11
Ǝtǝmǝl n alɣalamat ta n marawat
1 Inna Amaɣlol i Musa: «A du-zǝzzǝbbeɣ alwaba iyyan s ǝnta wa n tǝzǝrǝst ǝs Firɣawna ǝd Kǝl-Masar. Dǝffǝr adi, a kawan-ayyu taglim, fadda a kawan-istǝɣ daɣ akal-net šiyyat. 2 Aglu daɣ adi tannaɣ i tamattay n Israyil: "Ǝkkullu n alǝs ansǝyet amahharag-net, tantut deɣ kul tansǝyet tǝmahharak-net aratan win ǝganen daɣ urǝɣ ǝd win ǝganen daɣ ǝzrǝf."» 3 Tǝzzar eway-du Amaɣlol ǝs Kǝl-Masar igi n udǝm i Kǝl-Israyil; Musa iman-net igraw ǝtǝwǝsǝɣmar aggen ɣur maššaɣalan win zawwarnen ǝn Firɣawna d aytedan. 4 Dat afel ǝn Musa aɣaywan ǝn Firɣawna, inn-as Musa: «Arat da wa inna Amaɣlol: "As ig'adawannay n ahad, ad ǝssǝwǝlaɣ ǝd Masar. 5 Iɣǝfǝdda kul win akal a, a tan-iba, a obazan ɣur aɣafadday nak wa z'ikkusen taɣmar-nak, ikka-du aɣafadday ǝn tǝklit ta n ǝlǝqqam-nasnat, har aɣafadday kul daɣ aharay. 6 Ad aginat tǝkurayen daɣ akal ǝn Masar ketnet as wǝr kala tǝtawanay tulat-nasnat, za wǝr ilkem ad ǝlasnat ǝtǝwǝnay. 7 Mišan maddanǝs n Israyil idi da wǝr daɣ-as ihhǝrnan awedan wala texsay". As ig'adi ad tǝssǝnam as, Amaɣlol izlay gǝr Kǝl-Masar ǝd Kǝl-Israyil. 8 Ǝddi ǝljǝmaɣat-nak kul ta kay tǝɣlayat, a di-d-asin ǝssǝjǝdan ɣur daran-in, a di-tansayan gannin-i: "Ǝfǝl-ana kay ǝd tamattay kul ta dak-tǝlkamat". Dǝffǝr adi illikan as ad agla.» Tǝzzar ifal Musa ehan ǝn Firɣawna ih-ay alham labasan. 9 Dat awen a das-imal Amaɣlol, inn-as: «Firɣawna wǝr dawan-z-aslu fǝl ad aga daɣ Masar tǝlmǝɣjujaten-in.» 10 Iga Musa ǝd Harun tǝlmǝɣjujaten šin den kul dat Firɣawna. Mišan isaggarmam Amaɣlol ǝwǝl-net, ugay s ad ayyu maddanǝs n Israyil ǝgmǝdan akal-net Masar.