37
Ǝssǝnduq wa n tassaq
1 Iga Besalel ǝssǝnduq igan daɣ tǝggart. Tǝmos tǝzzǝgrǝt-net ǝššin ɣallan d aganna, imos aɣil d aganna sa sǝr tasaga, tǝmos tǝzzǝgrǝt-net ta n afalla aɣil d aganna. 2 Inkar s afalla-net d ammas-net iɣrad-tan ǝsǝlǝl n urǝɣ wa izdaran, tǝzzar iga i fayyan-net abǝl n urǝɣ. 3 Iwat ǝkkoz ɣabatan n urǝɣ, ig-en daɣ ǝkkozat tǝɣǝmmar n ǝssǝnduq, ǝggazan ǝššin tama-net iyyat, ǝggazan ǝššin tama ta hadat. 4 Iga sanatat tallaɣen ǝn tǝggart, issǝls-enat urǝɣ. 5 Issad tallaɣen šin daɣ ɣabatan win ǝhanen tamawen n ǝssǝnduq, y a das-ǝqqǝlnat isǝssiway as z'itamadkal. 6 Iwat ǝsǝhǝr wa n ǝsǝknǝf daɣ urǝɣ wa izdaran. Ǝsǝhǝr wa tǝmos tǝzzǝgrǝt-net ǝššin ɣallan d aganna, imos aɣil iyyanda d aganna sa sǝr tasaga. 7-8 Iwat ǝššin kǝruban daɣ urǝɣ ig-en daɣ sanatat tamawen šin gazzolnen n ǝsǝhǝr wa n ǝsǝknǝf. Awen iga ǝs tǝmǝwit as ǝsǝhǝr wa ǝd kǝruban win ǝššin a zun as ǝgân ewet iyyanda. 9 Angalosan win kǝruban a, ǝmmoran ǝfrutan-nasan, ǝgân sǝr-san telay y ǝsǝhǝr n ǝssǝnduq, amaran nimaswadan ǝššiggan daɣ ǝsǝhǝr.
Tabǝl ta ǝggarnat tǝgǝlwen
10 Iga Besalel daɣ tǝggart tabǝl tǝmosat ǝššin ɣallan sa sǝr tǝzzǝgrǝt, tǝmos aɣil iyyanda sa sǝr tasaga, tǝmos tǝzzǝgrǝt-net ta n afalla aɣil d aganna. 11 Tǝtawasalsa urǝɣ wa izdaran itawagg-as deɣ ǝbǝl n urǝɣ. 12 Ig-as efay iyyan igân dǝnnǝg aɣarɣar-net ahaku ogdan d ǝdekǝl, issǝɣlay-tu abǝl n urǝɣ ǝntada. 13 Issǝwat ǝkkoz ɣabatan ig-en daɣ ǝkkozat tǝɣǝmmar daɣ tǝnǝmiwǝla n ǝkkullu n adar ǝn tabǝl. 14 Iɣabatan win nimahazan d afay wa iɣlayan tabǝl, tǝzzar ǝssadnat daɣ-san tallaɣen šin z'ǝqqǝlnen isǝssiway-net as za tǝtamaway. 15 Tallaɣen šin, ig-enat daɣ tǝggart, tǝzzar issǝls-enat urǝɣ, ǝqqalnat arat as tǝtamaway tabǝl. 16 Iga ikassan issǝns-en fǝl tabǝl ta. Ikassan win ǝgân daɣ attablatan, d arat ǝn tǝfataylalen, ǝd tǝkǝbren ǝd kǝbran win taggaznat tǝkutawen šin tawanɣalnen ǝmosnen aratan tamašwinen. Ikassan win kul urǝɣ wa izdaran a daɣ ǝgan.
Ǝsǝkbǝl ǝn fǝtǝlaten
17 Iga Besalel ǝsǝkbǝl ǝn fǝtǝlaten igân ewet iyyanda daɣ urǝɣ wa izdaran. Tǝsaddakamt-net, ǝd tadra-net, ǝd tǝdangazen-net, ǝd tǝkǝrdaf-net, ǝd tǝjigawen-net, kul ǝgân dǝr-ǝs ewet iyyanda. 18 Sǝdis lǝɣwan a ǝgmǝdnen tadra n ǝsǝkbǝl ǝn fǝtǝlaten, ǝkkullu n aganna-net ǝwaran-tu karad. 19 Ǝkkullu n alawaɣ ila karadat tǝkawkawen as ibilalaɣ ares-nasnat. Šikawkawen šin kibaratnat. 20 Ammas ǝn tadra n ǝsǝkbǝl ǝn fǝtǝlaten en ad t-ǝggǝznat karadat tǝjigawen as akkiyyat ibilalaɣ ăres-net, kibaratnen. 21 Ilǝɣwan win sǝdis a, ǝkkullu n ǝššin daɣ-san edag iyyanda a daɣ in-ǝntan daɣ tadra, tǝlla daw-san tǝkǝrduft. 22 Šikǝrdaf šin tadra n ǝsǝkbǝl en, ǝd sǝdis lǝɣwan win tanat-ǝgmadnen, kul ǝgân ewet iyyanda, daɣ urǝɣ wa izdaran. 23 Iga ǝssayat tǝdangazen šin z'ǝqqǝlnen fǝtǝlaten, ǝntanatay harkid mutag-nasnat ǝmosnen šilǝmidas, d attablatan, ǝganen daɣ urǝɣ wa izdaran. 24 Edag ǝn karadat tǝmǝrwen ǝn kilaw n urǝɣ a daɣ iga ǝsǝkbǝl ǝn fǝtǝlaten ǝd mutag-net.
Majmar wa n ǝsǝqqǝd n aḍutan win ǝzodnen
25 Itawagga majmar wa n ǝsǝqqǝd n aḍutan win ǝzodnen igan daɣ tǝggart. Imos aɣil fǝl aganna kul, amaran sa sǝr afalla iga ahaku n ǝššin ɣallan, tawaggan-as ǝskawan a dǝr-ǝs ǝmosnen arat iyyanda. 26 Iɣrad ǝtǝwǝsǝlsa n urǝɣ wa izdaran, gǝr za sa sǝr afalla wala iskawan-net, wala deɣ ǝkkozat tamawen-net, itawagg-as ǝbǝl n urǝɣ a t-id-iɣlayan. 27 Iga ǝkkoz ɣabatan n urǝɣ, ig-en fǝl ǝššin gannatan ǝn majmar win namaswadnen, daw ǝbǝl-net, tawassadnat daɣ-san sanatat tallaɣen y a sǝr-ǝsnat itamadkal. 28 Tallaɣen šin sanatat en, tǝggart a daq-qanat iga, issǝls-enat urǝɣ.
29 Isassaga widi wa zǝddigan iskâtan y Amaɣlol, d aḍutan ǝzodnen win tǝfrǝnt. Awedan issânan amaknaw n aḍutan win ǝzodnen a isassaga ǝššǝɣǝl wen.