13
Ammaran win iga Mǝššina i Musa daɣ batu n Akkay, ǝd ɣǝfǝdda
1 Inna Amaɣlol i Musa: 2 «Sǝwǝr-i aganna aɣafadday ketnet wa du-z-ihǝwan daɣ maddanǝs n Israyil; gǝr imos awedan wala imos texsay i-nu.» 3 Inna Musa i tamattay: «Kattiwat ǝzǝl wa daɣ tǝgmadam akal wa daɣ tǝmosam eklan, a t-imosan Masar, fǝlas tarna as kawan-d-ikkas daɣ-as Amaɣlol. Ad wǝr tǝtattim šigǝlwen šin iha xamira daɣ adan n ǝmud wǝdi. 4 Azalada ǝnta a imosan ǝzǝl wa daɣ tǝgmadam Masar, imosan ǝzǝl wa azzaran daɣ awatay. (note: Tallit ta tazzarat daɣ awatay as itawannu Abib.)
5 As kawan eway Amaɣlol s akal wa n Kananitatan, ǝd Xiwitatan, d Amoritatan, Ɣifatan, ǝd Yebusatan, imosan akal s ǝnta as iga arkawal i marawan-nawan as a dawan-t-akfu, ǝhanat-tu tǝsǝssǝngay n ǝx ǝd turawat, ad tǝtaggim amud wa daɣ tǝllit ta da. 6 Ǝssa adan a za tagim tǝtattim tagǝlla wǝr iha xamira, amaran ǝzǝl wa n ǝssa tagim amud y ǝdkul n Amaɣlol. 7 Daɣ ǝssa adan win den, tattiwat tagǝlla wǝr nǝkuf ɣas, ad wǝr tǝtǝwǝnǝy tǝgǝlla tǝkufat, wala xamira daɣ akal kul wa tǝham. 8 Daɣ adan win di susǝnat bararan-nawan almaɣna n ǝmud wa. Annat-asan: "Aratan win nǝtagg-en ǝmosan isaktan n awa danaɣ-ikna Amaɣlol ɣur ikus wa dana-d-iga daɣ Masar." 9 Amaɣlol ǝnta a kawan-d-ikkasan daɣ Masar ǝs tarna-net. Adi a fǝl za tagim aratan win isaktan. Ǝqqǝlanet zun ejwăl iwaran ifassan-nawan, ǝd tǝzǝzdǝyt tǝwarat šikannaren-nawan. Iqqǝlet deɣ ǝššǝriɣa n Amaɣlol, arat as ǝgânat takkayen-nawan. 10 Awatay kul tǝmmodam amud wen, a daɣ tǝlkamam y ǝššǝrǝdan-net kul.» 11 Ilas Musa inn-asan: «As kawan-eway Amaɣlol s akal ǝn Kanan ikf-awan-tu, imos as awen daɣ a ihad y aljadan-nawan, ǝd kawanay iman-nawan, 12 aɣafadday ketnet, gǝr za wa n aytedan wala wa n aharay, ad ǝskǝtan y Amaɣlol. 13 Aɣafadday wa n ǝzdan, iwar-kawan ikus-net s ajaɣol. As tu-wǝr-illa adi, tarzim iri-net ad axsǝy. Aɣafadday kul wa n aytedan ǝnta da itǝwǝkkǝs s arat iyyan. 14 As kawan-ǝssǝstanan bararan-nawan ǝnnan-awan: "Ma imos almaɣna n arat wa?" tannim-asan "Tarna Amaɣlol as dana-d-ikkas daɣ Masar a daɣ nǝmos eklan. 15 Fǝlas, as dana-igdal Firɣawna ad naglu, inɣa Amaɣlol aɣafadday ketnet daɣ Masar, gǝr imos in aytedan wala in aharay. Ǝddǝlil wen daɣ a fǝlas iɣǝfǝdda-nana win yayyan daɣ aharay nǝtagg-en šinagzamen, amaran nǝtakkas iɣǝfǝdda daɣ bararan-nana s arat iyyan". 16 Alɣadat ta, a dawan-tǝqqǝl zun ajwăl iwaran fassan-nawan, tǝqqǝlet zun tǝzǝzdǝyt fǝl tǝkannaren-nawan, imos awen isaktan n ikus wa dawan-d-iga Amaɣlol daɣ Masar ǝs tarna-net.»
Ǝmǝtǝkwǝy ǝn Kǝl-Israyil ɣur Masar har agaraw wa n Telant
17 Assaɣa wa ad oyya Firɣawna Kǝl-Israyil ǝglan, issǝɣlay-tan Mǝššina tarrayt ta n akal ǝn Filistinatan, kuddeɣ as ǝnta a gǝzzulat, fǝlas inna: «A igan da a dasan-ǝnkǝran mǝgiran, awǝy-du sǝr-san awen aɣšud n ǝnnǝyaten, tǝzzar ammagrazan agamad wa d-ǝgan i Masar.» 18 Awen da fǝl tan-isassaga Mǝššina ɣallew, ewayan tarrayt ta n taneray, ǝdagan sa sǝr agaraw wa n Telant. Maddanǝs n Israyil sinahalan ǝsǝmmutǝg kuddeɣ y ǝmǝgǝr, assaɣa wa daɣ d-ǝgmadan Masar.
19 As ǝglan eway Musa iɣasan ǝn Yusǝf fǝlas Yusǝf a iqqanan daɣ maddanǝs n Israyil arkawal inn-asan: «A igan da ilkam ad aknu Mǝššina taɣara-nawan, as ig'adi, tǝmmǝram iɣasan-in, tǝssǝgǝgam-tan y adag wa.»
20 Ǝggǝlen daɣ Sokot, ǝzzǝbben Etam daɣ tama n taneray. 21 Azzar-asan Amaɣlol. S azal za iha alallag n ǝhu iɣtan dat-san fǝl a tan-izǝzzǝlulǝɣ daɣ tarrayt, ehad amaran iha alallag ǝn temsay iɣtan dat-san fǝl a tan-isǝmmǝlǝwlǝw y ad ǝššikǝlan ehad ezal. 22 Alallag wa n ǝhu a, wǝr iffil dat tamattay iket iga azal, za wǝr dat-san iffil alallag wa n temsay iket iga ahad.