3
1 Imudaran kul win d-iga Amaɣlol Mǝššina jiwanken fǝl amadal, ogar-tan mǝlul masnat ǝn tǝkǝrras. Inna i tǝntut: «Awak tidǝt da as inna Mǝššina: "Ad wǝr tatšim aratan n ašǝk waliyyan daɣ ǝgoras wa?"» 2 Tǝnn-as tǝntut: «Aratan n eškan n ǝgoras a kul nǝla turagat ǝn tattay-nasan 3 ar aratan n ašǝk wa ihan ammas n ǝgoras, fǝlas a danaɣ-inna Mǝššina: "A tan-wǝr-tatšim za wala tǝdǝsam-tan, as wǝr iga adi a kawan-iba"». 4 Tǝzzar inna mǝlul i tǝntut: «Kud iba, wǝr kawan-z-iba. 5 Kalar masnat a iga Mǝššina as, as tan-tǝtšam ad ammarin ɣafawan-nawan, tǝqqǝlam šilat-net, tǝzlǝyam awa olaɣan d awa wǝr noleɣ.»
6 Tǝnay tǝntut aratan n ašǝk a ǝssiglaban ǝs tattay, ǝhossayan s anay, amaran olân d as hakkin ǝgǝrri. Tǝzzar tǝkkas-du iyyan daɣ-san, tǝtš-ay tǝkfa daɣ-as alǝs-net a dǝr-ǝs iddewan den da itš-ay ǝnta da. 7 Ǝmmoran ɣafawan-nasan, ǝgrân-in as wǝr ǝlsen arat, tǝzzar ad samanayan ifǝrkak zawwarnen n ašǝk igân esǝm fig, lassin-tan. 8 As d-igar aḍu sǝmmidan dǝffǝr agadal ǝn tǝfuk, isannafray-tan Amaɣlol Mǝššina ǝd man-net s ǝmǝtǝkwǝy igan daɣ ǝgoras. Tǝzzar, ad ilaqqas alǝs ǝd tǝntut y Amaɣlol Mǝššina daɣ eškan. 9 Iɣra Amaɣlol Mǝššina alǝs inn-as: «Mas tǝlaqqasa?» 10 Inn-as alǝs: «Ǝnǝfrǝy a dǝr-ǝk ǝgeɣ daɣ ǝgoras tobaz-i tǝkarakit fǝlas arat a wǝr ǝlse, amaran a dak-laqqasa.» 11 Inn-as Amaɣlol Mǝššina: «Ma dak-innan za wǝr tǝlseɣ arat? Ǝngǝm ara n ašǝk was dak-ǝrɣama fǝl tattay-net a tǝtše?» 12 Inn-as alǝs: «Tantut a ɣur-i tǝgeɣ da, a di-tǝkfat ara n ašǝk wa ǝtšeq-qu.»
13 Tǝzzar inna Amaɣlol Mǝššina i tǝntut: «Mafǝl tǝgeɣ ǝmazal di?» Tǝnn-as tǝntut: «Mǝlul a di-issǝxrakan, ǝtšeq-qu.» 14 Inna Amaɣlol Mǝššina i mǝlul:
«Dad zamas tǝgeɣ ǝmazal di, kay ɣas a za tǝwǝr tulɣant daɣ mudaran kul, gǝr za ihǝrwan wala deɣ awa ijawanken fǝl amadal ketnet. Ad tǝtijǝwǝnkeɣ ǝs tǝdist-nak, tǝtattaɣ ǝgodrar faw daɣ tǝɣrǝst-nak. 15 A kay-zǝnnǝmǝgzǝraɣ ǝd tǝntut, ǝzǝnnǝmǝgzǝraɣ ǝzzurrǝyya-nak ǝd wa-net, ad ilakkaš ǝzzurrǝyya ǝn tǝntut eɣaf-nak, kay ad tǝddadaɣ erǝz-net.»
16 Amaran tantut inn-as: «A dam-ǝššita anay n arkanay ɣur igi-nam tadist, azzawat-am iguz n ǝmzur. Wǝr za tileɣ amadammad ar wa n alǝs-nam eges ǝnta a kam-z-ixkǝman.»
17 Amaran inna y alǝs: «Dad zamas tǝssǝsama y awal ǝn tǝmahharak-nak tǝtšeɣ ara n ašǝk was dak-ǝrɣama fǝl tattay-net, wǝdi amadal a tu-tǝwǝr tulɣant fǝl ǝddǝlil-nak. Kundaba tǝnayaɣ arkanay daɣ ǝššǝɣǝl as za tǝgrǝwa daɣ amadal isudar-nak iket tǝddâra. 18 A dak-d-issǝgmǝd amadal ark annabatan ǝlanen išǝnnanan ǝd wiyyad wǝr tǝha tǝnfa, ad tǝtattaɣ annabatan n ǝsuf. 19 Kundaba tǝrsaka tarraft-nak as za tǝgrǝwaɣ isudar iket wǝr tǝqqela amadal s ǝnta a du-tǝgmada, fǝlas kay wǝr tǝmosa ar ǝgodrar amaran a tu-tǝqqǝla.»
20 Iga Adǝm i tǝmahharak-net esǝm Xawa fǝlas ǝnta a tǝmosat anna n aytedan kul. 21 Amaran iga Amaɣlol Mǝššina y Adǝm ǝd tǝmahharak-net isǝlsa n agašek issǝls-asan-tan. 22 Inna Amaɣlol Mǝššina: «Dad zamas awedan itša ara n ašǝk wa ihakkin masnat iqqal šilat n iyyan daɣ-na, izlay gǝr awa olaɣan d awa wǝr noleɣ, wǝdi ǝgdǝlatana y as teṭṭay n ara n ašǝk wa isuduran, fǝlas as t-itša ad iɣlǝl.» 23 Tǝzzar igdal Amaɣlol Mǝššina y awedan ǝgoras n Edan issǝgag-as-tu, fǝl ad igyǝk amadal wa daɣ iga. 24 As itawakkas awedan daɣ ǝgoras n Edan iga Amaɣlol Mǝššina angalosan as itawannu kǝruban daɣ dǝnnǝg n ǝgoras, iga daɣ-as deɣ takoba tǝtaggit ǝbǝlǝzbǝlǝz a n temsay, tǝtiɣǝlǝyɣǝlǝy iman-net. Izazzagaz-tan tarrayt ta tǝkkat ašǝk wa isuduran.