4
Qayin ǝd Habila
1 Iggaz Adǝm fǝl taɣurǝs Xawa, tǝga tadist, tǝla Qayin. Tǝnna: «Ǝgrawa yay ǝs tǝdhǝlt n Amaɣlol.» 2 Dǝffǝr adi tǝla Habila. Iqqal Habila amadan, iqqal Qayin ǝmagyak.
3 As tǝga tamert dǝffǝr awen eway-du Qayin y Amaɣlol arat daɣ tǝnfa ǝn tawagost-net, ig-as-tu tǝnafut. 4 Habila amaran igzam arat daɣ ɣǝfǝdda n aharay-net. Ikkas-du daɣ-san šisǝllad šin ǝddǝratnen ig-enat y Amaɣlol tǝnafut. Tǝzzar iqbal Amaɣlol Habila ǝd tǝnafut-net, 5 mišan wǝr iqbel Qayin ǝd tǝnafut ta-net. Iggaz alham labasan Qayin, izakkanzar. 6 Inna Amaɣlol i Qayin: «Wǝr tǝleɣ ǝddǝlil s alham wala tǝkenzert. 7 As tǝtaggaɣ awa olaɣan, illikan as ad tǝtǝwǝqbǝla, amaran as tu-wǝr-tǝtǝgga wǝdi abakkad iha dǝr-ǝk isǝlsa, wǝr ila daɣ madammadan ar a kay-ilu. Mišan kay arn-ay.»
8 Inna Qayin y amadray-net Habila ad akkin šiwǝgas. As tanat-in-osan iggad-du Qayin iga iman ǝn Habila. 9 Inna Amaɣlol i Qayin: «Ma iga amadray-nak?» Tǝzzar inn-as: «Wǝr ǝssena, wǝrgeɣ ǝmagaz-net a ǝmosa.» 10 Inn-as Amaɣlol: «Mas tǝtaggaɣ ǝmazal di? Azni n amadray-nak sallaɣ-as isirawraw-du fǝl amadal, ira daɣ-i ikus ǝn tǝnnǝt. 11 Ǝmǝrǝdda tǝwâr kay allaɣanat, tǝtiwastaɣa daɣ amadal wa fǝl inɣal ǝzni n amadray-nak was tǝgeɣ iman-net. 12 Kud tǝgayyaka da wǝr za tǝlǝsaɣ agaraw ǝn tǝnfa waliyyat daɣ amadal. Ad tǝqqǝla ǝnǝbbennǝn n amajjawankay fǝl ǝruru n amadal.» 13 Inna Qayin y Amaɣlol: «Wǝr ǝzmera y attadib n ǝmazal wa ǝge da. 14 Tǝstaɣaɣ-i azala daɣ amadal wa du-tǝgammad tǝnfa, tǝsannamaggagaɣ-i ǝd man-nak. Ad ǝqqǝlaɣ ǝnǝbbennǝn n amajjawankay fǝl ǝruru n amadal, amaran awedan a di-igrawan a di-anɣu.» 15 Inn-as Amaɣlol: «Kala kalar i igan iman-nak ad tagu tǝnnǝt-nak ǝssa gamadan.» Tǝzzar iga Amaɣlol ejwal fǝl Qayin n as i dǝr-ǝs immǝnayan wǝr tu-z-anɣu. 16 Tǝzzar inamaggag Qayin d Amaɣlol iɣsar daɣ akal wa n Nod daɣ dǝnnǝg n Edan.
17 Iggaz Qayin fǝl taɣurǝs, tǝga tadist, ihǝw Xenok. Tǝzzar ikras Qayin aɣrǝm ig-as esǝm ǝn rures Xenok. 18 Xenok igraw barar, ig-as esǝm Ɣirad, Ɣirad eraw Mǝxuyal, Mǝxuyal eraw Mǝtušal amaran Mǝtušal eraw Lamek. 19 Lamek iga sanatat tǝdoden, iyyat esǝm-net Ɣadda, tahadat Silla. 20 Ɣadda teraw Yabal. Yabal ǝnta a d-ǝgmadan madanan win ɣassarnen daɣ hǝktan. 21 Esǝm n amadray-net Yubal, ǝnta a d-ǝgmadan mawatan ǝn tǝhǝrdant ǝd tǝsǝnsǝq. 22 Sila amaran teraw Tubal-Qayin s ǝnta a d-ǝgmadan nadan win ǝggatnen daroɣ ǝd tǝzoli. Tamadrayt ǝn Tubal-Qayin esǝm-net Naɣama. 23 Inna Lamek i tǝdoden-net:
«Ɣadda, ǝd Sila, sǝsǝmmat-i,
takkarkarmat šimǝzzugen-nakmat y awal-in,
fǝlas ǝgeɣ iman n alǝs wa di-isabbasan,
ǝd barar wa daɣ-i igan akaranbazu. 24 Kud Qayin as tawaggan man-net ad tagu tǝnnǝt-net ǝssa gamadan,
nak ta-nin ǝssayat tǝmǝrwen n agamad d ǝssa a za tagu.»