7
1 Inna Amaɣlol i Musa: «Sǝsǝm! Ǝkfeq-qay turagat n ad takka dat Firɣawna zun as tǝmosa Mǝššina, amaran Harun imos ǝnnǝbi-nak. 2 Kay ad tannaɣ arat ketnet was kay-omara, amaran ǝmaqqar-nak Harun ad t-issuɣǝl i Firɣawna fǝl ad ayyu maddanǝs n Israyil aglin. 3 Mišan nak ad ǝssǝɣǝra ǝwǝl ǝn Firɣawna. Ad šata alɣalamaten-in, ǝd tǝlmǝɣjujaten-in daɣ akal ǝn Masar. 4 Dǝr ig'awen da wǝr dawan-z-issǝsǝm. Ǝddi da ad z'ǝmmazala ǝs tarna-nin fǝl Masar ǝkkǝsa-du tamattay-nin ta n Israyil tǝnnizzam zun agan. Ad agaɣ aratan win den s ǝlxǝkuman ǝssohatnen. 5 As ǝmmozala ǝs tarna-nin fǝl Masar y ad d-ǝkkǝsa maddanǝs n Israyil, ad ǝssǝnan Kǝl-Masar as "Nak a imosan Amaɣlol".»
6 Iga Musa ǝd Harun aratan win den s ǝmmǝk was tan-omar Amaɣlol. 7 Musa imos alǝs ǝgmadnat ǝttamat tǝmǝrwen n awatay, amaran Harun ǝgmadnat-tu ǝttamat tǝmǝrwen n awatay ǝd karad, as ǝššewalan i Firɣawna.
Ǝmǝttǝy ǝn tallaq ǝn Harun tǝqqal tanaɣwat
8 Inna Amaɣlol i Musa ǝd Harun: 9 «As dawan-inna Firɣawna: "Agiwat tǝlmǝɣjujat iyyat tǝsitaddat as Amaɣlol a kawan-d-izammazalan." Tannaɣ i Harun: "Ǝdkǝl tallaq-nak ǝgǝr-tat dat Firɣawna", as ig'adi ad tǝqqǝl tanaɣwat.» 10 Osa-du Musa ǝd Harun Firɣawna ǝgan arat was tan-omar Amaɣlol. Igar Harun tallaq dat Firɣawna d ǝljǝmaɣat-net tǝzzar tǝqqal tanaɣwat. 11 Isassaɣra-du Firɣawna imusanan-net ǝd massaxaran-net ǝgan arat šilat ǝn wen da ǝs šaɣawan-nasan. 12 Akkiyyan daɣ-san igar tallaq-net tǝqqal tanaɣwat. Mišan tanaɣwat ta tǝqqal tallaq ta n Harun, tǝɣrad alamaz ǝn šin-nasan. 13 Dǝr iga awen da igla Firɣawna wǝr iger tenbay daɣ awa ǝnnan den, fǝl as ǝwǝl-net a iknan aɣafal, imos as awen da a inna Amaɣlol.
Alɣalamat ta tazzarat: ǝmǝttǝy n aman ǝqqalan azni
14 Inna Amaɣlol i Musa: «Firɣawna ɣala ǝqqǝssu a iga, ugay s ad ayyu tamattay taglu. 15 Aglu akku Firɣawna harwa aɣora, alwaq wa daɣ d-igammad akku tǝšǝšwit n agarew ; tǝqqǝlaɣ-as den da. Ǝttǝf daɣ ǝfus-nak tallaq ta tǝqqalat mǝlul. 16 Tanna i Firɣawna: "Amaɣlol, Ǝmǝli-nana nakkanay Ɣibritan, kala di-d-izammazal sǝr-ǝk inn-ak-du: Ayyu tamattay-nin a di-tǝɣbǝd daɣ taneray, mišan kay harwada wǝr tǝsǝlla y awa dak-d-inna den." 17 Ǝnta da awa inna Amaɣlol: "Arat da wa kay z'issusǝnan as nak a imosan Amaɣlol:Tallaq ta ittaf ǝkli-nin Musa da, a sǝr-ǝs iwǝt aman n agaraw wa n Ǝnnil, ǝɣrǝdan ǝmǝttǝy ǝqqǝlan azni. 18 Ammatin kifitan kul win t-ǝhanen, irsad, har ib-as ǝfragan Kǝl-Masar tessay n aman-net"». 19 Ilas Amaɣlol inna i Musa: «Annu i Harun:Ǝdkǝl tallaq-nak tǝzzǝlaq-qat daɣ anamod ǝn mašwan ǝn Masar, a tan-imosan iɣǝzran-net, ǝd tǝsǝssǝngay-net, ǝd negǝyan-net d adag kul wa han aman, ǝddi ad ǝqqǝlan azni. Edag ǝhân aman daɣ Masar kul a daɣ-as ǝqqǝlan azni, harkid win ǝhanen ikassan.» 20 Iga Musa ǝd Harun arat was tan-omar Amaɣlol. Idkal Harun tallaq iwat aman n agarew dat šittawen ǝn Firɣawna d ǝljǝmaɣat-net. Ǝmmǝttayan aman kul, ǝqqalan azni. 21 Ammen kifitan kul win ahanen agarew, iga agarew tǝrsǝday wǝr nǝmǝkkan ab'as ǝfragan Kǝl-Masar tessay n aman-net. Imal-tu ǝzni daɣ akal ǝn Masar ketnet. 22 Mišan ǝnkaran massaxaran ǝn Masar ǝntanay da ǝgan arat šilat ǝn wen da ǝs šaɣawan-nasan. Eway-du awen as igla ǝwǝl ǝn Firɣawna ikna aɣafal, wǝr iger tenbay daɣ awa inna Musa ǝd Harun, imos as awen da a inna Amaɣlol. 23 Imalallay fall-asan iggaz ehan-net, wǝr igla wǝr izlay. 24 Tǝzzar ad ǝqqazan Kǝl-Masar amadal daɣ tamawen n agarew saggadan y aman ǝšwan fǝl as aman win agarew ab'as ǝfragan tessay-nasan. 25 Ǝgan ǝssa adan dǝffǝr awa iga Amaɣlol y aman n agarew en.
Alɣalamat ta n sanatat: ǝlmǝssibat ta n garan
26 Ilas ammar ǝn Musa inn-as: «Aglu akku Firɣawna tannaɣ-as: "Ǝnta da awa inna Amaɣlol: Ayyu tamattay-nin ad taglu a di-tǝɣbǝd. 27 As tugaya s a tan-tayyaɣ aglin, a din-ǝssukaɣ akal-nak ketnet ǝlmǝssibat tǝmosat igaran ǝganen igǝt issiksadan.
28 Iwǝnǝkwǝnǝk sǝr-san agarew wa n Ǝnnil, ǝgmǝdan-t-id s ahan-nak iman-net, ǝggǝzan har edag nak wa n etǝs, ǝd tessat-nak, ǝd nan ǝn maššaɣalan-nak win zawwarnen, ǝd nan ǝn tamattay-nak, ǝd daggan n ǝsǝŋŋi-nak, ǝd kassan-nak win araway ǝn tǝgǝlla. 29 Igaran win di, kundaba ǝwaran elam-nak kay iman-nak, agin awen da i maššaɣalan-nak win zawwarnen, ǝd tamattay-nak"».