34
Isǝlluman win aynaynen n ǝššǝriɣa
1 Omar Amaɣlol Musa inn-as: «Aga-du ǝššin sǝlluman ǝn tǝhunt olanen ǝd win tǝrze, a fall-asan ǝktǝbaɣ alwajiban win ǝwarnen win azzarnen. 2 Sǝmmutǝg i tufat aɣora. As ifarayray anay, taggazzayaɣ afalla n ǝdɣaɣ wa n Sinay, tǝqqǝlaɣ-i fall-as. 3 A du-wǝr-tidawa d awedan waliyyan! A tu-wǝr-imǝl harwada awedan waliyyan ihân adɣaɣ, wala ǝmudar idânan dagma-net, gǝr za daɣ aharay wa zǝwwǝran, wala deɣ wa ǝndarran. » 4 Iga-du Musa ǝššin sǝlluman ǝn tǝhunt olânen ǝd win azzarnen. Harwa aɣora n ǝzǝl wa hadan ad iggǝzzay adɣaɣ wa n Sinay imos as awen daɣ as t-omar Amaɣlol. As igla ewây ǝššin sǝlluman ǝn tǝhunt.
5 Izzǝbbat-du Amaɣlol daɣ agarak, ihoz-tu Musa den da, isataddu Ǝmǝli tǝzzǝwwǝrt n esǝm-net: «Amaɣlol». 6 Dǝffǝr adi okay dat Musa isataddu tǝzzǝwwǝrt n esǝm-net igannu: «Illikan as nak a imosan Amaɣlol! Ǝmosaɣ Ǝmǝli n ǝmǝhhenǝn, n ǝmǝggi n arraxmat, as izzǝwat alham-net, ǝlluɣ-net d alɣadala-net ǝknân igǝt. 7 Ǝlluɣ-in sinǝfililaq-qu har hayawan win ǝgim, surifa arak mazalan, ǝd lahanan, ǝd bakkadan. Dǝr iga awen da, awedan igân arak ǝmazal wǝr das-xǝkkǝmaɣ as wǝr iɣšed wala. Kalar ad t-awwaddaba, awwaddabaɣ bararan-net, d ǝzzurrǝyya-net har hayawan-net win karad madeɣ win ǝkkoz.» 8 Tarmad as issǝjad Musa y Amaɣlol iɣbad-tu. 9 Inn-as: «Ya Ǝmǝli, dad zamas ǝle dat-ǝk udǝm, onsayaq-qay Ya Ǝmǝli-nin, a du-tagla tidawa dǝr-na. Ǝssana wǝllen as, aytedan win inǝxram a mosan, mišan surǝf-anaɣ arak mazalan-nanaɣ ǝd bakkadan-nana, taga daɣ-naɣ iduf n as nǝmos tamattay-nak.»
Ǝšǝššinǝy n arkawal ǝn tassaq
10 Inna Amaɣlol i Musa: «Ǝnǝy, a dǝr-wan agaɣ arkawal ǝn tassaq. Dat tamattay-nak kul ad z'aga tǝlmǝɣjujaten as wǝr kala ad itawanay ǝnnuɣ-nasnat fǝl amadal, daɣ a tǝqqal tawšet. Ǝddi ad tǝnǝyam kay ǝd Kǝl-Israyil kul awa dǝr ogdanat tǝjujab šin za nagu nak dǝr-ǝk.»
11 «Ǝlkǝmat s ǝlluɣ y awa as kawan-omara daɣ ǝzǝl wa, nak amaran a dat-wan ǝstǝɣaɣ Amoritatan, ǝd Kananitatan, ǝd Xitatan, ǝd Fǝrizitatan, ǝd Xiwitatan, ǝd Yebusatan. 12 Ǝnkǝdat wǝllen y a tu-tǝmǝl tassaq iyyat gar-ewwan ǝd Kǝl akal wa za tǝggǝzam ǝddi, fǝl a kawan-wǝr-ewayan s igi n arak mazalan win taggin. 13 Kalar dagdagat idaggan win fǝl saqqadan šikutawen-nasan, taddagdagam ǝssǝnǝman-nasan, tǝkǝrǝmkǝrǝmam isannalan win ǝssǝxtan y ǝssǝnǝman win den. 14 Ad wǝr tǝssǝjǝdam y a iqqal ǝmǝli, fǝlas nak Amaɣlol, esǝm-in: "Ǝmǝli wa wǝr nǝqǝbbǝl a imosan akna." 15 Daɣ adi ǝnkǝdat wǝllen y a tu-tǝmǝl a imosan tassaq gar-ewwan d aytedan n akal wǝdi. Ǝlɣibada wa taggin y ǝssǝnǝman-nasan, imos zun ǝzzǝna. Amaran as tu-taggin ǝggazan šin igi ǝn tǝkutawen a daɣ-wan ǝgmǝyan a dasan-in-tammagnem. As tan-in-tosam ad tǝggǝzam tazak n ad tatšim šikutawen šin den. 16 Tǝggǝzam deɣ tazak n ad tǝzzǝzlǝfam aššessan i maddanǝwan, awǝynat-tan ǝntanay da s ad agin ǝzzǝna a t-imosan ǝlɣibada n ǝssǝnǝman. 17 Ad wǝr tǝtaggim ǝssǝnǝman daɣ tǝzoli tǝlliɣlaɣat.»
18 «Taggiwat amud wa n tǝgǝlla wǝr nǝkuf daɣ ǝssa adan win ǝttǝmalnen daɣ tǝllit tas inta awatay wa n Kǝl-Ǝlyǝhud s asaway was kawan-omara. Tallit tǝdi da a daɣ kawan d-ǝssǝrdaɣa Masar. 19 Id t-illa ara wa azzaran kul i-nu, harkid win hǝrwan-nawan. Ara wa azzaran imosan yay, gǝr za tǝl-ay tǝst, wala tilay, wala deɣ taɣat, kul ilzam-kawan a di-tu-takfim. 20 Mišan, kud tajat a tǝsaɣɣafaddet, tǝsǝmmǝskǝlam rures ajaɣol, as tu-wǝr-illa adi, tarzim iri-net ad axsǝy. Amaran bararan win ɣǝfǝdda daɣ tamattay-nawan, windi kul takkasat-tan s arat iyyan. A du-wǝr-tasim edag-in wa zǝddigan tǝsikarayrayam ifassan. 21 Sǝdis adan n ǝššǝɣǝl a tǝlam daɣ ǝkkullu n ǝssuk, amaran ǝzǝl wa n ǝssa zǝrǝzat daɣ-as ǝššǝɣǝl a iqqal, ǝs wala ɣas iqqal abaraz madeɣ allay ǝn tǝwǝgas. 22 Sǝbdǝd amud wa n ɣarat ta tazzarat n awa tǝnbala daɣ tǝwǝgas-nak, ɣur tamert ta daɣ za talǝyam šiɣaɣanen šin azzarnen n alkama, tagim deɣ amud wa n ǝɣrud ǝn ɣarat. 23 Meddan kul iwar-tan a d-asin ǝbdǝdan dat-i daɣ ǝkkullu n iyyan daɣ maddan win karad daɣ awatay, nak Amaɣlol Ǝmǝli n Israyil. 24 Ad abǝza daɣ tawšeten ikallan-nasnat, fǝl ad ittǝy amadal-nawan. Daɣ karadat tǝmeren šin daɣ du-za-tasim tǝbdǝdam dat-i nak Amaɣlol, wǝr t-illa awedan a z'ibǝgan akal-nawan ira abbaz-net. 25 A di-du-wǝr-tǝtawayam šinufa iha «xamira», y ad ǝrtǝynat ǝd tǝkutawen šin mudaran. Ad wǝr tǝsansim isan ǝn tǝkutawen šin ǝmud wa n Akkay har tanat-d-ifaw aɣora n ǝzǝl wa hadan. 26 Taway-du s ahan n Amaɣlol di n Ǝmǝli-nak, tafrǝnt daɣ tǝnfa ta tazzarat daɣ sǝgyak-nak. Ad wǝr tǝsaŋŋaɣ eɣayd s ǝx ǝn mas.»
27 Omar Amaɣlol Musa, inn-as: «Ǝktǝb alwajiban win, fǝlas ǝntanay a mosnen šigǝttawen n arkawal ǝn tassaq wa dǝr-ǝk namagga kay ǝd tamattay n Israyil.» 28 Iqqim Musa den da ɣur Amaɣlol har iga ǝkkozat tǝmǝrwen n ǝzǝl d ǝkkozat tǝmǝrwen n ahad, wǝr itša, za wǝr išwa. Ǝktaban sǝlluman ǝššin win ǝwaran alwajiban win maraw. Alwajiban win, ǝntanay a mosnen šigǝttawen n arkawal ǝn tassaq wa inamagga d Amaɣlol.
29 Izzǝbbat-du Musa adɣaɣ wa n Sinay, ittâf isǝlluman, s ǝntanay a fǝl ǝktaban ǝlwajiban n Amaɣlol, wǝr issen as, ǝmǝššiwal wa iga ǝd Mǝššina, eway-du s udǝm-net ǝmǝlǝwlǝw. 30 As inay Harun ǝd maddanǝs n Israyil ǝmǝlǝwlǝw wa iga udǝm-net da, tǝggaz-tan tasa n a t-in-ihazan. 31 Tǝzzar iɣr-en Musa, ikk-ay-du Harun, ǝd muzaran ǝn tamattay, iššewal-asan. 32 Dǝffǝr adi ǝhozan-t-idu maddanǝs n Israyil win hadatnen kul, imal-asan aratan kul win as t-omar Amaɣlol fǝl adɣaɣ wa n Sinay. 33 As dasan-iɣrad Musa awal, issǝwar udǝm-net afǝr. 34 A obazan ɣur amazay wen, id ikka dat Amaɣlol y a dǝr-ǝs imǝšiwǝl, ad ikkǝs afǝr wen. As d-iqqal y ad imǝl i maddanǝs n Israyil aratan win as itawamar, 35 ad ǝnǝyan ǝmǝlǝwlǝw n udǝm-net. As dasan-iɣrad ǝsuɣǝl n awa das-inna Amaɣlol, assalsu udǝm-net har assaɣat a daɣ ilas tewaɣlay n adag wa daɣ z'imǝšiwǝl d Amaɣlol.Dǝffǝr adi issuɣǝl Musa afǝr wen y udǝm-net, tǝzzar assals-ay har assaɣat a daɣ ilas tewaɣlay n adag wa daɣ z'imǝšiwǝl d Amaɣlol.