17
Alham ǝn tamattay ǝd tǝlmǝɣjujat ta n ǝsǝngǝy n aman daɣ tǝsǝlit ta n Horeba
1 Tǝfal tamattay n Israyil ketnet teneray ta n Sin, ǝlkaman y anamod was tan-omar Amaɣlol s ad t-agin. Ad tagalen har ǝzzǝbben ɣur ǝsǝwi wa n Rifidim mišan osan-t-in wǝr t-ǝhen aman. 2 Tǝzzar tǝbraq-qan tamattay fǝl Musa a das-gannin: «Ǝgrǝw-ana-du aman ad našǝw» Inn-asan Musa: «Mafel as fall-i tǝggaram aganna? Mafel tǝtaggim šinagmayen y Amaɣlol?» 3 Idgaz fad tamattay tǝššewal fǝl Musa, tǝnn-as: «Mafel tǝkkasaɣ-ana-du daɣ Masar? Awak a tareɣ a danaɣ-iba da da nakkanay ǝd bararan-nanaɣ, ammatin hǝrwan-nana?» 4 Idkal Musa ǝmǝsli-net ad itansay Amaɣlol inna: «Ma z'agaɣ i tamattay a? Ab'as din-iqqim ar a di-anɣin ǝs tǝhun!» 5 Inna Amaɣlol i Musa: «Akǝy dat tamattay, tidawaɣ d arat daɣ ǝɣmaran win ǝmosnen šigǝttawen ǝn Kǝl-Israyil. Tǝttâfa tallaq tas tǝwataɣ agaraw wa n Ǝnnil, tagla. 6 Nak amaran ad ǝmǝla dat-ǝk ǝwâra tǝhunt iyyat n ǝdɣaɣ wa n Horeba. Tǝhunt tǝdi ǝwǝt-tat a d-ǝngǝyan aman tǝšwa tamattay.» Iga Musa arat wen da dat šittawen ǝn wǝššaran n Israyil. 7 Iga y adag wa esǝm Massa ǝd Meriba almaɣna tǝnagmayt, d ǝkǝnnas fǝlas maddanǝs n Israyil a ǝssoɣalanen tǝgna Musa, ǝgan deɣ šinagmayen y Amaɣlol ǝs tǝnna ta ǝgan. «Ak Amaɣlol illa gar-ena me?»
Ǝtǝwǝrza n Amalǝk
8 Osan-du Amalekitatan, ǝmmǝgaran d Israyil ɣur ǝsǝwi wa n Rifidim. 9 Tǝzzar inna Musa y ǝmadhal-net Joswe: «Sǝnnǝfrǝn-du meddan, taglim tammagaram d Amalekitatan. Tufat ad ǝbdǝda fǝl afalla ǝn tǝkašwart, ǝttafa tallaq tas iga Mǝššina tǝlmǝɣjujaten.» 10 Iga Joswe arat was t-omar Musa. Ǝglan ǝmmǝgaran d Amalekitatan. Musa ǝd Harun, d alǝs iyyan igan Xur amaran ǝggǝzzayan afalla ǝn tǝkašwart. 11 Iket isihakat Musa ǝfus-net ǝd tallaq, ǝɣlâban Kǝl-Israyil izǝnga-nasan, as tan-issǝras, a fall-asan ǝssǝfǝlan Amalekitatan. 12 Ǝqquran-du fassan ǝn Musa, obaz-du Harun ǝd Xur tǝhunt ǝssǝnsan-tat daw-ǝs, iqqim fall-as. Ǝkbalan ifassan-net fǝl gannatan kul. Tǝzzar ǝzmaran fassan-net y ad ǝzzǝlan har tuda tǝfuk. 13 Tǝzzar isannahal Joswe terazay n agan wa n Amalekitatan. 14 Inna Amaɣlol i Musa: «Ǝktǝb arat wa fǝl ad itǝwǝktǝw, amaran tǝmǝlaɣ i Joswe as, ad assaba tǝmayyamayt n Amalekitatan gǝr jǝnnawan d amadal.» 15 Ikras Musa edag ǝn tǝkutawen ig-as esǝm Adonay-Nisi almaɣna: Ǝmǝli a fǝl ǝknasa.
16 Dǝffǝr adi inna tolas: «Dad zamas tawazzalan fassan sa sǝr taɣmar n Amaɣlol, wǝdi Amaɣlol ad ammagar d ǝzzurrǝyya n Amalǝk har hayawan ǝs hayawan.»