33
Amaɣlol wǝr z'idaw ǝd tamattay
1 Omar Amaɣlol Musa inn-as: «Abǝzat tarrayt tǝgmǝdam edag wa kay ǝd tamattay ta du-tǝkkasa daɣ Masar, takkim akal was ǝhada y Ibrahim, d Isǝhaq, ǝd Yaqub as ad t-akfaɣ y ǝzzurrǝyya-nasan. 2 A din-assaglaɣ angalos a dat-ǝk z'imǝlan, ǝstǝɣa dat-ǝk Kananitatan, ǝd Xitatan, d Amoritatan, ǝd Fǝrizitatan ǝd Xiwitatan ǝd Yǝbusatan. 3 As iga adi ad tǝfrǝgam iguz n akal wǝdi, imosan akal idnayan ax, ǝd turawat. Mišan wǝr dǝr-wan z'idawa nak iman-in, amaran wǝr tǝgmedam tazak n a kawan-ǝɣrǝdaɣ ahluk daɣ tarrayt, fǝlas inǝxram a tǝmosam.» 4 As tǝsla tamattay y arak salan win den ǝɣšadan man-net. Ab-as t-illa awedan itaqqanan uɣǝnan-net. 5 Ǝnta ammar a iga Amaɣlol Musa s a din-annu i Kǝl-Israyil: «Kawanay inǝxram a tǝmosam! Daɣ adi as ǝge wala amazay ǝddewa dǝr-wan a kawan-ǝɣrǝdaɣ ahluk. Daɣ adi ǝkkǝsat daɣ man-nawan uɣǝnan kul, ad ǝnǝyaɣ awa dawan-z-aga.» 6 Ǝfalan Kǝl-Israyil adɣaɣ wa n Xoreba, itawann-as deɣ Sinay, ɣas, ab-as taqqanan uɣǝnan-nasan.
Ahaket wa n ǝmǝnǝy
7 Id ǝzzǝbben, ad akku Musa y aɣaywan den, issǝkrǝs ahaket. Ahaket wa, ig-as esǝm: "Ahaket wa n ǝmǝnǝy". Aytedan kul win ǝranen ǝmǝnǝy n Amaɣlol, gammadan-du aɣaywan, takkin d ahaket wen. 8 As t-itakku Musa ad ǝbdǝdan aytedan kul daɣ mawan ǝn nan-nasan ǝswǝdan daɣ-as har iggǝz ahaket. 9 Iggâz Musa ahaket ɣas izzibbat-du alallag n ǝhu, imǝl ɣur ǝmi n ahaket, imǝšiwǝl Amaɣlol ǝd Musa. 10 Igda ad aggin Kǝl-Israyil alallag wen ɣur ǝmi n ahaket, ad ǝɣrǝdan ǝsǝjǝd, daɣ mawan ǝn nan-nasan. 11 Amaɣlol itaggu ǝd Musa ǝmǝššiwal wa da itaggu awedan d ǝmidi-net, dǝffǝr adi iqqǝl-du Musa aɣaywan. Mišan ǝmadhal-net Joswe ag Nun imosan alǝs aynayan, a din-aqqam daɣ ahaket wa n ǝmǝnǝy.
Agamay ǝn Musa ad idaw Amaɣlol ǝd tamattay-net
12 Inna Musa y Amaɣlol: «Ǝnǝy Ǝmǝli! Kay a di-omaran s ad izaraɣ i tamattay ta, mišan wǝr di-tǝssǝknaɣ awedan wa du-tǝssǝgla y a di-idhǝl. Tǝnneɣ-i deɣ tǝsinafranaɣ-i, tǝgeɣ-i awedan a dat-ǝk ilân udǝm. 13 Daɣ adi dad zamas ǝgrawa dat-ǝk udǝm, wǝdi susǝn-i assayfaten-nak. As iga adi a kay-ǝzdǝyaɣ ǝs tidǝt, ǝgrǝwa tǝnfa ǝn tǝla ta dat-ǝk ǝgeɣ y udǝm. Akta-du as tamattay a tamattay-nak a tǝmos.» 14 Ijjǝwwab-as Amaɣlol inn-as: «Nak iman-in as din-z-asaɣ idawa dǝr-ǝk, akfaq-qay tǝnagrit ǝn man.» 15 Inn-as Musa: «As dǝr-na wǝr tǝddewa kay iman-nak, wǝdi a dana-wǝr-tamǝra s ad nǝfǝl edag wa. 16 Fǝlas wǝr z'itǝwǝssǝn as nǝla ɣur-ǝk udǝm nak ǝd tamattay-nak ar s a dǝr-na tǝddewa. Wǝr danaɣ-z-izlǝy ǝd tǝmattiwen n ǝddǝnet šin hadatnen ar a dǝr-na tǝddewa.» 17 Inna Amaɣlol i Musa: «Arat wa tǝnneɣ ǝddi ǝmǝrǝdda, ǝnta da ad t-aga, fǝlas tǝgrawa tǝla n udǝm dat-i, illikan as kay daɣ a sannafrana.» 18 Onsay-tu Musa inn-as: «Ya Ǝmǝli, onsayaq-qay a di-tassakna tanaya-nak.» 19 Den daɣ ad inna Amaɣlol: «A dat-ǝk akǝya saknaɣ ǝlluɣ-in, satadda tǝzzǝwwǝrt n esǝm-in "Amaɣlol". Ad agaɣ arraxmat i win as areɣ, hǝnǝtte deɣ i win as areɣ.» 20 Ilas inn-as: «Mišan ya, wǝr tǝfregaɣ ad tǝnǝyaɣ udǝm-in, fǝlas wǝr t-illa aggadǝm ifragan ad inǝy udǝm-in, aglu iddar. 21 Illa dagma-nin adag da imosan tǝsǝlit s ǝnta daɣ za tǝbdǝda. 22 As d-okaya sakna tanaya-nin, a kay-ǝssǝlɣǝsa daɣ tǝdanɣayat ǝn tǝsǝlit ta, daɣ âs ǝssilsaɣ udǝm-nak s ǝfus-in, har akǝya. 23 Dǝffǝr adi ǝkkǝsa-du ǝfus-in, fǝl ad tǝfrǝgaɣ anay ǝn tǝɣǝrden-in, fǝlas wǝr tǝwǝnǝya sa sǝr udǝm.»