18
Ǝmǝnǝy ǝn Musa d ǝdaggal-net Yitraw
1 Yitraw wa n ǝlimam ǝn Midǝyan, imosan ǝdaggal ǝn Musa, isla aratan kul win ikna Amaɣlol Mǝššina i tamattay-net Kǝl-Israyil ǝd Musa, isla ǝnta da ǝmmǝk was tan-d-ikkas daɣ Masar. 2 Den daɣ a d-iddew ǝd tǝntut ǝn Musa, Ziffora, as dat awen a tat-issoka Musa aɣaywan-nasan, 3 iddew-du ǝntada d ǝššin bararan ǝn Ziffora. Wa n aɣafadday ig-as Musa esǝm Geršom, almaɣna «Ǝɣǝrib Den», fǝlas inna akal a d-igmad a daɣ imos ǝɣǝrib. 4 Wa hadan esǝm-net Elǝyezer, almaɣna «Ǝmǝli-nin illil-i», fǝlas a inna Musa: Ǝmǝli wa iɣbad Abba-nin a d-osan illil-i, igdal i Firɣawna ad agu iman-in. 5 Igla-du Yitraw wa n ǝdaggal ǝn Musa, iddew-du ǝd bararan ǝn Musa ǝd tǝntut-net, ikk-ay-du daɣ taneray ta daɣ izzǝbbat, ɣur adɣaɣ wa n Horeba, as itawannu adɣaɣ wa n Mǝššina. 6 Issǝmal-in i Musa inn-as-in: «Awa nak ǝdaggal-nak Yitraw, ǝssilkadaɣ-ak-du, ǝddewa-du ǝd tǝntut-nak Ziffora, ǝd bararan-net an ǝššin.» 7 Igla Musa issǝlkad y ǝdaggal-net, issǝjad dat-ǝs, izalammat-tu, ad tinǝsǝsliman, ǝggazan ehan. 8 Issoɣal Musa y ǝdaggal-net aratan kul win iga Amaɣlol i Firɣawna, ǝd Kǝl-Masar fǝl ad isǝddǝrfǝt Kǝl-Israyil. Issoɣal-as tolas alɣazab kul wa ǝgan daɣ tarrayt, d ikus wa tan-d-iga Amaɣlol daɣ alɣazab wen. 9 Yitraw tǝsidawat-tu tasalay ta iga y aratan olaɣnen kul win iga Amaɣlol i Kǝl-Israyil, d ikus wa tan-d-iga daɣ fassan ǝn Kǝl-Masar. 10 Tǝzzar inna: «Igodan y Amaɣlol a kawan-d-ikkasan daɣ fassan ǝn Kǝl-Masar, d ǝfus ǝn Firɣawna, ikkas-du tamattay a daɣ tarna ǝn Kǝl-Masar! 11 Ǝmǝrǝdda ǝsilakanaɣ as, Amaɣlol ǝnta a ogaran id t-illa ǝmǝli kul, amaran arat wa isinafalal-tu daɣ alwaq wa daɣ sannahalan Kǝl-Masar mǝlka ǝn Kǝl-Israyil ǝsasan-tan.»
12 Dǝffǝr adi iga Yitraw wa n ǝdaggal ǝn Musa takutay ta tǝtirǝkǝmmet, ǝd tǝkutawen šiyyad i Mǝššina. Osa-du Harun d ǝɣmaran win ǝmosnen šigǝttawen ǝn Kǝl-Israyil ketnasan, ǝdrawan d ǝdaggal ǝn Musa dat Mǝššina.
Ǝnnǝsixa wa iga Yitraw i Musa
13 As affaw tufat aɣora, iqqim Musa y ad išrǝɣ i tamattay. Tǝɣlay-tu tamattay wa n aɣora har ig'ahad. 14 Inay ǝdaggal ǝn Musa aratan kul win itaggu i tamattay, tǝzzar inn-as: «Mas tǝtaggaɣ arat wa i tamattay? Mafel tǝtaggaɣ ǝššǝɣǝl wa ketnet ɣas-nak, ǝbdadan aytedan ǝssigadan wa n aɣora har takǝst, ǝqqalan y ad ǝgrǝwan anay-nak»? 15 Inn-as: «Adi assa di-du-taggin ǝran a dasan-agaɣ ǝššǝriɣa wa d-ifalan Mǝššina. 16 As tu-tǝmal almasalat gar-essan, a di-d-asin ǝxkǝmaɣ-asan, ǝssusǝnaq-qan ǝššǝriɣa ǝn Mǝššina, d ammaran-net.» 17 Inn-as ǝdaggal-net: «Anamod was tǝšɣala da wǝr innǝzzam. 18 A igan da tǝsǝlkamt-nak iduz kay d aytedan win kay-du-tasinen, fǝlas ǝššǝɣǝl wa izgar šiɣurad-nak. Wǝr tǝfregaɣ amaknaw-net ɣas-nak. 19 Ǝmǝrǝdda, sǝsǝm y awa dak-z-anna, a dak-agaɣ ǝnnǝsixa amaran a dak-ilal Mǝššina. Kay almawakkil ǝn tamattay a tǝmosa gar-es ǝd Mǝššina, almasalaten-nasan šin ǝzzǝwatnen ɣas a za tǝtagga dat Mǝššina. 20 Tǝssusǝnaq-qan deɣ ǝššǝriɣa ǝn Mǝššina d ammaran-net, ǝd tarrayt tas tan-iwar a das-ǝlkǝman, d ǝššǝɣǝl was tan-iwar igi-net. 21 Tǝsǝnnǝfrǝnaɣ ǝntada daɣ tamattay ketnet meddan n ǝlmǝxsud, ǝksudnen Mǝššina, ǝlkâman i tidǝt, ǝkyâdan tǝnfa tan-du-tǝggazat s arak tarrayt, tǝzzuzǝraq-qan. Ǝkkullu n iyyan azzar y ǝgim n awedan, madeɣ temeday n awedan, madeɣ sǝmmosat tǝmǝrwen n awedan, made maraw aytedan. 22 Meddan win ad iqqǝl ǝššǝɣǝl-nasan faw ǝššǝriɣa i tamattay, amaran as tu-tǝmal almasalat zǝwwǝrat, wǝdi a sǝr-ǝk kat-in-sǝssikǝyan, ǝntanay amaran xakkaman fǝl almasalaten šin darosnen. Ǝmmǝk wa daɣ as za tǝfnǝzaɣ fǝl man-nak ǝzuk, ilalan-ak meddan win s aggay-net. 23 As tǝgeɣ arat wa, s ǝnta as kay omar Mǝššina, wǝdi a dak-ilmad amaknaw n ǝššǝɣǝl wen, tǝzzar ǝqqǝlan aytedan en kul iɣawnatan-nasan ǝknân ǝššǝɣǝlan-nasan.» 24 Iqbal Musa ǝnnǝsixa n ǝdaggal-net, tǝzzar immozal s aratan kul win das-inna da. 25 Isannafran-du Musa meddan win ǝlmǝxsud daɣ Kǝl-Israyil kul, izzozar-tan i tamattay, wiyyad azzaran y ǝgim n awedan, wiyyad azzaran i tǝmad, wiyyad azzaran i sǝmmosat sǝmmosat tǝmǝrwen, wiyyad amaran azzaran i tǝmǝrwen. 26 Meddan win, iqqal ǝššǝɣǝl-nasan ǝššǝriɣa y aytedan, sasakayan ǝs Musa almasalaten šin ǝzzǝwatnen, amaran šin darosnen kul kannin-tanat. 27 Tǝzzar igla Yitraw, intak-ku Musa.