36
1 «Besalel d Oholǝyab d aytedan kul win ǝlanen madas, ikf-en Amaɣlol masnat ǝd tayttay n ad agin aratan kul win as z'itaggu ǝlɣibada daɣ adag wa zǝddigan, inimannak awen d arat kul was omar Amaɣlol.»
2 Isassaɣra-du Musa Besalel, d Oholǝyab, d aytedan win hadatnen ikfa Amaɣlol madas aggen, simatagan ǝrdân deɣ s amaknaw n ǝššǝɣǝlan win den. 3 Iga Musa daɣ fassan-nasan širgiten šin d-ewayan maddanǝs n Israyil y ad tǝwǝggin aratan kul win as z'itaggu ǝlɣibada n Amaɣlol. As iga awen, aɣora kul, osân-du aytedan a d-ewaynen i Musa širgiten, gar-essan ǝd man-nasan. 4 Tǝzzar ǝnkaran aytedan kul win ǝlanen madas daɣ ǝššǝɣǝlan n adag wa zǝddigan, ǝzzǝrazan ǝššǝɣǝl, ǝkkan 5 Musa ǝnnan-as: «Aytedan ewayan d aratan ogarnen awa as tǝga addararat y igi n ǝššǝɣǝl was omar Amaɣlol.» 6 Den daɣ ad omar Musa s ad itǝwǝnnu y aytedan ǝn ɣawnatan kul: «A du-wǝr-ilǝs awedan waliyyan gǝr za alǝs wala tantut aggay ǝn širgit waliyyat y ǝššǝɣǝl wen!», tǝzzar ǝrazan aytedan daɣ aggay ǝn tǝrgiten, 7 fǝlas širgiten šin tawagrawnen, ǝgdânat y ad ǝɣrǝdan ǝššǝɣǝlan kul amaknaw, fadda a du-tǝwǝglǝznat.
Imutag win ǝsǝfǝl n ahaket
8 Ǝssǝntan aytedan win ǝlânen madas daɣ akaras n ahaket: ǝgan marawat tǝsǝwad ǝn tǝbdoq, ǝd tǝnǝlwa ǝn lin ilan taɣrǝst, ǝrtaynen ǝd tǝduft n ayfǝden tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhây tǝzuɣay, ǝd ta zaggaɣat, amaran ǝdlâgnat ǝs kǝruban. 9 Tǝzzǝgrǝt ǝn tǝsǝwǝt iyyadda, tǝmos sanatat tǝmǝrwen n ǝɣil d ǝttam, amaran tasaga-net tǝmos ǝkkoz ɣallan; awen da dǝr z'agdinat tǝsǝwad šin hadatnen kul. 10 Tawasaɣnat sǝmmosat daɣ tǝsǝwad šin ǝs tǝsǝgwen-nasnat, itawagga awen da i sǝmmosat šin hadatnen. 11 Tǝsǝwǝt ta tazzarat tǝhat tama ǝn šin osaɣnen da, isammatartar daɣ tama-net šinjar ǝganen taddalǝt ta n jǝnnawan, iga awen da i tǝsǝwad šin hadatnen ǝn sǝmmosat osaɣnen. 12 Tǝzzar iga sǝmmosat tǝmǝrwen ǝn tanjart daɣ tama ǝn sǝmmosat tǝsǝwad šin osaɣnen ǝstizarat, iga sǝmmosat tǝmǝrwen ǝn tanjart ǝntada daɣ tama ǝn sǝmmosat šin osaɣ daɣ tilkamat. Ǝkkullu ǝn tǝsǝwad nimawalnat šinjar-nasnat ǝd šinjar ǝn šin hadatnen. 13 Iga sǝmmosat tǝmǝrwen n ǝsǝrdǝf n urǝɣ, fǝl a sǝr-san ǝrtǝyan ǝššin gannatan win den, igâ awen ǝs tǝmǝwit as, ahaket a, imos arat iyyanda.
14 Izda ǝkkozat tǝmǝrwen ǝn tǝsǝwǝt, ǝgânen daɣ azaw, y a sǝr-ǝsnat agu ǝsǝfǝl y ahaket. 15 Šisǝwad šin kul ogdanat, ǝkkullu n iyyat tǝmos karadat tǝmǝrwen n ǝɣil, tǝmos ǝkkoz ɣallan sa sǝr tasaga. 16 Osaɣ sǝmmosat tǝsǝwad ǝwarnat aganna iyyanda, iga awen da i sǝdisat šin hadatnen ǝwarnat aganna ǝntanatay da. 17 Iga sǝmmosat tǝmǝrwen ǝn tanjart daɣ tama n ǝkkullu ǝn tǝsǝwǝt ta tǝhat tama ǝn šin osaɣnen. 18 Iga sǝmmosat tǝmǝrwen n ǝsǝrdǝf ǝn daroɣ y a sǝr-san itǝwisǝɣ ahaket, fǝl ad iqqǝl arat iyyanda.
19 Issǝfal ehan s ahaket igan daɣ agašek n akar, immuɣan daɣ tǝnǝɣmit, issǝlal-tu tǝsǝlsit iyyat tǝgat daɣ agašek issohen.
20 Iɣtas-du igǝttan ǝn tǝggart, isaffaltaq-qan, ǝssǝɣt-en y ad ǝkbǝlan ehan. 21 Igǝttan win ǝkkullu n iyyan daɣ-san ad tǝqqǝl tǝzzǝgrǝt-net maraw ɣallan, tǝqqǝl tǝffǝltǝq-net aɣil d aganna. 22 Ǝkkullu n ǝgǝt iga daɣ ǝmi-net ǝššin faškan nimallalnen, itawagga awen da i gǝttan kul win hadatnen n ahaket. 23 Iga sanatat tǝmǝrwen n ǝgǝt y ahaket fǝl aganna wa n agala. 24 Ǝššin faškan win ǝhanen ǝkkullu n ǝgǝt, akk iyyan ig-as tabataqqat a daɣ z'issǝd. 25 Iga sanatat tǝmǝrwen n ǝgǝt y aganna n ahaket wa n tamasna dă. 26 Igǝttan win ǝlân ǝkkozat tǝmǝrwen ǝn tǝbataqqat ǝganen daɣ ǝzrǝf. Ǝššin faškan win ǝhanen ǝkkullu n ǝgǝt, akkiyyan issâd daɣ tǝbataqqat-net. 27 Isammatag sǝdis gǝttan ǝn tǝggart faltoɣnen i tǝndǝq n ahaket ta n ataram. 28 Iga ǝššin gǝttan faltoɣnen win z'ǝqqǝlnen šiɣurad i tǝɣǝmmar šin ammas n ahaket. 29 Igǝttan win ǝššin a olân, osaq-qan sa sǝr ares, tǝzzar tosaq-qan tǝzǝbit iyyadda sa sǝr afalla, ǝqqalan šiɣurad i tǝɣǝmmar n ahaket. 30 Daɣ adi igǝttan win kul, ǝqqalan ǝttam ǝlânen marawat tǝbataqqaten ǝd sǝdisat ǝganen daɣ ǝzrǝf. Ǝkkullu n iyyan daɣ-san ila sanatat tǝbataqqaten.
31 Iga sǝmmos zegǝran ǝn tǝggart a z'ǝttǝfnen igǝttan win matartarnen daɣ tadalay n ahaket, 32 iga sǝmmos y aganna wa hadan, iga sǝmmos zegǝran wiyyad i tǝndǝq n ahaket ta n ataram. 33 Ǝzegǝr wa n ammas, okay daɣ tǝsǝggǝrigǝrǝyt ǝn gǝttan n ahaket, ɣur tama ta har ta hadat. 34 Izegǝran harkid gǝttan win den, issǝls-en urǝɣ, iga i gǝttan šizabaten n urǝɣ, s ǝntanatay a daɣ z'ǝssǝdan zegǝran.
35 Izda afǝr wa n anaɣer daɣ tǝduft n ayfǝd, tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhay tǝzuɣay, ǝd ta zaggaɣat, ǝd lin wa n ǝlǝsǝl, igan tezatay a daɣ idlâg ǝs kǝruban iga awedan isinnahalan tǝla ǝn madas. 36 Iqqan afǝr wa daɣ ǝkkoz gǝttan zawwarnen ǝn tǝggart ǝlsânen urǝɣ, ǝlân šizabaten ǝganen daɣ urǝɣ, ǝwaran ǝkkozat tǝbataqqaten ǝganen daɣ ǝzrǝf.
37 Izda afǝr iyyan a z'ikǝrirǝyan ɣur ǝmi n ahaket. Afǝr wa z'ikǝrirǝyan da, isassag-ay daɣ ǝddǝlugan iga awedan a tan-issânan, iga awen daɣ tǝduft n ayfǝd, tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhây tǝzuɣay, ǝd ta zaggaɣat, ǝd lin wa n ǝlǝsǝl. 38 Iga sǝmmos gǝttan zawwarnen ǝn tǝggart issǝls-en urǝɣ, ig-asan šizabaten n urǝɣ, iga tallaɣen ilsa urǝɣ, iga sǝmmosat tǝbataqqaten ǝn daroɣ.