9
Alɣalamat ta n sǝmmosat: alwaba wa iggazan ihǝrwan
1 Inna Amaɣlol i Musa: «Aglu akku Firɣawna ann-as:Ǝnta da awa inna Amaɣlol, Ǝmǝli ǝn Ɣibritan: "Ayyu tamattay-nin ad taglu a di-tǝɣbǝd. 2 As tǝgle tugâya s a tan-tayya aglin, tǝgle tǝwaɣaq-qan, 3 nak Amaɣlol a d-amǝra tǝwǝrna sǝksǝdat ǝs hǝrwan-nak, gǝr ǝggǝsan, d ǝzdan, ǝd mǝnas, ǝd zǝrgan, d aharay-nak wa ǝndǝrran:a tan-iggǝz alwaba labasan. 4 Amaran ad ǝzlǝyaɣ ihǝrwan win Kǝl-Israyil ǝd win Kǝl-Masar: wala ɣas texsay iyyadda da wǝr za tammat daɣ maddanǝs n Israyil."» 5 Tǝzzar ikkas Amaɣlol alwaq y awen, inna: «Tufat ad ammazala s arat wa, fǝl akal ketnet.» 6 As affaw iga Amaɣlol arat wa imal den. Ǝmmutan hǝrwan kul win Kǝl-Masar, mišan Kǝl-Israyil wǝr daɣ-san immut wala texsay iyyadda.
7 Izammazal Firɣawna aytedan, ǝnayan-du as tidǝt daɣ as Kǝl-Israyil wǝr daɣ-san tǝmmut wala texsay iyyadda. Dǝr ig'awen da igdal Firɣawna i tamattay ad taglu fǝlas aɣafal a iga ǝwǝl-net.
Alɣalamat ta n sǝdisat: šiqqas labasnen
8 Inna Amaɣlol i Musa ǝd Harun: «Akkiwat isǝkkǝda tagim-du šikǝbǝtta n eẓǝd, inbǝs-tu Musa sa sǝr jǝnnawan dat šittawen ǝn Firɣawna. 9 Ad iqqǝl eẓǝd wen zun ǝgodrar a z'alsin Masar ketnet. Aytedan ǝd mudaran kul a tan-alsu, tǝzzar iqqǝl šimandaren tihǝdǝydǝynen taqqalnat šiqqas ǝzzurnen wǝllen.» 10 Idkal-du Musa ǝd Harun eẓǝd ɣur sǝkkǝda, ǝkkan dat Firɣawna. Inbas Musa eẓǝd wen sa sǝr jǝnnawan, iqqal awen y aytedan ǝd mudaran šimandaren tihǝdǝydǝynen taqqalnat šiqqas ǝzzurnen wǝllen. 11 Orna i massaxaran a d-ǝbdǝdan dat Musa, fǝlas ǝntanay da ǝgaznat-tan šiqqas šin da ahanen Kǝl-Masar ketnasan.
12 Eway-du Amaɣlol ǝs Firɣawna aɣafal n ǝwǝl ogaran wanad, igla wǝr iger tenbay daɣ awa inna Musa ǝd Harun, imos as awen da a inna Amaɣlol.
Alɣalamat ta n ǝssayat: idagrazan
13 Inna Amaɣlol i Musa: «Ǝnzǝy ǝs Firɣawna tannaɣ-as: Ǝnta da awa inna Amaɣlol, Ǝmǝli ǝn Ɣibritan: "Ayyu tamattay-nin ad taglu a di-tǝɣbǝd. 14 Daɣ taklat ta, a kay-in-ǝssukaɣ ǝnnuɣan ǝn tǝkmawen kul kay ǝd maššaɣalan-nak win zawwarnen ǝd tamattay-nak fǝl ad tǝssǝnaɣ as, wǝr tu-tǝlla tugdat-in. 15 Ǝnnar areɣ adi irǝw as kay-in-ǝssokaɣ alwaba, a za assabin tamayyamayt-nak fǝl amadal kay ǝd tamattay-nak. 16 Mišan oyyeq-qay tǝddara fǝl ad assakna tarna-nin, tagu masnat fǝl esǝm-in daɣ ǝddǝnet ketnet. 17 Kay tǝgle har harwada tǝgdâlaɣ i tamattay-nin ad taglu. 18 Alwaq a da tufat, a d-amǝraɣ akonak ǝn dagrazan ǝknanen tǝzzǝwwǝrt, ǝganen tallabǝst as kala wǝr tǝtawanay daɣ attarix ǝn Masar. 19 Ǝmǝrǝdda sǝɣbǝr eharay-nak d arat ketnet wa tǝleɣ iha ǝsuf. As wǝr iga adi aratan kul win ogaz akonak wen wǝr ahen aɣaywan, gǝr ihǝrwan wala aytedan, a tan ǝɣrǝdan dagrazan tenaɣay."» 20 Aytedan ǝn Firɣawna kul win din-ǝganen tenbay daɣ batu ta iga Amaɣlol den, ǝgan eklan-nasan ǝd hǝrwan-nasan daɣ ammas ǝn nan. 21 Win wǝr nǝga tenbay daɣ awen, oyyan-tan daɣ ǝsuf.
22 Inna Amaɣlol i Musa: «Ǝzzǝl ǝfus nak sa sǝr jǝnnawan, ad iffǝy akonak ǝn dagrazan fǝl Masar ketnet, gǝr za fǝl aytedan, wala imudaran, d ǝnnuɣ ǝn taddalǝt kul ta tǝhat akal.» 23 Izzal Musa tallaq-net sa sǝr jǝnnawan, tǝzzar omar-du Amaɣlol eggagan ǝd dagrazan, ǝffaynat teqqaɣen fǝl amadal. Iffay Amaɣlol idagrazan fǝl Masar ketnet. 24 Ǝmalan-tu dagrazan, ǝddewnen d eggagan saksodnen. Iga awen assahat as kala wǝr tǝtawanay daɣ attarix ǝn Masar. 25 Ǝlmǝssibat ta n dagrazan en, tǝnɣa aytedan ǝd mudaran kul win din-ogaz daɣ ǝsuf. Tǝttǝftaf yel, tǝddǝgdag eškan. 26 Wǝr iɣles ar amadal wa n Gošen ɣas s ǝnta a han maddanǝs n Israyil.
27 Isassaɣra-du Firɣawna Musa ǝd Harun inn-asan: «Daɣ taklat ta, ǝssanaɣ as nak ilan lahan. Amaɣlol ǝnta a itamazalan tidǝt, nak ǝd tamattay-nin a iwar lahan. 28 Ansǝyat Amaɣlol ad izǝzzǝkkǝt eggagan win labasnen en ǝd dagrazan. Ǝddi a kawan-ayya taglim, wǝr za tǝlǝsam ǝtǝwǝɣ.» 29 Inna Musa: «As ǝgmadaɣ aɣrǝm ad ǝzzǝlaɣ ifassan, ǝttǝra s Amaɣlol. Ǝddi ad azzakkat akonak wa n dagrazan, irǝz abarazrez wa n eggagan fǝl ad tǝssǝnaɣ as, Amaɣlol ǝnta a ilan ǝddǝnet. 30 Mišan ǝssânaɣ as, kay ǝd maššaɣalan-nak ad taglim harwada wǝr tǝksudam Amaɣlol, Ǝmǝli.»
31 Akonak wa n dagrazan a, iɣrad ahluk ǝn lin imosan annabat iyyan wǝr nǝmos kada daɣ tǝtaggu tǝbdoq, ihlak deɣ ǝššǝɣir, fǝlas lin itaggu šijigawen daɣ azzaman win den, amaran ǝššǝɣir itaggu šiɣaɣanen. 32 Mišan ǝššin ǝzzǝnǝfan n alkamatan wiyyad tahaginen wǝr ewedan, ǝntanay wǝr tan-igrew wala.
33 Ifal Musa aɣaywan ǝn Firɣawna. As igmad aɣrǝm, izzal ifassan-net ittar s Amaɣlol. Ǝrazan eggagan ǝd dagrazan, iraz akonak. 34 As inay Firɣawna as akonak ǝd dagrazan d abarazrez n eggagan ǝzzǝkken, igla iššokal daɣ tišit n ǝnǝmmezrǝy n Amaɣlol, isannahal ǝwǝl-net aɣafal ǝnta ǝd maššaɣalan-net win zawwarnen. 35 Igla ǝwǝl ǝn Firɣawna iɣfal, igdal i maddanǝs Israyil ad aglin. Imos as awen da a inna Amaɣlol i Musa.