli n aljadan-nawan a di-d-izammazalan sǝr-wan". Kud z'ǝnnan-i: "M' esǝm-net Ǝmǝli wen?" Ma dasan-z-anna ǝddi?» 14 Den daɣ ad inna Mǝššina i Musa: «Ǝmosa "ǝlle da." Arat da wa za tanna i maddanǝs n Israyil "Ǝlle da" a di-d-izammazalan sǝr-wan.» 15 Ilas Mǝššina inna i Musa: «Tannaɣ-asan: "Amaɣlol, Ǝmǝli n aljadan-nawan, Ǝmǝli n Ibrahim, Ǝmǝli n Isǝhaq, Ǝmǝli ǝn Yaqub di-d-izammazalan sǝr-wan". Esǝm-in den da wa iɣlalan, amaran ǝnta as za tǝwǝzdǝya daɣ ǝɣlul n azzaman.»
16 «Aglu daɣ adi tǝššidǝwaɣ iɣmaran win ǝmosnen šigǝttawen ǝn Kǝl-Israyil tannaɣ-asan: "Amaɣlol, Ǝmǝli n aljadan-nawan, Ǝmǝli n Ibrahim, d Isǝhaq, ǝd Yaqub, a di-d-inafalan, inn-i: Illikan as anay ǝnayaq-qawan. Oggeɣ awa kawan-igarrawan daɣ Masar. 17 Amaran ǝgeɣ tanat ta n a kawan-ǝkkǝsa daɣ akal wa n Masar daɣ tǝtaɣazzabam, šǝššiwǝdaq-qawan akal ǝn Kananitatan, ǝd Xiwitatan, d Amoritatan, ǝd Fǝrizitatan ǝd Ɣifatan ǝd Yǝbusatan. Akal wen ahanat-tu tǝsǝssǝngay n ǝx ǝd turawat." 18 Ad ǝssǝsǝman wǝššaran n Israyil y awal-nak tidawa dǝr-san s ahan n ǝmǝnokal ǝn Masar tannim-as: "Amaɣlol, Ǝmǝli ǝn Ɣibritan, Ǝmǝli-nana, inafalal-ana-du. Akf-ana turagat n ad nagu karad adan ǝn teklay daɣ taneray fǝl a das-nagu šikutawen."». 19 «Ǝssanaɣ as wǝr kawan-z-ayyu ǝmǝnokal di taglim fǝlas wǝr t-illa awedan ifragan ǝšǝhhǝššǝl-net. 20 Mišan a fall-as ǝššǝšɣǝla tarna tagget. Ammazala fǝl Kǝl-Masar ǝs tarna tǝgat daɣ tǝjujab wǝr nǝtawazday. Dǝffǝr adi a kawan-z-ayyu taglim. 21 Wǝr za taglim tǝsikarayrayam ifassan fǝlas ad akfa tamattay ta ǝnniɣmat daɣ Kǝl-Masar.
22 Tantut ketnet tǝgmay daɣ tǝmahharak-net made tǝmidit-net ta n wǝlǝt Masar uɣǝnan n urǝɣ ǝd win ǝzrǝf, ǝd tǝbǝddaɣ. Aratan win den akfiwat-tan i bararan-nawan ǝd tǝbararen-nawan. Ǝmmǝk wen da as za taɣim Kǝl-Masar.»