15
Tǝmmal ta iga Musa i Mǝššina ɣur Agamad
1 Dǝffǝr awen issǝggad Musa ǝd maddanǝs n Israyil daɣ tǝmmal ta, y ǝdkul n Amaɣlol:
Tǝmmalen-in a tanat-aga y Amaɣlol, fǝlas issikna tarna-net wǝr nǝla tugdat
igar ayǝs d amawan-net daɣ agaraw
2 Amaɣlol ǝnta a di-ihakkin šiɣurad, ǝnta a sǝr-i d-itawayan ǝsǝggǝd daɣ tǝmmalen y-as,
Ǝsǝfsi a di-iga, imos Ǝmǝli-nin.
Tǝmmal a tu-tagga,
ǝzzizwara-qu id imos Ǝmǝli n abba-nin
3 Ǝnta a ogaran inammagaran,
kul igar-tan daɣ agaraw Telant.
Tafrǝnt daɣ mawayan ǝn gǝnan ǝn Firɣawna
ǝlmazan-tan aman n agaraw wa n Rozaw
5 Ǝlsan-tan aman ǝknanen tǝzzǝgrǝt,
ǝgan daɣ-san ǝdǝkǝyyi a n tǝhunt
6 Aɣil-nak a isannafalalan tarna-nak wǝr nǝla tugdat, ya Amaɣlol!
Aɣil-nak a iẓẓadan izǝnga-nak, ya Amaɣlol
7 Taɣmar-nak di-tǝdkalat as tǝtagadla win kay-ǝmmǝzraynen.
Tǝsǝbbǝqqe fall-asan alham-nak,
tǝzzar agin ǝrǝkǝmmi a itaggu ǝlǝmmuz.
8 Tǝssǝwǝdaɣ aman, ǝddewan
har ǝqqalan zun fayyan n ǝgirer.
Tǝsaɣɣarasaɣ aman win ǝknanen tǝzzǝgrǝt daɣ ammas n agaraw.
9 Imaksanan gannin: "A tan-nǝstǝɣ, nabǝz-tan, nuzan awa daɣ-san du-noɣa har t-id-nǝglǝz. Šikabiwen a za nǝlbǝy nanɣ-en."
10 Ǝsǝwǝd a tǝge agaraw ilmaz-tan!
Ǝgan ǝdǝkǝyyi wa n bǝlɣan n aldom daɣ tǝnazzamaren ǝssiksadnen.
11 Ya Amaɣlol! Ma imos ǝmǝli wa dǝr-ǝk olan?
Ma imos wa kay ewadan daɣ ǝmǝlǝwlǝw ǝs tazdak,
Ma imos wa kay ewadan daɣ tǝla n esǝm s ǝnta a sǝr-ǝk du-tewayat ǝtǝwǝggam ǝd masaksad. Ma imos wa kay ewadan daɣ igi ǝn tǝlmǝɣjujaten?
12 Adakal iyyanda a tǝgeɣ aɣil-nak, ilmaz amadal imǝhhura-nana.
13 Tara-nak wǝr nǝtǝmǝttǝy as tǝzazzalalaɣa tamattay ta tǝsaddarfa.
Tarna-nak as tan-tǝzazzalalaɣa s adag wa daɣ tǝzdaɣa.
14 arat wa ǝslanat-tu tǝmattiwen tǝzzar tǝga daɣ-san taysǝst.
Tǝzzar tǝssǝfray tǝrǝmmeq Filistinatan.
15 Imuzaran n Edom ǝɣšâdan wǝllen,
tǝga taysǝst daɣ mǝnokalan ǝn Mowab.
Kananitatan kul ab'as ǝhalan wala.
16 Ketnasan ǝknân tǝrǝmmeq, ǝššiwašan.
Igitan ǝn tarna-nak ǝssiksadnen, a tan-saddahatnen.
har tokay tamattay-nak, ya Amaɣlol!
har tokay tamattay ta-nak, tamattay ta du-tǝzzǝnza, tǝleq-qat.
17 A tan-tawǝya tǝzǝzzǝbbeq-qan ǝɣsǝran fǝl ǝdɣaɣ imosan i-nak
imos deɣ edag wa tǝsammataga y ad iqqǝl ehan-nak,
ǝnta a imosan edag-nak di zǝddigan, as kay iman-nak a t-ikrasan, ya Ǝmǝli
18 Amaɣlol ixkâm har faw!
19 Fǝlas ǝggǝsan ǝn Firɣawna, d amalankaytan-net, ǝd win tan-ǝwannen, ketnasan ǝggazan agaraw. Isannamaqqal-du fall-asan Amaɣlol aman n agaraw mišan maddanǝs n Israyil ǝɣrasan idaran-nasan mišan wǝr daɣ-san ibdeg wala.
20 Tǝnkar Maryam ta n tǝnnǝbit tǝmosat deɣ tǝmadrayt ǝn Harun, tǝdkal-du ǝzzǝnǝf ǝn tende iyyat ǝndǝrrat, tǝwat-tat, ad tǝtagas. Jajjayatnat dǝr-ǝs tǝdoden kul tagasnat, ǝwâtnat ǝzzǝnǝfan ǝn tandiwen šin den. 21 Tǝkbal-asnat Maryam tǝgannu:
" Tǝmmalen-nana nǝssǝggǝdet-tanat y Amaɣlol,
fǝlas issikna tarna-net wǝr nǝla tugdat
igar ayǝs d amawan-net daɣ agaraw."
Ǝšikǝl ǝn maddanǝs n Israyil daɣ taneray
Aman win Mara
22 Omar Musa tamattay s ad taggalat ɣur agaraw wa n Telant tagu anamod ǝn taneray ta n Šur. Ǝgan karad adan jiwanken daɣ taneray wǝr kala ad ǝgrawan aman. 23 As ewadan ǝsǝwi wa n Mara, ǝgrawan daɣ-as aman mišan tǝndar-asan tassay-nasan, fǝlas i kazbornen. Ǝnta den da ǝlǝsǝl n esǝm wa n Mara, almaɣna "Tǝkkǝzbǝrt". 24 Tǝzzar ǝssoɣalan tǝgna Musa ad gannin: "Ma za našǝw?" 25 Onsay Musa Amaɣlol, tǝzzar issǝkn-ay Amaɣlol ǝnnuɣ n ašǝk iyyan. Iga Musa ašǝk wen daɣ aman, tǝzzar ǝqqǝtasan, ǝknan. Edag wen daɣ a d-izazzabbat Amaɣlol fǝl tamattay ǝššǝrǝdan n ǝššǝriɣa-net, d anamod was ira a das-ǝlkǝman, ijjǝrrab-tan deɣ. 26 Inna: "As tǝtaggam ǝsǝsǝm olaɣan y awal-in nak Amaɣlol di n Ǝmǝli-nawan, tǝtamazalam s arat wa dat-i izalalaɣan, tǝssisamam y alwajiban-in, tǝlkamam y arat kul was omara, wǝr sǝr-wan du-z-amǝra waliyyat daɣ tǝwǝrnawen šin d-omaraɣ ǝs Kǝl-Masar. Ǝssǝnat as nak a imosan Amaɣlol a kawan izuzǝyan.
27 Ewadan Elim imosan akal ǝhanat marawat šittawen n aman ǝd sanatat, ǝd sǝdisat tǝmǝrwen ǝn tǝlazdaq. Ǝzzǝbben den da dagma n aman.