14
Iguz ǝn Kǝl-Masar ǝdǝriz ǝn Kǝl-Israyil d aɣaras ǝn Kǝl-Israyil agaraw wa n Telant
1 Iššewal Amaɣlol i Musa inn-as: 2 «Annu i maddanǝs n Israyil, kurǝtat har tazzabbem dagma ǝn torgit ta n Fi-Hahirot, gǝr tǝɣrǝmt ǝn sojitan tǝgat Migdol d agaraw. Tǝkrǝsam ihǝktan-nawan daɣ tǝnǝmiwǝla ǝn tǝɣrǝmt tǝgât Bal-Ǝstefon daɣ tǝgadamayt n agaraw. 3 Ad imǝl ɣur Firɣawna as maddanǝs n Israyil ǝxrakan daɣ akal, tǝwwǝɣwaq-qan-du taneray. 4 Ad d-awǝya aɣafal n ǝwǝl ǝs Firɣawna, iggǝz ǝdǝriz-nawan, mišan ad tattaddu tarna-nin s ǝhluk wa tu-z-aga ǝnta d agan-net kul, tǝzzar ǝssǝnan Kǝl-Masar as, nak a imosan Amaɣlol.» Ǝgan Kǝl-Israyil awen da dasan-itawannan den.
5 Igraw ǝmǝnokal ǝn Masar isalan n as, Kǝl-Israyil ǝddǝrragan. Tǝzzar immǝgraz Firɣawna tanat-net dǝffǝr a igan, ǝnta d ǝljǝmaɣat-net, ǝnnan: «Nakkanay a ma nǝga da? Noyya Kǝl-Israyil ǝglan, daɣ adi nǝɣrad ǝd tǝla n eklan!» 6 Awen daɣ a fǝl issoɣan Firɣawna amalankay-net wa n ǝmǝgǝr daɣ ays imatakway ǝnta d agan-net. 7 Iššedaw-du amalankaytan n ǝmǝgǝr kul win tǝla Masar, harkid sǝdisat tǝmad n amalankay win tǝnfrǝnt, ǝkkullu n iyyan daɣ-san ih-ay ǝmaway n agan. 8 Isaggarmam Amaɣlol ǝwǝl ǝn Firɣawna wa n ǝmǝnokal ǝn Masar, tǝzzar iggaz ǝdǝriz ǝn maddanǝs n Israyil ǝganen i Masar agamad igân ǝs taholat.
9 Ǝlkaman-asan Kǝl-Masar, har fall-asan oggan ǝkrasan daɣ tǝgadamayt n agaraw. Awa ila Firɣawna daɣ gǝnan kul gǝr amalankaytan, d ǝggǝsan win tan-ǝlwaynen, ǝd mawanan-nasan, d awa tǝla Masar daɣ tǝɣurad kul. Awen ketnet as d-ogga fǝl maddanǝs n Israyil dagma ǝn Fi-Hahirot, imosan edag inimaswadan ǝd Bal-Ǝstefon. 10 Igla Firɣawna itihaz-tan-in. Ǝswadan-in maddanǝs n Israyil. Ma oggan za, ar Kǝl-Masar a tan d-ǝzaynen daɣ igǝg. Tǝggaz-tan tasa labasat ǝgan tǝkurayt zǝwwǝrat fǝl Amaɣlol. 11 Tǝzzar malallayan-in Musa ǝnnan-as: «Ak iba n id nǝnbal a igan daɣ Masar? Mafel as dana-du-tewaya y a danaɣ-iba daɣ taneray a? Mǝni-tu awa fǝl dana-tǝgeɣ ǝmazal wa n as dana-du-tǝkkasa daɣ Masar? 12 Wǝrge harwa da nǝlla sen as dak-nǝnna: "Ayy-ana da nǝdrar, nǝmos eklan ǝn Kǝl-Masar!", fǝlas of-anaɣ adi ad nǝɣrǝd tǝmattant daɣ taneray a.» 13 Inn-asan Musa: «A kawan-wǝr-tǝggǝz tasa. Ǝdrǝrat daɣ adag wa da tǝham da, ad tǝnǝyam ǝmmǝk was kawan-z-assafsu Amaɣlol azalada! Fǝlas Kǝl-Masar win tǝhannayam den ǝmǝrǝdda, wǝr ilkem a tan-tǝlasam anay. 14 Amaɣlol a fall-awan z'ammagaran, kawanay amaran wǝr kawan-iwer ar asawad.»
15 Inna Amaɣlol i Musa: «Mafel as fall-i tǝsakkaraya? Annu i maddanǝs n Israyil ad abǝzan tarrayt. 16 Kay amaran ǝdkǝl tallaq-nak, tǝzzǝlaɣ ǝfus sa sǝr agaraw, tǝsǝssǝrreq-qu, fǝl ad t-ǝɣrǝsan maddanǝs n Israyil wǝr daɣ-san ibdeg wala itǝfran. 17 Nak amaran ad ǝɣfǝlaɣ iwallan ǝn Kǝl-Masar fǝl a dawan-in-ǝlkǝman. Ǝddi da ad za sǝttǝdda tarna-nin s ǝhluk wa z'aga Firɣawna, d amalankaytan-net kul win ǝmǝgǝr d awa ila daɣ gǝnan. 18 Tǝzzar ǝssǝnan Kǝl-Masar as, nak a imosan Amaɣlol assaɣa wa daɣ za sattadda tarna-nin fǝl Firɣawna, d awa ila daɣ amalankaytan win ǝmǝgǝr.» 19 Angalos ǝn Mǝššina wa iššokalan dat Kǝl-Israyil, ifal dat-san, imal dǝffǝr-san, alallag wa n ǝhu ǝnta da ifal-du dat-san imal dǝffǝr-san. 20 Imal alallag wa gǝr Kǝl-Israyil d agan wa n Kǝl-Masar. Kǝl-Israyil za isimalawlaw fall-asan ehad, amaran Kǝl-Masar imos fall-asan šiyyay. Igdal awen y agan wa n Kǝl-Masar a din-awǝd Kǝl-Israyil, har iɣrad ahad en.
21 Tǝzzar izzal Musa ǝfus-net dǝnnǝg agaraw, issǝgar-du Amaɣlol aḍu wa n dǝnnǝg labasan; insa aḍu en igar har izammazzay agaraw, inafalal-du aɣarɣar, iqqal tarrayt tǝqqurat. 22 Ǝssǝwalan maddanǝs n Israyil Agaraw, jiwanken fǝl aɣarɣar iqquran. Ǝwâran daɣ-san aman aganna wa n ǝɣil ǝd wa n zalgat ǝhan ǝlmital an fayyan n ǝgirer. 23 Ǝlkaman-asan Kǝl-Masar, d awa ila Firɣawna daɣ ǝggǝsan, d amalankaytan-net win ǝmǝgǝr, ǝd mawanan-nasan, awen kul issiwal ammas n agaraw. 24 Ɣur amadal n ǝsǝrri n azal izzǝrzag-du Amaɣlol asawad-net alallag ǝn temsay d ǝhu wa iha, har iswad daɣ agan wa n Kǝl-Masar, tǝzzar ijammajallad taɣara-nasan. 25 Inday idaran n amalankaytan ǝn Kǝl-Masar, isaggarmam fall-asan teklay. Tǝzzar ǝnnan Kǝl-Masar: «Daggagat-anaɣ i Kǝl-Israyil! Amaɣlol a dasan-immǝgaran dǝr-na.» 26 Inna Amaɣlol i Musa: «Ǝzzǝl ǝfus-nak dǝnnǝg agaraw a du-nǝmǝqqǝlan aman fǝl Kǝl-Masar ǝntanay d amalankaytan-nasan, d ǝggǝsan-nasan.» 27 Izzal Musa ǝfus-net dǝnnǝg agaraw, as d-ihoz azal a d-itaqqal agaraw edag-net wa da iha faw. Ǝddǝggagan Kǝl-Masar assaɣa wa tan-d-ǝhozan aman win den, mišan iggǝdl-en Amaɣlol daɣ tǝsǝggǝrigǝrǝyt n agaraw. 28 Namaqqalan-du aman, ǝlmazan malankaytan ǝn Firɣawna d ǝggǝsan-net, d agan-net ketnet. Awa iggazan agaraw ilkâm i Kǝl-Israyil, kul wǝr daɣ-as d-iqqim wala. 29 Mišan maddanǝs n Israyil wǝr daɣ-san ibdeg wala idaran assaɣa wad ǝzgaran daɣ tǝsǝggǝrigǝrǝyt n agaraw, ǝmosan aman zun fayyan n ǝgirer a dasan-ǝwarnen aganna wa n ǝɣil ǝd wa n zalgat. 30 Ǝzǝl wǝdi issifsa Amaɣlol Kǝl-Israyil daɣ Kǝl-Masar, tǝzzar ǝnayan šimǝxsa ǝn Kǝl-Masar ɣilanjatnat-du ǝs tamawen n agaraw.
31 Ǝnayan Kǝl-Israyil tarna zǝwwǝrat ta izammazal Amaɣlol fǝl Kǝl-Masar, tǝzzar tǝggaz tǝksǝda n Amaɣlol iwallan-nasan, ǝzzǝgzanan s Amaɣlol d ǝkli-net Musa.