5
Iki ǝn Musa ǝd Harun Firɣawna
1 Dǝffǝr awen ikka Musa ǝd Harun Firɣawna ǝnnan-as: «Amaɣlol, Ǝmǝli n Israyil inna: "Ayyu tamattay-nin ad taglu tagu amud wa n ǝlɣibada-nin daɣ ǝsuf."» 2 Inn-asan Firɣawna: «Ma imos za Amaɣlol as das-sasama wala tayya Kǝl-Israyil aglin. Wǝr ǝzdaya Amaɣlol za wǝr z'ayya Kǝl-Israyil aglin.» 3 Ǝlasan ǝnnan-as: «Ǝmǝli ǝn Ɣibritan inifalal-ana-du. Nara a dana-tayya ad nagu teklay ǝn karad adan daɣ ǝsuf ad nagu y Amaɣlol Ǝmǝli-nana šikutawen fǝl tǝksǝda n a daɣ-na izǝzzǝbbǝt alwaba igan daɣ tǝwǝrna made ǝmǝgǝr.» 4 Tǝzzar inn-asan ǝmǝnokal ǝn Masar: «Ma fel taram ad tǝkkǝsam tamattay daɣ ǝššǝɣǝl-net? Agliwat kawanay da tǝšɣǝlam.» 5 Tǝzzar inn-asan Firɣawna: «Eklan a ǝmǝrǝdda igǝt a gan, amaran kawanay taram ad ayyin ǝššǝɣǝl-nasan. Mafel?»
6 Ǝzǝl wen da ad omar Firɣawna meddan win šašɣalnen tamattay ten ǝmosnen Kǝl-Masar, ǝd win tat-ewalnen daɣ ǝššǝɣǝl ǝmosnen Kǝl-Israyil, inn-asan: 7 «Ad wǝr tǝlǝsam tehakkay ǝn tamattay ta ǝlǝmmuz was taggin bargitan. Ayyat-tan a t-idu-tamadan i man-nasan. 8 Tǝšǝhhǝššǝlam-tan igi ǝn bǝrgitan ogdanen ǝd win taggin harwa du-wǝr-timǝdan ǝlǝmmuz i man-nasan. A dasan-in-wǝr-tǝglǝmam wala, fǝlas aytedan di inǝffǝrǝšša a mosan, adi da fǝl ǝzzǝrzan gannin: "Nara dana-tayya ad nagu šikutawen y Ǝmǝli-nana." 9 Agiwat y aytedan win ǝššǝšɣǝl issohen har ib-as ǝgrawan ǝs wala, ǝddi wǝr za sasaman i batuten ǝmosnen bahu.»
10 Ǝglan meddan win šašɣalnen Kǝl-Israyil ǝd win tan-ewalnen, ǝnnan-asan: «Inna Firɣawna: "Wǝr kawan-z-ǝlǝsa tehakkay n ǝlǝmmuz, 11 agliwat tawǝyam-du ǝlǝmmuz i man-nawan daɣ adag wa daq-q' idu-za-tǝgrǝwam. Mišan ǝššǝɣǝl-nawan wǝr daɣ-as z'ifnǝz wala."» 12 Wazawazan Kǝl-Israyil daɣ akal ǝn Masar ketnet a du-farradan ǝddigdag n ǝlǝmmuz ǝn tǝwǝgas ibraran daɣ adag n ǝlǝmmuz wa ihossayan. 13 Tǝzzar ǝsasan-tan meddan win tan-šašɣalnen ǝmosnen Kǝl-Masar ǝnnan-asan: «Ǝšɣǝlat har akkasaw ǝššǝɣǝl-nawan. Ǝzǝl kul tǝgam daɣ-as awa tǝtaggim harwa tǝgarrawam ǝlǝmmuz.» 14 Tǝzzar ǝnkaran Kǝl-Masar win omar Firɣawna s ad šašɣalan maddanǝs n Israyil ǝsasan-tan har as ǝbǝnbayan daɣ meddan iman-nasan win ǝsannafranen y ad awǝlan maddanǝs n Israyil a tan-ǝggatan, gannin-asan: «Mafel ǝndazǝl d azala, wǝr tǝsakkasawam medan ǝn bǝrgitan wa tǝtaggim kala da?»
15 Ǝglan meddan ǝn maddanǝs n Israyil win ewalnen tamattay ewayan tala-nasan ǝs Firɣawna ǝnnan-as: «Mafel as tǝtaggaɣ ǝmazal igan taɣara ta y eklan nak? 16 Ab-as garrawan eklan-nak ǝlǝmmuz mišan itawann-ana: "Agiwat bargitan!" Ǝmǝrǝdda eklan-nak tamattin. Eges tamattay ta-nak a wǝr nǝla tidǝt.» 17 Tǝzzar inn-asan Firɣawna: «Kawanay ǝfǝrǝšši aggen a tǝgam. Adi da fǝl tǝgannim taram ad taglim ad tagim šikutawen y Amaɣlol. 18 Ǝmǝrǝdda aglat ǝšɣǝlat! Ǝlǝmmuz wǝr tu-za-tǝlǝsam agaraw, mišan ǝššil ad tagim bargitan win daɣ-wan tawagmaynen.» 19 Ǝgran-in meddan win ewalnen maddanǝs n Israyil as taɣara-nasan tǝqqal arat iɣšadan wǝllen, fǝlas itawann-asan wǝr dasan-in-z-itǝwǝgǝlǝm wala daɣ medan ǝn bargitan win as ihor a tan-agin ǝzǝl kul. 20 As din-ǝfalan Firɣawna da ǝstaban i Musa ǝd Harun dasan-ǝqqalnen den kala da. 21 Ǝnnan-asan: «Ya Amaɣlol tǝswada daɣ awa tǝgam tammazala s ǝššǝriɣa-nak. Firɣawna ǝd marayan sǝr-ǝs ǝknan-ana taglǝfat wǝllen fǝl ǝddǝlil-nawan. Zun tan-tǝkfam takoba fǝl a danaɣ-anɣin.» 22 Den daɣ ad igla Musa imalallay s Amaɣlol, inna: «Ǝmǝli, mas tǝzaɣazzaba tamattay ta? Mafel daɣ adi as di-du-tǝzammazala? 23 A d-obazan ɣur assa wa din-ǝgeɣ i Firɣawna ǝššewalaɣ-as s esǝm-nak, išatu i tamattay ten alɣazab amaran kay wǝr tat-tǝssǝfsa harwa da.»