10
Alɣalamat ta n ǝttamat: ǝlmǝssibat ta n ǝjwalan
1 Dǝffǝr awen inna Amaɣlol i Musa: «Aglu akku Firɣawna fǝlas aɣafal wa iga ǝwǝl-net den ǝnta ǝd maššaɣalan-net nak a das-t-isassagan fǝl a dat-ǝs agaɣ alɣalamaten-in ǝmosnen tǝlmǝɣjujaten. 2 Ǝgeɣ awen harwa fǝl ad tǝmǝlaɣ i bararan-nak ǝd hayawan-nak awa ǝgeɣ i Kǝl-Masar ǝd tǝlmǝɣjujaten šin daɣ-san ǝmmozala. Ǝmmǝk a daɣ as za tǝssǝnam as, nak a imosan Amaɣlol.» 3 Ikka Musa ǝd Harun Firɣawna ǝnnan-as: «Arat da wa inna Amaɣlol, Ǝmǝli ǝn Ɣibritan: «Har ǝmmay tugaya s ad tǝssǝrǝsaɣ iman-nak dat-i? Ayyu tamattay-nin ad taglu a di-tǝɣbǝd. 4 As tugaya s a tat-tayya, tufat harwa aɣôra din-z-assagla ajwal akkabbat akal-nak. 5 Ajwal wen ad alsu akal-nak ketnet har ib'as itawahannay amadal, atšu aratan kul win d ǝragnen daɣ dagrazan, d awa d-iqqiman dalat daɣ eškan ǝn saffan-nawan. 6 Idnǝy ehan-nak, ǝd nan ǝn maššaɣalan-nak win zawwarnen ǝd nan ǝn Kǝl-Masar ketnasan. Wǝr kala ad ǝnayan marwan-nak wala aljadan-nak arat olan ǝd wen, a d-ibazan ɣur tizart-nasan y akal wa har ǝzǝl wa.» Den da ad imalallay Musa fǝl Firɣawna, ifal aɣaywan-net.
7 Ǝnnan Maššaɣalan win zawwarnen i Firɣawna: «Har ǝmmay itakkas daɣ-naɣ awedan a tǝlǝmmest? Ayyu aytedan win ad aglin, ǝɣbǝdan Amaɣlol, Ǝmǝli-nasan. Awak harwada wǝr toggeɣ as Masar tǝbuk y ǝbǝrǝjji?» 8 Itawaɣra-du Musa ǝd Harun ǝs Firɣawna, inn-asan: «Agliwat tǝɣbǝdam Amaɣlol Ǝmǝli-nawan. Mišan ǝmǝlat-i daɣ-wan win z'aglinen.» 9 Inn-as Musa: «Ketnana as za naglu, gǝr meddan ǝd tǝdoden, d ǝɣmaran, ǝd bararan d aharay-nana wa ǝndarran, ǝd wa zǝwwǝran:fǝlas amud zǝwwǝran as nǝra igi-net y Amaɣlol.» 10 Inn-as Firɣawna ǝs tǝkatemt: «Wǝr z'ǝssǝna ya as iddew dǝr-wan Amaɣlol iket wǝr kawan-oyye tidawam ǝd bararan-nawan! Illikan as tǝnsâm fǝl ark arat iyyan. 11 Wǝr z'agu adi s ǝmmǝk di. Aglinet meddan ɣas, ǝɣbǝdan Amaɣlol, fǝlas adi da daɣ-i tǝgammayam.» Dǝffǝr batu ten tawastaɣan ɣur ahan ǝn Firɣawna.
12 Inna Amaɣlol i Musa:Ǝzzǝl ǝfus-nak dǝnnǝg Masar fǝl a sǝr-ǝs du-tamǝraɣ ajwal. Inbǝzet ajwal wen akal ǝn Masar ketnet, tǝzzar iɣrǝd taddalǝt kul ta du-tǝragat daɣ akonak wa n dagrazan. 13 Izzal Musa tallaq-net dǝnnǝg Masar, tǝzzar omar-du Amaɣlol aḍu a d-ihan sa sǝr dǝnnǝg, ikla igâr ǝzǝl wen d ahad wen. As affaw aɣora, da eway-du aḍu wen ajwal. 14 Iɣrad ajwal wen ketnet aɣasar fǝl Masar, ikkǝbbat akal ketnet. Tallabǝst n ǝlmǝssibat ta n ajwal en, wǝr kala ad tǝtawanay tulat-net amaran wǝr ilkem deɣ ad tǝlas tǝtǝwǝnay. 15 Ikkǝbbat ajwal akal ketnet iqqal šiyyay fǝl amadal. Itša taddalǝt ketnet, d aratan n eškan kul win d-ǝragnen daɣ akonak wa n dagrazan. Ab'as d-iqqim a imosan taddalǝt fǝl eškan wala daɣ mǝssǝdan n akal ǝn Masar ketnet.
16 Isassaɣra-du Firɣawna Musa ǝd Harun tarmad, inn-asan: «Ǝgeɣ abakkad dat Amaɣlol, kawanay deɣ ǝbbikkadaq-qawan. 17 Ǝmǝrǝdda are daɣ-ak, a di-tǝggǝda ta n azala ɣas. Ansǝyat Amaɣlol, Ǝmǝli-nawan a di-issǝgagan ǝlmǝssibat ta du-tǝtawayat tamattant a.» 18 Ifal Musa aɣaywan ǝn Firɣawna, onsay Amaɣlol. 19 Isammattay Amaɣlol aḍu wa n dǝnnǝg, ig-ay aḍu n ataram issohen wǝllen ibat ajwal wen iɣrad-tu agadal daɣ agarew was itawannu wa n Telant. Ab'as d-iqqim ajwal waliyyan daɣ akal ǝn Masar ketnet. 20 Mišan isaggarmam Amaɣlol ǝwǝl ǝn Firɣawna, igdal i maddanǝs n Israyil ad aglin.
Alɣalamat ta n tazayat: karad adan ǝn šiyyay
21 Inna Amaɣlol i Musa: «Ǝzzǝl ǝfus-nak sa sǝr jǝnnawan ad alsinat šiyyay Masar har aqqamin aytedan ǝšɣalan s adez.» 22 Izzal Musa ǝfus-net sa sǝr jǝnnawan, tǝzzar ǝganat šiyyay fǝl Masar ketnet a daɣ wǝr ihǝnnǝy awedan wala adad-net har ǝganat karad adan. 23 Daɣ karad adan win den, wǝr t-illa awedan ihannayan wa hadan, wala i igammadan edag-net. Mišan as itaggu' awen inan win maddanǝs n Israyil, ih-en ǝnnur. 24 Isassaɣra-du Firɣawna Musa ǝd Harun, inn-asan: «Agliwat ǝɣbǝdat Amaɣlol. Idawat ǝd bararan-nawan. Eharay-nawan wa ǝndarran ǝd wa zǝwwǝran ɣas a du-z-aqqaminen.» 25 Inn-as Musa: «Adi za mas z'agu? Daɣ adi kay iman-nak as dana-za-takfaɣ eharay wa za nagu šikutawen šin tirǝkǝmmitnen ǝd tǝkutawen šin hadatnen y Amaɣlol, Ǝmǝli-nana? 26 Kala kalar awa nǝla daɣ aharay kul as dǝr-ǝs za naglu. Wǝr daɣ-as du-z-aqqam wala eɣayd daɣ akal wa, fǝlas eharay-nana daɣ za nǝsǝnnǝfrǝn šinagzamen šin za nagu y Amaɣlol, Ǝmǝli-nana. Iket wǝr newed edag wen, wǝr za nǝssǝn arat wa za nǝkǝt.» 27 Mišan isaggarmam Amaɣlol ǝwǝl ǝn Firɣawna, igdal i Kǝl-Israyil ad aglin. 28 Inna Firɣawna i Musa: «Ugag-i, tǝnkǝdaɣ ǝd man-nak! A kay wǝr ǝlǝsaɣ anay dat-i! Fǝlas ǝzǝl wa di-du-tǝlasa tewaɣlay, a kay-iba.» 29 Inn-as Musa: «Kud ira wǝr tǝnneɣ adi, fǝlas wǝr ilkem ad ǝlasa tebadday dat-ǝk!»