2
1 Tǝmǝwit ta da as ǝkkǝsawan jǝnnawan ǝd mǝdlan d arat kul wa tan-ihan.
2 As d-ewad ǝzǝl wa n ǝssa da Mǝššina isikasaw igi n awen kul,
izziraz deɣ awa itaggu kul.
3 Iga Mǝššina albaraka daɣ ǝzǝl wa n ǝssa,
izzǝzwar-tu fǝlas as d-ewad ǝzǝl wa da
Mǝššina iɣrâd axluk n arat kul,
izziraz deɣ awa itaggu kul.
Adǝm ǝd Xawa ǝhân ǝgoras wa n Edan
4 Ǝnta da ǝlǝsǝl ǝn jǝnnawan d amadal ɣur ǝtǝwǝxlak-nasan:
As d-iga Amaɣlol Mǝššina amadal ǝd jǝnnawan, 5 amadal harwada wǝr t-iwer wala tafsǝq, wala idwal-du fall-as yel, fǝlas Amaɣlol Mǝššina wǝr issǝwat amadal akonak harwada, amaran ǝnta da wǝr t-illa awedan waliyyan ǝngǝm igyǝk-ku. 6 Wǝr t-illa ar šat n aman tǝšašwit amadal ketnet.
7 Iga Amaɣlol Mǝššina awedan daɣ ǝgodrar n amadal issǝwad daɣ šinjar-net infas, tǝzzar imal-tu awedan iddâr. 8 Dǝffǝr adi iga Amaɣlol Mǝššina ǝgoras daɣ dǝnnǝg, daɣ akal n Edan tǝzzar iga daɣ-as awedan wa. 9 Amaran issǝdwal-du Amaɣlol Mǝššina daɣ amadal ǝnnuɣan n eškan kul ǝhossaynen ǝzodan deɣ aratan-nasan ǝs tattay, issǝdwal-du deɣ ašǝk wa isuduran daɣ ammas n ǝgoras wa, d ašǝk wa isusunan awa olaɣan d awa wǝr noleɣ.
10 Ingay-du agarew daɣ akal n Edan ad išašǝw ǝgoras wen. As igmad Edan immǝzzay iqqal ǝkkoz gǝrwan. 11 Wa azzaran esǝm-net Fišon, ǝnta a d-iɣlayan akal kul wa n Hawila, imosan akal iha urǝɣ. 12 Urǝɣ en da wa iqqǝtasan. Ǝhan-tu deɣ aḍutan ǝzodnen ǝlânen ǝlqimat zǝwwǝrat as itawannu Bǝdola, ǝd tǝhun ǝntanatay da ǝlânen ǝlqimat zǝwwǝrat as itawannu Šoham. 13 Agarew wa n ǝššin esǝm-net Gihon, ǝnta a d-iɣlayan akal wa n Kuš ketnet. 14 Agarew wa n karad esǝm-net Tigǝr, ǝnta a d-ingayan daɣ dǝnnǝg n akal n Aššur. Wa n ǝkkoz esǝm-net Efrat.
15 Iga Amaɣlol Mǝššina awedan, daɣ ǝgoras n Edan fǝl a fǝl a daɣ-as išɣǝl, annattaf dǝr-ǝs. 16 Tǝzzar inna Amaɣlol Mǝššina y awedan: «Tǝle turagat ǝn tattay n aratan n eškan kul win n ǝgoras a.» 17 Mišan ig-as tarɣǝmt ta inn-as: «Ad wǝr tatša aratan n ašǝk wa isusunan n awa olaɣan d awa wǝr noleɣ, fǝlas ǝzǝl wa tan-tǝtšeɣ illikan as a kay iba ǝddi da.»
18 Inna Amaɣlol Mǝššina: «Wǝr oleɣ y awedan ad imos ɣas-net, a das-agaɣ ǝmadhal a dǝr inniha.» 19 Issoka-du Amaɣlol Mǝššina awedan imudaran kul win d-iga daɣ amadal, gǝr win jawankatnen, wala win ǝggadnen, fǝl ad inǝy ismawan win dasan-z-agu awedan. Tǝzzar iqqal as ismawan win iga awedan i mudaran, ǝntanay as tawaɣrin. 20 Iga ismawan i hǝrwan ǝd gǝdad ǝd wǝxsan kul, mišan inay as ǝnta wǝr igrew ǝmadhal a dǝr inniha. 21 Tǝzzar isattarmas-tu Amaɣlol Mǝššina etǝs zǝwwǝran. Amazay wa daɣ insa da, ǝnta a d-ikkas Amaɣlol Mǝššina iyyan daɣ ɣǝrdǝššan-net issoɣal elam-net tǝmǝwit-net. 22 Ǝɣǝrdǝšša wa d-ikkas Amaɣlol Mǝššina daɣ awedan da, ǝnta a iga tantut, tǝzzar ig-et ɣur alǝs.
23 Tǝzzar inna awedan:
«Ǝnta da da ta tǝmosat arat daɣ ɣasan-in
tǝmos deɣ arat daɣ alam-in.
Ǝnta as z'itawannu tantut
fǝlas alǝs a daɣ du-tǝtawakkas.»
24 Adi da a fǝl iffal alǝs šis ǝd mas, irtǝy ǝd tǝntut-net, ǝqqǝlan arat iyyanda.
Ǝtǝwǝstaɣ n Adǝm daɣ ǝgoras
25 Alǝs ǝd tǝntut ketnasan wǝr ǝlsen arat,
eges wǝr fall-asan imos awen tǝkarakit.