4
Ǝsǝnnǝfilal ǝn Mǝššina tarna-net i Musa
1 Inn-as Musa: «Kud za wǝr di-ǝzzǝgzanan za wǝr di-ǝssǝsaman, annin-i "Bahu as dak-inifalal Amaɣlol"?» 2 Inn-as Amaɣlol: «Ma ihan ǝfus nak?» Inn-as Musa: «tallaq». 3 Inn-as Amaɣlol: «Sǝrtǝk-tat daɣ amadal!» As issǝrtak Musa tallaq ten, tǝbbǝday tǝqqal mǝlul. Iggad fall-as Musa. 4 Inn-as Amaɣlol: «Ǝzzǝl ǝfus-nak, tǝbǝzaq-qu ǝs tasbat!» Ihoz-in Musa idkal mǝlul s ǝfus-net iqqal tallaq ta nad daɣ ǝfus-net. 5 Inn-as Amaɣlol: «Ag' adi da fǝl ad ǝzzǝgzǝnan Kǝl-Israyil as Amaɣlol, Ǝmǝli n aljadan-nasan, Ǝmǝli n Ibrahim, Ǝmǝli n Isǝhaq, Ǝmǝli ǝn Yaqub, inifalal-ak.»
6 Ilas Amaɣlol inn-as: «Adǝd ǝfus-nak daɣ ǝdmaran-nak.» Tǝzzar issǝwar Musa ǝfus-net idmaran-net. As d-ikkas ǝfus-net ikna ǝkǝršǝššǝn ǝs tǝwǝrna iyyat. 7 Ilas Amaɣlol inn-as: «Suɣǝl ǝfus-nak idmaran-nak.» Issoɣal ǝfus-net. As t-id-ikkas wǝr ila malad.
8 Ilas Amaɣlol inn-as: «As dak-wǝr-ǝzzǝgzanan Kǝl-Israyil ɣur tǝlmǝɣjujat ta tazzarat, ad ǝzzǝgzǝnan ɣur ta n sanatat. 9 As ǝnayan tǝlmǝɣjujaten šin sanatat en ǝglan wǝr dak-ǝzzǝgzanan, za wǝr dak-ǝssǝsaman, takkaɣ agarew wa n Ǝnnil tǝlkǝwa d aman-net tǝnɣǝlaq-qan daɣ amadal iqquran. Igda ad ǝdǝsan amadal ad ǝqqǝlan azni.»
10 Inna Musa y Amaɣlol: «Ya Ǝmǝli! Nak izzǝwat fall-i awal. Amaran awen wǝr t-ila ǝndazǝl wala ǝndazǝl nad wala ɣur ǝsǝnti wa tǝgeɣ awal y ǝkli-nak. Imi-nin d ilǝs-in odadan, izzǝwat fall-i awal.» 11 Inn-as Amaɣlol: «Ma ikfan awedan imi? Ma isamadadan izamazag? Ma isadarɣalan isaswad? Wǝrgeɣ nak da, a imosan Amaɣlol?» 12 «Ǝmǝrǝdda aglu, nak a z'anattafan d ǝmi-nak, a kay ǝssusǝnaɣ awa za tanna.» 13 Mišan ilas Musa inn-as: «Ya Ǝmǝli! Onsayaq-qay ad tǝzǝmmizǝlaɣ awedan iyyan fǝl ad agu ǝmazal wǝdi.»
14 Iggaz alham ǝn Musa Amaɣlol wǝllen inn-as: «Ǝngǝm ill-ay ǝmaqqar-nak Harun wa n iyyan daɣ Kǝl-Lebi. Ǝssanaɣ as rǝɣis fall-as awal. Amaran izay-kay-du ǝmǝrǝdda. As dǝr-ǝk immǝnay ad fǝliwǝsan man-net. 15 Ǝmǝl-as batuten-in s ǝmmǝk-nasnat, ǝddi nak dawan-ilala fǝl ǝššin-ewwan daɣ awa za tannim, assaknaq-qawan a waskawan iwar igi-net. 16 A dak-iqqǝl ǝmǝššewǝl gar-ek ǝd tamattay n Israyil, kay amaran tǝqqǝlaɣ as zun Mǝššina išawalan y ǝnnǝbi-net. 17 Ǝdkǝl tallaq ta, ǝnta as za tǝtagga alɣalamaten-in.»
Tewaɣlay ǝn Musa Masar
18 Iqqal Musa ǝdaggal-net Yitraw, inn-as: «Areɣ a di-tayya ad akkaɣ aytedan-in win ahanen Masar ad ǝssǝnaɣ ǝddaran.» Inn-as Yitraw: «Aglu, ikf-ik Mǝššina alxer». 19 Inna Amaɣlol i Musa harwa ad iha Midǝyan: «Abǝz tarrayt, tǝqqǝla Masar, fǝlas win ǝranen tenaɣay-nak kul aba-tan.» 20 Den daɣ ad eway Musa tantut-net ǝd bararan-net issǝwan-tan ajad tǝzzar ikka Masar, ittâf tallaq tas t-omar Mǝššina s a sǝr-ǝs išɣǝl.
21 Inna Amaɣlol i Musa: «Ǝmǝrǝdda as tǝkkeɣ Masar, ǝssǝn fǝl tǝlmǝɣjujaten kul šin as kay-ǝkfeɣ tarna n igi-nasnat. As din-tose tagaq-qanat dat Firɣawna. Amaran nak ad ǝssǝɣǝra ǝwǝl-net fǝl ad igdǝl i Kǝl-Israyil agamad ǝn Masar. 22 Tannaɣ i Firɣawna: Arat da wa inna Amaɣlol: "Tawšet n Israyil tǝmos barar-in wa n aɣafadday, 23 ǝnneɣ-ak-in ayy-i aɣafadday-nin a di-iɣbǝd. Hekay! As tugayaɣ ad ǝssǝxsǝya aɣafadday-nak."»
24 Ǝššokalan har da ad ǝnsan, tǝzzar idal-du Amaɣlol Musa ira tenaɣay-net. 25 Den daɣ a du-tǝnkar Ziffora tǝdkal-du tǝhunt tǝwalat tǝsǝmmǝnkǝd sǝr-ǝs barar-net. Tǝdkal-du agašek-net tǝdas sǝr-ǝs izuf ǝn Musa tǝgannu: «Kay alǝs n ǝzni a di-tǝmosa!» 26 Tǝzzar oyya Ǝmǝli Musa. Xasil ǝddǝlil n ǝmǝnkǝd fǝl tǝnna Ziffora: «Alǝs n ǝzni a di-tǝmosa!»
27 Amaɣlol iššewal i Harun inn-as: «Aglu akku Musa daɣ taneray.» Igla Harun har immǝnay ǝd Musa ɣur ǝdɣaɣ wa ɣur inafalal Mǝššina i Musa, izalammat-tu. 28 Tǝzzar imal Musa i Harun batuten kul šin das-iga Amaɣlol, imal tǝlmǝɣjujaten kul šin as t-omar s igi-nasnat.
29 Dǝffǝr awen ǝddewan fǝl ǝššin-essan ǝššedawan-du iɣmaran kul win ǝmosnen šigǝttawen daɣ maddanǝs n Israyil. 30 Imal-asan Harun batuten kul šin iga Amaɣlol i Musa, iga tǝlmǝɣjujaten kul dat tamattay. 31 Tǝɣrad tamattay ǝzǝgzan. As ǝslan as Amaɣlol inay alɣazab wa taggin, osa-du fǝl amaknaw ǝn taɣara-nasan, ǝssǝjadan-as, ǝɣbadan-tu.