38
Majmar wa zǝwwǝran d ǝɣlal wa n alwallatan
1 Iga majmar wa zǝwwǝran n ǝsǝqqǝd ǝn tǝkutawen, igan daɣ eškan ǝn tǝggart ikna tugdat fǝl ǝkkullu n aganna, tǝmos ǝkkullu ǝn tasaga-net sǝmmos ɣallan, iga ahaku ǝn karad ɣallan sa sǝr afalla. 2 Ǝkkullu n iyyat daɣ tǝɣǝmmar-net, ig-as a olan d ǝskawan a daɣ-as d-ǝntanen ǝmosan dǝr-ǝs arat iyyanda. Awen kul issǝls-ay daroɣ. 3 Iga kaskawtan zawwarnen a daɣ z'itawanɣal eẓǝd ǝn tǝkutawen, ǝd felutan, ǝd sǝlkaw zawwarnen, ǝd šokalen šin ǝlanen išenan, ǝd sǝksal ǝn tǝmakaten. Imutag win kul ig-en daɣ daroɣ. 4 Iga ǝssǝrir imišaragragan ǝn daroɣ. Ǝssǝrir wa ig-ay daw ǝbǝl ǝn majmar wa zǝwwǝran, ɣur tǝsaddakamt-net, amaran isigaraygaray daɣ majmar gǝr afalla d ares. 5 Iwat ǝkkoz ɣabatan ǝn daroɣ iga daɣ ǝkkullu ǝn tǝɣmǝrt iyyan daɣ-san. Iɣabatan win, ǝntanay a daɣ za tassadnat tallaɣen šin z'ǝqqǝlnen isǝssiway-net. 6 Tallaɣen šin ig-enat daɣ tǝggart, issǝls-enat daroɣ. 7 Issad-tanat daɣ ɣabatan ǝn majmar wa zǝwwǝran, fǝl ǝššin gannatan, ǝqqalnat isǝssiway-net. Majmar wa iga daɣ gǝttan ǝn tǝggart, amaran ammas-net wǝr t-iha wala.
8 Iga aɣlal wa n alwallatan ǝd tǝsǝkbǝlt-net daɣ šišeten ǝn daroɣ a d-ǝkfânat tǝdoden a du-tasinen den ɣur ǝmi n ahaket wa n ǝmǝnǝy.
Šisǝwad šin ǝɣlaynen afarag n ahaket
9 Ahaket ad ilu tǝfǝrray ǝɣlaynat tǝsǝwad ǝgânen daɣ lin wa n ǝlǝsǝl. Fǝl aganna wa n agala, šisǝwad šin, tǝmos tǝzzǝgrǝt-nasnat temeday n ǝɣil. 10 Amaran šisǝwad šin, a tanat-ǝkbǝlnat sanatat tǝmǝrwen n ǝgǝt ǝɣtanen fǝl sanatat tǝmǝrwen ǝn tǝbataqqat ǝn daroɣ a fǝl ǝzgarnat tallaɣen n ǝzrǝf ǝttafnat tǝzabaten n ǝzrǝf. 11 Aganna wa n tamasna ǝnta da ad t-alsinat tǝsǝwad ǝmosnen temeday n ǝɣil, ǝkbalnat-tanat sanatat tǝmǝrwen n ǝgǝt ǝn tǝggart ǝlânen sanatat tǝmǝrwen ǝn tǝbataqqat. Igǝttan win akkiyyan daɣ-san ila šizabaten n ǝzrǝf ǝzgarnat fall-asan tallaɣen s ǝntanatay da ǝgânat daɣ ǝzrǝf. 12 Šisǝwad šin du-z-ǝwǝrnen tǝɣǝrt ta n ataram, ad ǝqqǝlnat sǝmmosat tǝmǝrwen n ǝɣil, ǝkbǝlan-tanat maraw gǝttan ǝlânen šizabaten n ǝzrǝf ǝzgârnat fall-asan tallaɣen n ǝzrǝf, ǝwâran marawat tǝbataqqaten s ǝntanatay da ǝgânat daɣ ǝzrǝf. 13 Aganna wa n ǝmi amaran, ǝntada temeday n ǝɣil a fall-as tǝmos tǝɣǝrt n afarag. 14-15 Ǝkkullu n iyyan daɣ gannatan n ǝmi n afarag, ad t-ǝggǝznat tǝsǝwad ǝmosnen maraw ɣallan ǝd sǝmmos, ǝkbǝlan-tanat karad gǝttan, ǝwarnen karadat tǝbataqqaten fǝl ǝkkullu n iyyat daɣ tamawen n ǝmi n afarag n ahaket. 16 Šisǝwad kul šin ǝɣlaynen tǝfǝrray ǝganat daɣ lin wa n ǝlǝsǝl. 17 Šibataqqaten ǝn gǝttan win, ǝganat daɣ daroɣ, mišan šizabaten-nasan, ǝd tallaɣen šin daɣ-san ǝssadnen osaɣnat igǝttan, kul azrǝf a daɣ ǝganat. Iɣafawan ǝn gǝttan win ils-en ǝzrǝf. 18 Iga afǝr iyyan a z'ikǝrirǝyan ɣur ǝmi n afarag wa iɣlayan ahaket. Afǝr wa z'ikǝrirǝyan da, isassag-ay daɣ ǝddǝlugan iga awedan isinnahalan tǝla ǝn madas, ǝgan daɣ lin wa n ǝlǝsǝl, irtayan ǝd tǝduft n ayfǝd, tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhây tǝzuɣay, ǝd ta zaggaɣat. Tǝmos tǝzzǝgrǝt-net sanatat tǝmǝrwen n ǝɣil, imos sǝmmos ɣallan sa sǝr afalla, zun tǝsǝwad šin ǝɣlaynen afarag. 19 Afǝr wa ikarayrayan ǝttâfan-tu ǝkkoz gǝttan ǝlânen šibataqqaten ǝkkozat ǝgânen daɣ daroɣ. Šizabaten ǝn gǝttan win, ǝd tallaɣen šin daɣ-asnat ǝssadnen, ig-enat daɣ ǝzrǝf. Iɣafawan ǝn gǝttan deɣ ils-en daroɣ. 20 Šimǝttitay n ahaket kul ǝd šin afarag-net, daroɣ a daɣ ǝganat.
Ǝddukad n urǝɣ, d ǝzrǝf, ǝd daroɣ win du-tǝrag tamattay
21 Ǝnta da ǝlxisab n aratan win daɣ iga ahaket wa iha ǝssǝnduq wa n tassaq. Ǝlxisab wa Musa a t-isassagan i Kǝl-Lebi, azzar-asan Itamâr wa n ag Harun wa n ǝlimam ǝn Kǝl-tǝkutawen. 22 Aratan kul win as omar Amaɣlol Musa ig-en Besalel wa n ag Uri wa n ag Xur, imosan iyyan daɣ tawšet ǝn Yahuda. 23 Idhal-tu Oholǝyab, wa n ag Axisamak, n iyyan daɣ tawšet ǝn Dan, imosan awedan issanan amaknaw ǝn tǝhun šin ǝlanen almaqam, d igi ǝn fototan, itaggu ǝzzǝnǝfan n ǝddǝlugan win azamay ǝs tǝduft n ayfǝd tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhay tǝzuɣay, ǝd ta zaggaɣat ǝd lin wa n ǝlǝsǝl.
24 Urǝɣ kul wa d-iddewan daɣ širgiten ǝn Kǝl-Israyil, itawasataɣmal daɣ akaras n adag wa zǝddigan, imos ǝddukad-net agim ǝn kilaw. Takkot ten tǝga ǝs tǝsǝkǝt ta n adag wa zǝddigan.
25 Azrǝf amaran wa d-iddewan ɣur tuddant ǝn tamattay, imos ǝddukad ǝn karad gim ǝn kilaw d ǝkkozat tǝmad d ǝkkozat tǝmǝrwen. Takkot ten tǝga ǝs tǝsǝkǝt ta n adag wa zǝddigan. 26 Azrǝf wa ixsâl-du daɣ ǝddukad ǝn sǝdis gramatan n ǝzrǝf win ikfa ǝkkullu n awedan daɣ sǝdisat tǝmad n ǝgim ǝd karad ǝd sǝmmosat tǝmad ǝd sǝmmosat tǝmǝrwen n awedan, win obaznen ɣur sanatat tǝmǝrwen n awatay ǝkkan afalla, s ǝntanay a ǝddunnen. 27 Karad gim d ǝkkozat tǝmad ǝd sanatat tǝmǝrwen ǝn kilaw n ǝzrǝf za ǝganat daɣ-san temeday ǝn tǝbataqqat šin fǝl ǝɣtan gǝttan n adag wa zǝddigan, ǝd win ǝfǝr wa n anaɣer, daɣ-adi karadat tǝmǝrwen ǝn kilaw d ǝkkoz as tǝga ǝkkullu ǝn tǝbataqqat. 28 Sanatat tǝmǝrwen ǝn kilaw amaran win d-ǝqqimnen, tawagganat sǝr-san tǝzabaten ǝn gǝttan, tawasalsan sǝr-san ɣafawan ǝn gǝttan, ǝganat daɣ-as deɣ tallaɣen šin tan-osaɣnen.
29 Daroɣ ketnet wa ǝragan Kǝl-Israyil imos ǝddukad n ǝššin gim ǝn kilaw d ǝkkozat tǝmad ǝd sanatat tǝmǝrwen d iyyan. 30 Ǝnta a daɣ ǝganat tǝbataqqaten šin ɣur ǝmi n ahaket wa n ǝmǝnǝy, ǝd majmar wa zǝwwǝran ǝd mutag-net kul, d ǝssǝrir imišaragragan wa t-ihan. 31 Šibataqqaten šin gǝttan n afarag, ǝd šin gǝttan win ǝmi-net, ǝd tǝmǝttǝytay kul šin ahaket ǝd šin afarag-net, awen ketnet daroɣ wen da a daɣ iga.