12
Ǝlǝsǝl n ǝmud wa n Akkay
1 Iššewal Amaɣlol i Musa ǝd Harun inn-asan: 2 «Tallit ta, ǝnta a za tagim tallit ta tazzarat daɣ awatay. 3 Agiwat i tamattay n Israyil ketnet ammaran win:As iga ǝzǝl wa n maraw daɣ tǝllit ta, ehan kul, made aɣaywan kul, obâz-du amaswatay n ayfad madeɣ wǝlli. 4 As imos as, ill-ay ahan as wǝr ǝggǝtan aytedan-net, wǝr ǝfregan teṭṭay n ajaɣol ɣas-nasan, ǝddi ad ǝrtǝyan d ahan wa dǝr ǝhhǝragan daɣ ewal awen s ǝket n aytedan. As ǝssanan awa igdan y awedan ketnet, sǝnnǝfrǝnan amaran ajaɣol madeɣ aynǝs. 5 Ǝbǝzat-du ajaɣol made aynǝs n amaswatay wǝr nǝga ǝlɣib. 6 Tǝqqǝnam-tu har ǝzǝl wa n maraw d ǝkkoz daɣ tǝllit. As d-ewad ǝzǝl wǝdi, ehan ketnet madeɣ aɣaywan ketnet daɣ tamattay igzâm texsay tǝdi ɣur agadal ǝn tǝfuk. 7 Ǝdkǝlat arat daɣ ǝzni-nasan, tǝrgǝnam-tu i tǝfasast ta n afalla ǝn tǝsǝhar ǝn nan win daɣ z'ammatšin ṣan-nasan, tǝssǝlǝlam-tu tolas i tǝfasasen šin tamawen-nasnat. 8 Saŋŋiwat-tan ǝs tarenay, tatšim-tan ahad wǝdi da ǝntanay ǝd tǝgǝlla ta wǝr iha xamira, ǝd yel sǝmǝman. 9 A daɣ-san wǝr tatšim a wǝr nǝkkǝsaw ǝs tanaŋŋay wala iyyan iŋŋan s aman. Texsay ta ketnet ad tǝqqǝl tarenay, tǝddew d aɣaf-net, ǝd daran-net, ǝd kǝrukǝrawan-net. 10 A daɣ-as wǝr tassansim wala i tufat. As daɣ-as d-iqqim arat tǝsǝrrǝkǝmmem-tu. 11 Agiwat-as teṭṭay tǝtrabat daɣ tǝsimatagam i teklay, tǝsasam isutab-nawan daɣ tǝgǝzwen-nawan, tǝsasam iɣateman-nawan daɣ daran-nawan, tǝttafam tallaɣen-nawan daɣ fassan. Imos awen tǝnagzamt ta n Akkay, tǝtiwaggat fǝl ǝdkul-in nak Amaɣlol. 12 Ad ǝssǝwǝla d akal ǝn Masar ahad wǝdi, anɣaɣ id illa aɣafadday ketnet gǝr za in aytedan wala ihǝrwan. Ǝmmǝk di daɣ as z'ammazalaɣ ǝššǝriɣa-nin fǝl ǝssǝnǝman kul win Masar, nak a imosan Amaɣlol. 13 Azni wa iwaran šisǝhar ad iqqǝl asannal fǝl nan win tǝham; ad ǝnǝyaɣ azni wen, akiyaɣ dǝnnǝg-wan. Ǝddi a kawan iɣlǝy alwaba wa n ǝmahlak as ǝwwǝddaba Masar. 14 Daɣ tǝzzǝgrǝt n ǝddǝnet, i d-iɣlay ǝzǝl wa, tagim amud imosan adkul n Amaɣlol. Amud wa ad iqqǝl arat itaggu'ǝzzurrǝyya-nawan har faw.
15 Ǝssa adan a za tagim tǝtattim šigǝlwen wǝr iha arat wa isakafan. As iga ǝzǝl wa azzaran, tǝkkǝsam arat wa isakafan en daɣ nan-nawan. As itša awedan tagǝlla iha arat wa isakafan gǝr ǝzǝl wa azzaran ǝd wa n ǝssa, ad itǝwǝstǝɣ daɣ Kǝl-Israyil. 16 Iddawat tǝɣbǝdam Amaɣlol ǝzǝl wa azzaran ǝd wa n ǝssa. Daɣ adan win ǝššin en, ad wǝr tagim ǝššǝɣǝl waliyyan ar igi ǝn sǝssuda-nawan. 17 Ǝssa adan win tattay ǝn tǝgǝlwen wǝr nǝkuf, agiwat-tan amud imosan isaktan n ǝzǝl wa daɣ d-ǝkkasa tawšeten-nawan daɣ Masar ǝs tǝmǝwit tǝnnizzamat. Taktim ǝzǝl wǝdi, tagim amud wǝdi alɣadat as za tǝlkǝmam kawanay d ǝzzurrǝyya-nawan daɣ tǝzzǝgrǝt n ǝddǝnet. 18 Daɣ awa ibazan ɣur takǝst n ǝzǝl wa n maraw d ǝkkoz ǝn tǝllit ta tazzarat har takǝst n ǝzǝl-net wa n sanatat tǝmǝrwen d iyyan, tattiwat tagǝlla wǝr iha xamira. 19 Ǝssa adan win di, a daɣ-san wǝr itǝwǝnǝy wala ǝdǝriz n xamira ǝn tǝgǝlla daɣ nan-nawan. Awedan ketnet wa itšan tagǝlla iha xamira, ad itǝwǝstǝɣ daɣ tamattay n Israyil gǝr za imos ǝnaftaɣ a daɣ-wan iɣsaran, wala iyyan daɣ-wan. 20 Daɣ adi adan win, ad wǝr tatšim a imosan amensay iha xamira. Taggat adi da daɣ adag kul wa tǝggazam.»
21 Iššedaw-du Musa iɣmaran win ǝmosnen šigǝttawen ǝn Kǝl-Israyil ketnasan inn-asan: «Agliwat, ehan-kul igraw-du ajaɣol madeɣ aynǝs. Ajaɣol madeɣ aynǝs wen ad attarmas igzǝm, iqqǝl tǝnagzamt ta n Akkay. 22 Itǝwǝsǝgdǝlet-d'ǝzni-net daɣ ǝɣlal. Dǝffǝr awen tǝnkǝdam-du tǝkǝbǝzzet ǝn tǝzawen ǝn yel iyyan igan esǝm xisof a tat-tǝsalmaɣam daɣ ǝɣlal iha ǝzni ǝn texsay ten tǝragganam-tu y afalla ǝn tǝsǝhar ǝn nan-nawan ǝd tamawen-nasnat. A obazan ɣur amazay wǝdi, a tu-wǝr-imǝl awedan a d-ilasan agamad n ahan-net iket wǝr affaw. 23 Amaɣlol ad issǝwǝl Masar ketnet y a tat-awwaddab s ǝssǝbab n ǝmahlak. As inay azni fǝl tamawen ǝn tǝsǝhar ǝn nan-nawan d afalla-nasnat, ad akǝy dǝnnǝg mawan ǝn nan-nawan, igdǝl y ǝmahlak wen iguz ǝn nan-nawan ammazal daɣ-san tǝkma, 24 Ǝššǝrǝdan win, agiwat-tan fǝrǝd kawanay d ǝzzurrǝyya-nawan har faw. 25 As tewadam akal wa kawan-z-akfu Amaɣlol s ǝmmǝk was iga arkawal n adi, tagim amud wen. 26 As kawan-ǝssǝstanan bararan-nawan d almaɣna n ǝmud wa, tannim-asan: 27 "Awa tǝnagzamt ta n amud wa n Akkay imosan adkul n Amaɣlol, fǝlas akkay a iga dǝnnǝg nan ǝn maddanǝs n Israyil daɣ Masar, assaɣa wa ad iwwǝddab Masar, iɣlas iɣawnatan win-nana."» As iɣrad Musa awal wen ǝɣradan ǝɣmaran ǝn tamattay ǝsǝjǝd. 28 Ǝssoɣalan awen i maddanǝs n Israyil ǝmmozalan ketnasan s arat kul was omar Amaɣlol Musa ǝd Harun.
Alɣalamat ta n marawat: tǝmattant ǝn ɣǝfǝdda daɣ Kǝl-Masar
29 As iga ahad idlas Amaɣlol id illa aɣafadday ketnet daɣ Masar, a d-ibazan ɣur wa n Firɣawna s ǝnta a z'ikkusen taɣmar, ikka wa n amaskasaw a iɣfalan, har aɣafadday daɣ hǝrwan. 30 Ahad wen inkar-du Firɣawna ǝnta d ǝljǝmaɣat-net ketnasan ǝd Kǝl-Masar kul. Ǝganat tǝkurayen zawwarnen daɣ Masar ketnet fǝlas wǝr t-illa ahan a daɣ wǝr aba awedan. 31 Adawannay n ahad as d-isassaɣra Firɣawna Musa ǝd Harun inn-asan: «Tarmad ugagat-i! Ǝfǝlat akal-nana, kawanay d aytedan-nawan kul. Aglat, agat awa tǝgammayam a t-imosan igi ǝn tǝnagzamen y Amaɣlol! 32 Amaran ǝmmǝrat eharay-nawan wa zǝwwǝran ǝd wa dǝrran, awa daɣ-i tǝgmayam, tugagam-i, mišan tansǝyam-in Ǝmǝli-nawan a di-ikfan albaraka nak da.»
33 Sammadardaran Kǝl-Masar tamattay n Israyil wǝllen fǝl a dasan-tǝgmǝd akal-nasan fǝlas ǝnnan: «As wǝr ǝglen tarmad ketnana a danaɣ-iba!» 34 Teway tamattay igelan-net win tǝgǝlla ǝrwaynen da wǝr ǝkufan harwa, ǝharan-tan daɣ kassan win araway ǝgan-tan daɣ tǝkadkaden-nasan, tǝzzar ǝssǝwaran-tan izeran-nasan. 35 As iga awen da maddanǝs n Israyil ǝlkâman y ammaran win dasan-iga Musa, ǝmosnen as dasan-inna ad ǝgmǝyan daɣ Kǝl-Masar aratan win ǝganen daɣ urǝɣ ǝd win ǝganen daɣ ǝzrǝf, ǝd tǝbǝddaɣ. 36 Ǝkfan-tan Kǝl-Masar arat ketnet wa daɣ-san ǝgmayan, fǝlas Ǝmǝli a tan-ikfan ǝnniɣmat daɣ-san. Ǝmmǝk en daɣ as zammazzayan Kǝl-Masar d ǝrrǝzǝɣan-nasan.
Agamad ǝn Masar
37 Ǝfalan maddanǝs n Israyil Ramses, ǝgan anamod ǝn Sukkot. Ǝmosan edag ǝn sǝdisat tǝmad n ǝgim n alǝs, as wǝr ahenat tǝdoden ǝd bararan d ǝɣmaran. 38 Ǝzzirgazan tolas eharay isinnahalan igǝt gǝr wa zǝwwǝran ǝd wa ǝndarran. Tǝlkam-asan tǝxlǝk tǝgat daɣ ǝnnuɣan n aytedan. 39 Fǝl ǝddǝlil n ǝtǝwǝstaɣ wa dasan-itawaggan ǝrroradan, wǝr sammatagan allawtan-nasan win tarrayt. Wǝr ewayan ar egel wa daɣ tǝtaggu tǝgǝlla, irwayan mišan wǝr ikuf harwada. Tǝzzar a daɣ-as taggin masatan da wǝr ikuf. 40 Maddanǝs n Israyil ǝkkozat tǝmad n awatay ǝd karadat tǝmǝrwen a gan daɣ Masar. 41 Ǝzǝl iman-net wad ǝndanat ǝkkozat tǝmad n awatay ǝd karadat tǝmǝrwen šin den, ǝnta ad tǝɣrad tamattay n Ǝmǝli ketnet agamad ǝn Masar ǝs tǝmǝwit tǝnnizzamat. 42 Dad zamas ahad wen issan daɣ-san Amaɣlol har tan-ikkas daɣ Masar, ahad wen ad itǝwǝskǝt y Amaɣlol, iqqǝl ahad n iba n etǝs i maddanǝs n Israyil d ǝzzurrǝyya-nasan.
Aytedan win ǝlanen turagat n iguz n ǝmud wa n Akkay
43 Ilas Amaɣlol inna i Musa ǝd Harun: «Ǝššǝrǝdan da win ǝqqalnen amensay wa n ǝmud wa n Akkay: a tu-wǝr-atšu awedan wǝr nǝmos iyyan daɣ-wan. 44 Akli a d-inzan azrǝf, as immǝnkad, ad ilu turagat ǝn tattay ǝn mensewan n ǝmud wa. 45 Ǝnaftaɣ wǝr nǝɣser, madeɣ ǝnaɣfir, wǝdi wǝr ila tugarat n ad ammagnat i mensewan win. 46 Ǝkkullu n ajaɣol ad ammatšu daɣ ammas n ahan. Wǝr tu-tǝlla tablalt ǝn ṣan a za tǝgmǝdat ehan, wala tawarzin ɣasan ǝn tǝnagzamt ten. 47 Tamattay n Israyil ketnet ad tǝmmud amud wa n Akkay. 48 Awedan wa n ǝnaftaɣ iɣsaran, as ira ad immud amud wen fǝl ǝdkul n Ǝmǝli, kundaba immǝnkad ǝnta ǝd yayyan kul win ahanen aɣaywan-net. Ǝddi ad ilu turagat ta da ǝlan Kǝl-Israyil daɣ batu n ǝmud wa n Akkay iqqǝl deɣ iyyan daɣ-san. Fǝlas wǝr t-illa awedan wǝr nǝmmǝnkad ilan turagat n ǝmǝgni y ǝmud wa n Akkay. 49 Ǝššǝriɣa iyyanda a tu-z-imǝlan išišalan Kǝl-Israyil ǝd ɣǝrab win dǝr-san namaxsarnen.» 50 Ǝlkaman maddanǝs n Israyil ketnasan y awa inna Amaɣlol i Musa ǝd Harun. 51 Ǝzǝl wen da iman-net a daɣ d-ikkas Amaɣlol tamattay n Israyil daɣ Masar ǝs tǝmǝwit tǝnnizzamat.