35
Akaras n ahaket
Ǝzǝl wa n Tǝsanfawt
1 Iššedaw-du Musa Kǝl-Israyil kul, inn-asan: «"Alwajiban da win as danaɣ-omar Amaɣlol s a tan-nǝzǝmmizǝl": 2 Ǝssuk kul sǝdis adan a daɣ-as za tawašɣalnen, amaran ǝzǝl wa n ǝssa imos ǝzǝl ǝn tǝsanfawt. Iwar-kawan a tu-tagim ǝzǝl iskatan y Amaɣlol. Awedan kul wa išɣalan daɣ ǝzǝl wǝdi a daɣ-as tǝwǝkkǝsan man. 3 Wala ɣas ǝsǝrɣi ǝn temsay daɣ ɣawnatan-nawan wǝr tǝlem turagat-net daɣ ǝzǝl wa n tǝsanfawt.»
Širgiten šin d-ewayan Kǝl-Israyil
4 Igla Musa daɣ amel n alwajiban n Amaɣlol i tamattay n Israyil, inn-asan: 5 «Šidǝwat-du gar-ewwan širgiten y Amaɣlol. Aytedan kul win as ǝrdan man-nasan s awen, a d-awǝyan y Amaɣlol širgiten ǝganen daɣ urǝɣ, d ǝzrǝf, ǝd daroɣ, 6 ǝd tǝduft n ayfǝd, tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhay tǝzuɣay, ǝd ta zaggaɣat, ǝd lin wa n ǝlǝsǝl, d azaw. 7 ǝd gǝškan n ayfǝd ǝmmuɣnen daɣ tǝnǝɣmit, d agašek iyyan issohen, d ešǝkan ǝn tǝggart, 8 ǝd widi wa n ǝsǝrɣi ǝn fǝtǝla, d aḍutan ǝzodnen win taggaznen widi wa zǝddigan, d aḍutan win ǝsǝqqǝd.» (note: widi wa itawazwayan y aytedan win sannafrana, itawazway deɣ y aratan win ǝskatnen s adag-in wa zǝddigan.)
9 Ǝd tǝhunt iyyat tǝlat karad ǝlmawan tǝgat esǝm onǝyks, ǝd tǝhun šiyyad ǝlanen almaqam, ǝttibbatnen daɣ tǝssǝwen-nasnat n urǝɣ y a sǝr-ǝsnat idrǝɣ efod ǝd šikǝst ta n tawǝy idmaran.
10 Aytedan-nawan kul win ǝlanen madas idawanet-du y ad agin arat was omar Amaɣlol a t-imosan: 11 ehan wa zǝddigan, d ahaket-net ǝd sǝfal-net, ǝd sǝrdaf-net, ǝd gǝttan win faltoɣnen ǝd zegǝran, ǝd gǝttan win zawwarnen ǝd tǝbataqqaten; 12 d ǝssǝnduq wa n tassaq, ǝd tallaɣen, d ǝsǝhǝr wa n ǝsǝknǝf, d ǝfǝr wa n anaɣer. 13 ǝd tabǝl, tǝlat tallaɣen, ǝd mutag-net kul, ǝd tǝgǝlla ta tǝnassit dat Amaɣlol, 14 d ǝsǝkbǝl ǝn fǝtǝlaten, ǝd mutag-net, ǝd fǝtǝlaten-net, ǝd widi wa n ǝsǝrɣi-nasnat, 15 ǝd majmar wa n ǝsǝqqǝd n aḍutan win ǝzodnen, ǝd tallaɣen-net, ǝd widi wa zǝddigan, d aḍu izodan wa itaqqadan, d ǝfǝr wa z'ikǝrirǝyan daɣ ǝmi n ahaket, 16 ǝd majmar wa zǝwwǝran n ǝsǝqqǝd ǝn tǝnufa, d ǝssǝrir-net wa imašaragragan ǝn daroɣ, ǝd tallaɣen-net, ǝd mutag-net kul; d ǝɣlal wa n alwallatan ǝd tǝsǝkbǝlt-net; 17 ǝd tǝsǝwad šin ǝɣlaynen afarag, ǝd gǝttan-net ǝd tǝbataqqaten-nasan, d ǝfǝr wa z'ikǝrirǝyan ɣur ǝmi n afarag; 18 ǝd tǝmǝttǝytay n ahaket, ǝd šin afarag-net, ǝd sǝdas-nasan; 19 ǝd tǝbǝddaɣ tiwaẓdanen ǝskâtnen y ad tawaqqannat daɣ ǝššǝɣǝlan win ǝlɣibada-nin daɣ adag wa zǝddigan. Šibǝddaɣ šin ǝskatnat s a tanat-itaqqan Harun s ǝnta a imosan ǝlimam wa zǝwwǝran. Ǝd šin za taqqanan bararan ǝn Harun daɣ ǝššǝɣǝl-nasan wa n tišit ǝn limaman.
20 Ǝɣradan Kǝl-Israyil kul efel ǝn Musa. 21 Tǝzzar ǝglan-du aytedan kul win ǝqbalnen tehakkay s ǝwǝl iyyanda, ewayan-du širgiten-nasan ǝmosnat Šinufa y Amaɣlol. Šinufa šin ǝntanatay a daɣ z'agu ahaket wa n ǝmǝnǝy ǝd sǝkras-net, agin sǝr-ǝsnat mutag win as taggin ǝššǝɣǝlan kul win ǝlɣibada, agin sǝr-ǝsnat deɣ sǝlsa win zaddognen ǝn limaman. 22 Osan-du Meddan ǝd tǝdoden win ǝllǝllatnen, ewâyan-du ǝzzǝnǝfan kul n uɣǝnan n urǝɣ, ǝmosnen šizabaten, ǝd tǝsǝndar, ǝd lambatan, d ǝlkǝzan, ǝkfan-tan ǝmosan tǝnafut y Amaɣlol, iddew awen ǝd tǝmǝtǝkwayen šin d ǝttǝmalnen. 23 Aytedan win ǝlanen tǝduft n ayfǝd, tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhay tǝzuɣay, ǝd ta zaggaɣat, ǝd lin, d azaw, ǝd gǝškan ǝn karran ǝmmuɣnen daɣ tǝnǝɣmit, ǝd gǝškan wiyyad ǝssohatnen, kul ewayan-tan-du. 24 Aytedan win ǝssǝwarnen azrǝf ǝd daroɣ aganna y Amaɣlol, ewayan-tan-du ǝntanay da, win ǝššedawnen eškan ǝn tǝggart tǝha tǝnfa daɣ ǝššǝɣǝlan win, ewayan-tan-du. 25 Ewaynat-du tǝdoden ǝlânen madas lin ǝd tǝduft n ayfǝden tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhây tǝzuɣay, ǝd ta zaggaɣat, a d-ǝllâmnat ǝs fassan-nasnat. 26 Šidoden kul šin as igraz awen ǝlanat madas, ǝllamnat-du azaw. 27 Ewayan-du muzaran ǝn tamattay šihun ǝmosnen onǝyks ǝd tǝhun šiyyad ǝlânen almaqam a z'attabbatnen daɣ tǝssǝwen-nasnat y a sǝr-ǝsnat idrǝɣ efod ǝd šikǝst ta n tawǝy idmaran. 28 Ewayan-du aḍutan ǝzodnen, ǝd widi wa n ǝsǝrɣi ǝn fǝtǝla ǝd widi wa zǝddigan, d aḍutan win taqqadnen. 29 Kǝl-Israyil kul win as ǝllǝllen wallan-nasan, gǝr meddan wala šidoden, ewayan-du širgiten šin as ǝrdan man-nasan, ǝmosnat tǝnafut y Amaɣlol, y a sǝr-ǝsnat aknin ǝššǝɣǝlan win as omar Amaɣlol Musa.
Ǝsǝnti ǝn maššaɣalan daɣ mutag win akaras n ahaket
30 Inna Musa i Kǝl-Israyil: «Ǝnǝyat: Besalel wa n ag Uri imosan ahaya ǝn Xur, n iyyan daɣ tawšet ta n Yahuda, ǝnta a sannafrana. 31 Sinahala-du fall-as ǝzǝzzǝbbi n Rux ǝn Mǝššina, y ad t-agaɣ awedan iknân tǝla ǝn madas, ikna tǝla ǝn tayttay ǝd masnat, issân ǝššǝɣǝlan kul. 32 Issan igi n ǝnnizam olâɣan was z'agin ǝššǝɣǝlan win urǝɣ d ǝzrǝf ǝd daroɣ, ifrâg deɣ ǝzǝmmizǝl-net. 33 Issân deɣ amaknaw ǝn tǝhun šin ǝlanen almaqam, d ǝsǝttǝbbi-nasnat daɣ tǝssǝwen-nasnat, ila madas n igi n aratan daɣ ašǝk, xasil issan aratan di kul. 34 Ikf-ay deɣ Ǝmǝli masnat n ǝsǝssǝɣri-nasan y aytedan, ǝnta harkid Oholǝyab wa n ag Axisamak, imosan alǝs ǝn tawšet ǝn Dan. 35 Ikf-en madas n igi n ǝššǝɣǝlan, a obazan ɣur amaknaw ǝn tǝhun šin ǝlanen almaqam, ikka igi ǝn šaššelan n aratan, d igi n ǝddǝlugan ǝs tǝduft n ayfǝden tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhây tǝzuɣay, ǝd ta zaggaɣat, ǝd lin wa n ǝlǝsǝl, ǝd tazatay ǝn tǝbǝddaɣ, xasil issân ǝššǝɣǝlan kul ǝganen ǝs masnat ǝd madas.»