16
1 Matakwayan maddanǝs n Israyil ketnasan daɣ Elim. As ǝgan maraw adan ǝd sǝmmos daɣ tǝllit-nasan ta n sanatat dǝffǝr agamad ǝn Masar, ewadan teneray ta n Sin tǝllat gǝr Elim d ǝdɣaɣ wa n Sinay. 2 Edag wen da daɣ tǝssoɣal tamattay ketnet tǝgna Musa ǝd Harun. 3 Tǝnna tamattay: «Mafel as dana-wǝr-inɣa Amaɣlol daɣ Masar daɣ nǝqqim fǝl tǝnen ǝdnaynen isan, nǝyyǝwan daɣ tǝgǝlla? Kawanay amaran tewayam-ana-du ǝs taneray ta, fǝl a danaɣ-anɣu laz daɣ tenaɣay a.» 4 Inna Amaɣlol i Musa: «Ǝnǝy, a sǝr-wan d-amǝraɣ akonak ǝn tǝgǝlla a du-tǝgmadat ijǝnnawan. Ǝzǝl kul a du-tǝgmǝd tamattay tamǝd daɣ-as awa as iddǝrar ǝkkullu n iyyan daɣ-san. Ǝmmǝk wa daɣ as tan-z-ajjarraba fǝl ad ǝssǝna kud ǝlkaman y ammaran-nin wala. 5 Ǝzǝl wa n sǝdis amǝdanet-du ǝnǝtfus n awa du-tamadan daɣ ǝkkullu n ǝzǝl, aknin-tu ǝzǝl wen da.» 6 Inna Musa ǝd Harun i maddanǝs n Israyil: «Tadwit n ǝzǝl wa da ad za tǝssǝnam as Amaɣlol a kawan-d-ikkasan daɣ Masar, 7 amaran as affaw ad tǝnǝyam tanaya n Amaɣlol, fǝlas isla i sǝmmǝdǝnnigan-nawan, id ǝnta a fǝl tǝsammadannagam wǝrge nakkanay. Nakkanay za ma nǝmos as fall-ana tǝsimǝdǝnnigam?» 8 Inna Musa: «Amaɣlol a kawan-akfu isan tǝtšam daɣ tǝdwit ta. As affaw a kawan akfu tagǝlla tatšim-tat har tayyawanam. Amaɣlol isla i sǝmmǝdǝnnigan win fall-as tǝgam, fǝlas nakkanay za ma nǝmos. Wǝrgeɣ nakkanay a fǝl tǝgatantanam, kalar Amaɣlol.» 9 Inna Musa i Harun: «Annu i tamattay ketnet: Ihazat-du tǝbdǝdam dat Amaɣlol fǝlas isla y agatanten-nawan.» 10 Assaɣa wa daɣ iššewal Harun i tiddawat ǝn maddanǝs n Israyil, malallayan sa sǝr taneray, tǝhin-in tanaya n Amaɣlol tǝnifalal-du daɣ alallag n ǝhu zǝwwǝran wa dat-san iɣtan.
11 Iššewal Amaɣlol i Musa inn-as: 12 «Ǝsleɣ i sǝmmǝdǝnnigan win taggin maddanǝs n Israyil: Daɣ adi ann-asan: "Azalada ɣur agadal ǝn tǝfuk, dat igi n ahad ad tatšim isan, amaran tufat aɣora ad tayyawanam daɣ tǝgǝlla, tǝzzar tǝssǝnam as nak a imosan Amaɣlol di n Ǝmǝli-nawan."» 13 Tadwit ten da a d-osa ǝzzǝnǝf ǝn tǝbǝrruten šiyyad, ǝɣradnat ǝfǝtǝktǝk fǝl aɣaywan ǝn Kǝl-Israyil, ǝlsanat-tu. As affaw tufat aɣora da ilsa awaray amadal wa n ɣǝlǝyɣǝlayan n aɣaywan. 14 As iɣrad awaray wen, iqqim-du arat olan ǝd šiban, imos fǝl amadal tǝssut mallat fǝrkǝkat. 15 Ǝnayan maddanǝs n Israyil arat wa wǝr ǝssenan a imos ad tinǝmǝsǝstinan gar-essan, gannin: «Ma imos arat wa?» Inn-asan Musa: «Awa tagǝlla ta kawan-ikfa Amaɣlol y a tat-tatšim. 16 Arat da was omar daɣ talɣa ta: Ǝkkullu n iyyan daɣ-wan omâd daɣ-as awa t-iššǝtšan, imosan ǝddukad ǝn tǝyya. Awedan kul omâd daɣ-as awa igdan y ǝket n aytedan win ǝhanen ehan-net.» 17 Ǝgan maddanǝs n Israyil arat wa da: Wiyyad za ǝdkalan arat ogaran awen, wiyyad ǝdkalan a t-id-orayan. 18 As ǝkatan ǝmmud-nasan, ǝnayan as win d-omadnen a aggen wǝr ǝlen arat a tan-ogaran, amaran win d-omadnen arat ǝndǝrran ǝntanay da igd-asan awa d-omadan. Ǝkkullu n iyyan daɣ-san omad-du awa t-iššǝtšan. 19 Inn-asan Musa: «A kawan wǝr iggǝz i daɣ-as d-iglazan arat i tufat.» 20 Mišan ǝmmǝzrayan wiyyad daɣ-san tanat-net, ǝglazan-du daɣ-as arat i tufat. Ǝggaznat-tu tǝwǝkkawen, rǝssǝd. Tǝzzar iggaz alham n aytedan win Musa. 21 Awen daɣ a d-ewayan as aɣora kul omâdan-du daɣ amensay wen arat a tan iššitšan daɣ ǝzǝl. Annabat wa, as t-i-du-togaz tuksay ǝn tǝfuk ad ilyǝm.
Ǝzǝl wa n tǝsanfawt
22 As d-ewad ǝzǝl wa n sǝdis, omadan-du ǝnǝtfus n arat wa du-tamadan ǝstizarat. Ǝkkullu n iyyan daɣ-san ila sanatat tǝyyaten daɣ adag n iyyadda ta n ǝstizarat. Osan-du muzaran ǝn tamattay ǝssoɣalan arat wen i Musa tǝzzar inn-asan:
23 «Ǝnta ǝddi da iman-net arat was omar Amaɣlol. Tufat imos ǝzǝl ǝn tǝsanfawt iskatan y Amaɣlol. Arat was tǝram ǝsǝŋŋi-net daɣ adag wa daɣ tǝnaŋŋu tǝgǝlla, saŋŋiwat-tu azalada, was tǝram ǝsǝwǝs-net, sǝwǝsat-tu azalada, amaran arat kul wa du-tǝglazam, sansiwat-tu i tufat aɣora.» 24 Ǝssǝnsan arat wa d-ǝglazan i tufat s asaway was tan-omar Musa. Mišan wǝrmad iga ark aḍu za wǝr t-ǝggeznat tǝwǝkkawen. 25 Tǝzzar inn-asan Musa: «Atšiwat-tu azalada, fǝlas ǝzǝl wa in tǝsanfawt, imosan ǝzǝl a daɣ itawasaɣmar Amaɣlol. Azalada wǝr tu-za-tǝgrǝwam daɣ ǝsuf. 26 Sǝdis adan a za tǝtaggim tǝtamadam-t-idu, amaran ǝzǝl wa n ǝssa ǝzǝl n ǝssǝbǝt a imos, wǝr daɣ-as tu-z-imǝl.» 27 Mišan ya, ǝrdaɣan-du aytedan wiyyad daɣ ǝzǝl wa n ǝssa, y a d-amǝdan amensay wen, eges wǝr ǝgrewan wala. 28 Den daɣ ad inna Amaɣlol i Musa: «Har ǝmmay tugayam s ad tǝlkǝmam y alwajiban-in d ǝššǝrǝdan n ǝššǝriɣa-nin? 29 Ǝssǝnat as Amaɣlol, dad zamas ikf-iwan ǝzǝl wa n ǝssǝbǝt i tǝsanfawt, wǝdi ikf-iwan imensewan n ǝššin adan ɣur ǝzǝl wa n sǝdis! Daɣ adi ǝzǝl wa n ǝssǝbǝt, a kawan-wǝr-iggǝz i d-irdaɣan ehan-net, wala imǝl-tu i igmâdan edag-net.» 30 Tǝzzar tǝssǝnfa tamattay daɣ ǝzǝl wa n ǝssa.
31 Ǝgan Kǝl-Israyil y amensay wa esǝm Manna, ola ǝd tǝblalen n analay. Imos i mallan, iga tenbay ǝn masatan tǝha turawat. 32 Inna Musa: «Arat da was omar Amaɣlol: "Itǝwǝɣbǝret ǝddukad ǝn tǝyya n amensay wa n Manna, har t-inǝy ǝzzurrǝyya-nawan dǝffǝr awa, fǝl ad ǝnǝyan tagǝlla ta kawan ǝššǝtša daɣ taneray assaɣa wa kawan d-ǝkkasa daɣ akal ǝn Masar."» 33 Tǝzzar inna Musa i Harun: «Ǝdkǝl-du tǝtǝkint taga daɣ-as tǝyya ǝn Manna tǝdnayat y ad tansu dat Amaɣlol har d-awǝdnat tawšeten šin dǝffǝr-wan du-z-ǝhǝwnen.» 34 Ilkam Harun y awa as omar Amaɣlol Musa, issǝnsa tǝyya ǝn Manna dat ǝssǝnduq wa n tassaq, fǝl ad tǝtǝwigǝz. 35 Ǝkkozat tǝmǝrwen n awatay a ǝgan maddanǝs Israyil tattin amensay wa n Manna, har d-ewadan ǝgogas n akal wa n Kanan s ǝnta daɣ z'ǝɣsǝran.
36 Tǝsǝkǝt tas itawaggu aket daɣ azzaman win den, esǝm-net Efa. Amaran marawat tiyyaten a dǝr togda.