6
1 Tǝzzar inna Amaɣlol i Musa: «Ǝmǝrǝdda ad za tǝnǝya awa z'aga i Firɣawna. Tarna-nin fǝl z'ayyu tamattay taglu. Amaran tarna-nin fǝl tan-z-istǝɣ daɣ Masar amadâl!»
Mǝššina iga i Musa arkawal n ǝsǝddǝrfi ǝn tamattay
2 Ilas Mǝššina inna i Musa: «Nak a imosan Amaɣlol, 3 ǝnifalalaɣ y Ibrahim d Isǝhaq ǝd Yaqub s esǝm-in a t-imosan Mǝššina di maqqaran, mišan wǝr tan-ǝzzǝzdayaɣ iman-in s almaɣna n esǝm-in a t-imosan "Ǝlle da". 4 Ǝdkalaɣ-asan arkawal ǝn tassaq n a tan-akfaɣ akal ǝn Kanan, imosan akal daɣ ǝmosan inaftaɣan. 5 Tolas ǝsleɣ i tǝzarzawt ǝn maddanǝs n Israyil win ǝgan Kǝl-Masar eklan, ǝmǝrǝdda ad ǝxkǝma s arkawal ǝn tassaq wa dasan-ǝdkala. 6 Awen da fǝl as ǝmǝl-asan-in as: "Nak a imosan Amaɣlol! A kawan ǝkkǝsa daɣ ǝššǝɣǝlan labasnen win kawan-šahaššalan Kǝl-Masar. A kawan-saddarfa daɣ ǝsǝkkǝlu wa dawan-ǝgan Kǝl-Masar, ǝkkǝsaq-qawan-du daɣ-san ǝs tarna-nin tǝgat daɣ ǝlxǝkuman ǝssohatnen. 7 A kawan-aga tamattay-nin, ǝqqǝlaɣ Ǝmǝli-nawan. Ad tǝssǝnam as nak a imosan Amaɣlol, Ǝmǝli-nawan: was ǝnta kawan-ikkasan daɣ ǝššǝɣǝlan win labasnen kawan šahaššalan Kǝl-Masar. 8 Dǝffǝr adi, a kawan šǝššiwǝdaɣ akal was ǝdkalaɣ arkawal n ad t-akfa y Ibrahim, d Isǝhaq ǝd Yaqub, dawan-t-akfa tǝxyǝzam-tu. Nak a imosan Amaɣlol."» 9 Iga Musa isalan win den kul i maddanǝs n Israyil mišan wǝr das-ǝssǝsaman fǝlas iman-nasan iɣšad-tan ǝkkǝlu wa sǝksǝdan ǝgan daɣ Masar. 10 Iššewal Amaɣlol i Musa inn-as: 11 «Aglu akku Firɣawna, ǝmǝnokal ǝn Masar, ann-as: "Ayyu maddanǝs n Israyil ad ǝgmadan akal-nak."» 12 Mišan iššewal Musa y Amaɣlol inn-as: «Wala maddanǝs n Israyil da wǝr di-ǝssǝsaman, manǝmmǝk as di-z-issǝsǝm Firɣawna, ǝnta nak izzǝwat fall-i awal?»
13 Ilas Amaɣlol iššewal i Musa ǝd Harun daɣ talɣa ǝn maddanǝs n Israyil ǝd Firɣawna, omar-tan s ad ǝkkǝsan maddanǝs n Israyil daɣ akal wa n Masar.
Ǝruru ǝn Musa ǝd Harun
14a Ǝntanay da esmawan n arat daɣ meddan win muzaran ǝn Kǝl-Israyil. 14b Iɣawnatan da win d-ǝgmadnen Ruben wa n aɣafadday n Israyil (Yaqub): Xenok ǝd Falu, Xesron ǝd Xarmi. 15 Iɣawnatan da win d-ǝgmadnen Šimǝɣon: Yǝmuhel, Yamin, Ohad, Yaxin, Tǝsoɣar, Šawǝl imosan barar ǝn wǝlǝt Kanan.
16-19 Ǝntanay da ismawan ǝn maddanǝs ǝn Lebi: Geršon, Qǝhat ǝd Mǝrari. Taɣrǝst ǝn Lebi tǝmos temeday n awatay ǝd karadat tǝmǝrwen d ǝssa. Maddanǝs ǝn Geršon: Libni ǝd Šimǝɣi, akk iyyan ila tawšet. Maddanǝs ǝn Qǝhat: Ɣamram, Yišar, Xebron ǝd Ɣuzziyel. Taɣrǝst ǝn Qǝhat ketnet tǝmos temeday n awatay ǝd karadat tǝmǝrwen ǝd karad. Maddanǝs ǝn Mǝrari: Maɣli ǝd Muši. Ǝntanatay da da tawšeten šin d-ǝgmadnen Lebi s attarixan-nasnat.
20 Izlaf Ɣamram Yokebed tǝmosat talɣammat-net, ila dǝr-ǝs Harun ǝd Musa. Taɣrǝst ǝn Ɣamram ketnet tǝmos temeday n awatay ǝd karadat tǝmǝrwen d ǝssa. 21 Maddanǝs ǝn Yišar ǝmosan: Qoraɣ, Nefeg, ǝd Zixri. 22 Maddanǝs n Ɣuzziyel ǝmosan: Mišahel, Elšafan, ǝd Sitri.
23 Izlaf Harun Elišebaɣ, tǝmosat elles n Ɣaminadab, tamadrayt ǝn Naɣšon, ila dǝr-ǝs Nadab, Abihu, Elɣazar, d Itamâr. 24 Maddanǝs ǝn Qoraɣ: Assir, Elqana, d Abǝyasaf. Ǝntanatay da da tawšeten šin d-ǝgmadnen Qoraɣ. 25 Elɣazar ag Harun izlaf elles ǝn Futǝyel ila dǝr-ǝs Finɣas. Ǝnta da da ǝmǝsǝnsa ǝn ɣawnatan win d-ǝgmadnen Lebi d ǝmmǝk was ǝmmǝzzaynat tawšeten-nasan.
26 Harun ǝd Musa win as tǝga batu-nasan da, ǝntanay as inna Amaɣlol: «Ǝkkǝsat-du tamattay n Israyil daɣ Masar ǝs tǝmǝwit tǝnnizzamat.» 27 Daɣ adi ǝntanay da da Musa ǝd Harun win ǝkkanen Firɣawna ǝššewalan-as fǝl a d-ǝkkǝsan maddanǝs n Israyil daɣ akal-net.
Emel ǝn Mǝššina i Musa awa as otas igi-net