8
1 Inna Amaɣlol i Musa tolas: «Annu i Harun: Ǝzzǝl ǝfus-nak ǝd tallaq-nak sa sǝr gǝrwan ǝd tǝsǝssǝngay ǝd ɣǝzran tamǝra d-igaran s akal ǝn Masar ketnet.» 2 Izzal Harun ǝfus-net sa sǝr aman ǝn Masar, ǝgmadan-du garan, ǝlsan akal ǝn Masar ketnet. 3 Mišan imassaxaran da ǝgan šila n awen da ǝs šaɣawan-nasan. Ǝntanay da omaran-du igaran ǝs Masar.
4 Isassaɣra-du Firɣawna Musa ǝd Harun inn-asan: «Ansǝyat Amaɣlol a fall-anaɣ idkalan igaran nak ǝd tamattay-nin. Ǝddi a kawan-ayya kawanay ǝd tamattay-nawan, taglim tagim-as šikutawen.» 5 Inna Musa i Firɣawna: «Ǝmǝl-i alwaq wa daɣ z'ansǝyaɣ Amaɣlol a fall-ak idkalan igaran kay ǝd maššaɣalan-nak win zawwarnen, ǝd tamattay-nak, har ib'as d-ǝqqiman garan ar daɣ agarew wa n Ǝnnil.» 6 Inn-as Firɣawna: «tufat iyyan da». Inn-as Musa: «Ad ag'adi s ǝmmǝk was tǝnneɣ fǝl ad tǝssǝnaɣ as Amaɣlol, Ǝmǝli-nana wǝr ila tugdat. 7 A fall-ak iba igaran kay ǝd maššaɣalan-nak win zawwarnen, ǝd tamattay-nak, ǝgmǝdan inan-nak, ib-as d-ǝqqiman ar daɣ agarew wa n Ǝnnil.» 8 Tǝzzar ifal Musa ǝd Harun Firɣawna. Onsay Musa Amaɣlol a idkalan igaran win d-issǝgla ǝmosan tǝkma i Firɣawna. 9 Iga Amaɣlol i Musa awa daɣ-as igmay. Oxsayan garan daɣ nan, ǝd tǝfǝrrawen-nasan, ǝd saffan. 10 Tawagganat daɣ-san tǝdǝbiyyǝkawen zawwarnen wǝllen, iɣrad akal ketnet tǝrsǝday. 11 As inay Firɣawna ǝlmǝssibat ten as tǝnnǝfnaz, igla iɣfâl ǝwǝl-net, ugay s ad igǝr tenbay daɣ awa das-igannu Musa ǝd Harun, imos as awen daɣ a inna Amaɣlol.
Alɣalamat ta n karadat: ǝlmǝssibat ta tadast
12 Inna Amaɣlol i Musa: «Annu i Harun: "Ǝzzǝl ǝfus-nak ǝd tallaq tǝwǝta sǝr-ǝs amadal a d-ǝggǝdan ǝgodraran ǝqqǝlan tadast daɣ akal ǝn Masar ketnet."» 13 Ǝgan awen da: Izzal Harun ǝfus-net ǝd tallaq iwat sǝr-ǝs amadal, tǝzzar ǝggadan-du godraran, ǝqqalan tadast daɣ akal ǝn Masar ketnet. Tǝkkǝbbat tadast ten aytedan kul ǝd hǝrwan. 14 Ǝgmayan massaxaran d igi ǝn tǝlmǝɣjujat zun ten da, y ad assabin tadast ten, mišan orn-asan igi-net. Ǝglan aytedan ǝd hǝrwan, tǝkkibbat-tan tadast. 15 Den daɣ ad ǝnnan massaxaran i Firɣawna: «Arat wa igi ǝn Mǝššina». Mišan igla Firɣawna iɣfâl ǝwǝl-net, ugay s ad igǝr tenbay daɣ awa igannu Musa ǝd Harun imos as awen daɣ a inna Amaɣlol.
Alɣalamat ta n ǝkkozat: ǝlmǝssibat ta n zǝmzam
16 Inna Amaɣlol i Musa: «As kay-affaw tǝnzǝya tǝssǝlkǝda i Firɣawna, alwaq wa daɣ d-igammad akku tǝšǝšwit n agarew, tannaɣ as "Ǝnta da awa inna Amaɣlol: Ayyu tamattay-nin ad taglu tǝɣbǝd-i. 17 As tugaya, a kay-in-ǝssukaɣ izǝmzam kay ǝd maššaɣalan-nak win zawwarnen, ǝd tamattay-nak, tǝzzar ǝdnǝyan inan win Kǝl-Masar, alsin amadal. 18 Mišan ǝzǝl wǝdi, ad sǝɣǝllǝsa amadal wa n Gošen s ǝnta a taha tamattay-nin. Fǝl ad tǝssǝnaɣ as nak a imosan Amaɣlol, aheɣ akal-nak. 19 Ad agǝza tamattay-nin daɣ tǝkma ta za tǝgrǝwat ta-nak. Ǝmmǝk en daɣ as z'ǝzlǝya tamattay-nin ǝd ta-nak. Alɣalamat tǝdi ad tagu tufat.» 20 Iga Amaɣlol awen s ǝmmǝk was t-imal. Dabayyakan-du zǝmzam ǝganen igǝt issiksadan, ǝkǝbben aɣaywan ǝn Firɣawna, ǝd nan ǝn maššaɣalan-net win zawwarnen, ǝlsan akal ǝn Masar ketnet, sakkararen-tu.
21 Isassaɣra-du Firɣawna Musa ǝd Harun inn-asan: «Agliwat agiwat šikutawen y Ǝmǝli-nawan daɣ akal da da.» 22 Mišan inn-as Musa: «Wǝr imǝkkan ad nag'adi, fǝlas, as nǝga šikutawen y Amaɣlol, Ǝmǝli-nana, ad ǝqqǝlnat isǝkyad i Kǝl-Masar. As tanat-nǝga ǝswadan daɣ-na, a danaɣ-anɣin ǝs tǝhun. 23 Kalar edag a za nakku as ewayan karad adan ǝn teklay daɣ taneray fǝl ad nagu šikutawen y Amaɣlol Ǝmǝli-nana ǝs tǝmǝwit ta dana-z-imǝl.» 24 Inn-asan Firɣawna: «Ǝnta ǝddi da! Oyyeq-qawan ad taglim tagim šikutawen y Ǝmǝli-nawan daɣ taneray, mišan ad wǝr tugagam wǝllen. Ǝmǝrǝdda ansǝyat-i Amaɣlol!». 25 Inn-as Musa: «Wǝllen z'as igda ad ǝgmǝda aɣaywan-nak ad ansǝya Amaɣlol. Tufat iyyanda ad za tammazzaya kay maššaɣalan-nak ǝd tamattay-nak ketnet d ǝlmǝssibat ta n zǝmzam. Igda a dana-wǝr-tǝlesaɣ ǝsǝrmǝg, tǝgdǝlaɣ-ana ad naglu nagu šikutawen y Ǝmǝli.» 26 Ifal Musa ehan ǝn Firɣawna, onsay-as Amaɣlol. 27 Tǝzzar iqbal Amaɣlol tǝwatray ǝn Musa. Aba fǝl Firɣawna ijan win den, ǝnta ǝd maššaɣalan-net win zawwarnen, ǝd tamattay-net. Wǝr d-iqqim iji waliyyan. 28 Mišan daɣ taklat ten da, igla ǝwǝl ǝn Firɣawna iɣfâl, igdal-asan ad aglin.