32
Terazay n arkawal d ǝsuɣǝl-net
Abarkaw wa n urǝɣ
1 As ǝnayan Kǝl-Israyil as Musa illolat-in wǝllen wǝr sǝr-san d-izzǝbbat adɣaɣ, ǝɣradan-du ǝmǝnǝy ɣur Harun ǝnnan-as: «Ǝnda, ag-anaɣ ǝmǝli a dana-z-izǝzzǝlulǝɣan, fǝlas wǝr nǝssen awa igan daɣ alǝs wa danaɣ-d-ikkasan daɣ Masar, a t-imosan Musa.» 2 Inn-asan Harun: «Abǝzat-du šizabaten n urǝɣ šin ǝqqannat tǝdoden-nawan, ǝd bararan-nawan, ǝd tǝbararen-nawan, tawǝyam-i-tanat-du.» 3 Ǝkkasan-du Kǝl-Israyil kul šizabaten-nasan šin urǝɣ, ǝkfan-tanat i Harun. 4 Obaz-tanat Harun, illǝɣlaq-qanat, inɣal urǝɣ wen daɣ mulu, iga daɣ-as šaššelan n abarkaw. Tǝzzar saɣɣaren ad gannin: «Kǝl-Israyil, ǝmǝli-nawan ǝddi was ǝnta kawan-d-ikkasan daɣ Masar!» 5 As inay Harun arat wen, ikras dat abarkaw en edag wa n ǝsǝqqǝd ǝn tǝkutawen inna: «Tufat ad t-imǝl ǝmud a za nagu imosan saɣmar n Amaɣlol!» 6 Aɣôra tufat as tǝga tamattay šikutawen šin tirǝkǝmmitnen ǝd tǝkutawen šin tassaq. Dǝffǝr awen ǝqqiman ad tattin sassin, ǝnkaran y ad agin amazay ǝn saday.
7 Den daɣ ad inna Amaɣlol i Musa: «Zabbat ǝmǝrǝdda, fǝlas tamattay-nak ta du-tǝkkasa daɣ Masar, tobaz tarrayt n ǝhluk, 8 ǝssitraban wǝllen agamad ǝn tarrayt tas tan-omara: Abarkaw a ǝgan daɣ tǝzoli tǝlliɣlaɣat, ǝssǝjadan-as, ǝgan-as šikutawen. Har ǝqqiman fadda gannin: "Kǝl-Israyil, ǝmǝli-nawan ǝddi was ǝnta a kawan d-ikkasan daɣ Masar!" 9 Daɣ adi tamattay ta, ǝnayaɣ awa tǝmos; ketnasan ǝhan ǝlmital a n aḷam ixraman. 10 Ǝmǝrǝdda, ad wǝr tǝgmǝya d a di-tǝgdǝlaɣ a fall-asan zǝmmizǝlaɣ aššar n alham-in assaba tǝmayyamayt-nasan, kay amaran aga daɣ-ak tawšet zǝwwǝrat.» 11 Mišan illǝɣdat Musa Amaɣlol inn-as: «Ǝmǝli, mafel tǝzamazalaɣ alham-nak fǝl tamattay-nak, dǝffǝr as tǝsitaɣmala tarna-nak, ǝd fǝrregat-nak as tu-wǝr-illa i dasnat-izmaran har tan-du-tǝkkasa daɣ Masar? 12 As tǝgeɣ ǝmazal wa, ad annin Kǝl-Masar: "Tišit n amaksan ɣas fǝl ikkas Ǝmǝli Kǝl-Israyil daɣ akal-nana, wǝr dasan-iga awen ar fǝl a daɣ-san iɣrǝd ikus ǝn tǝlǝmmest daɣ amadal n ǝdɣaɣan, assabu tamayyamayt-nasan fǝl tasayt n amadal. "Ya Ǝmǝli, igmǝdet-kay alham, tǝqqǝla-du daɣ batu-nak ta n ǝhluk ǝn tamattay-nak. 13 Akta-du eklan-nak Ibrahim, d Isǝhaq, d Israyil, s ǝntanay as tǝhada tǝnneɣ-asan: "Ad aga y ǝzzurrǝyya-nawan ǝsǝgǝt ogdan ǝd wa ǝgeɣ y etran, akfaq-qu akal was das-ǝgeɣ arkawal-net, ixyǝz-tu har faw."» 14 Tǝzzar iqqal-du Amaɣlol daɣ tǝnna-net ta n ǝhluk ǝn tamattay-net.
15 Izzǝbbat-du Musa adɣaɣ, ittaf ǝššin sǝlluman win tǝhunt, iwar akatab fǝl ǝkkullu n aganna, ǝktaban fall-asan alwajiban ǝn Mǝššina. 16 Isǝlluman win ǝššin a, Mǝššina iman-net as tan-iga, akatab deɣ ǝnta iman-net a dasan-t-issǝwaran. 17 Assaɣa wad isla Joswe i tǝɣaraten šin tǝtaggu tamattay, inna i Musa: «Sallaɣ i tǝrmuq tolât d ǝmǝgǝr daɣ aɣaywan.» 18 Inn-as Musa: «Kala kala, awen wǝrmad imos imaslan n aytedan ǝrzanen daɣ ǝmǝgǝr, za wala deɣ aytedan tiwarzanen. Imaslan win as salla den in aytedan a fǝl iga ǝmud, ǝssiggadan.» 19 Ǝhozan-in aɣaywan ɣas, ogga Musa abarkaw, ogga tamattay tǝzamaggaz. Awa das-iga awen daɣ aggad, igar-in isǝlluman win ittaf, tǝzzar ǝddǝgdagan daɣ ares n ǝdɣaɣ. 20 Obaz-du abarkaw wa ǝgan, igar-tu daɣ temsay, dǝffǝr adi iẓad awa daɣ-as d-iqqiman har t-iga egel, iga egel wen daɣ aman iššǝšw-en i Kǝl-Israyil. 21 Inna i Harun: «Ma dak-tǝɣšad tamattay a as tat-tǝsisugaɣ abakkad ogdan d awa tallabǝst?» 22 Inn-as Harun: «Ya Ǝššex-in, ǝgmaya daɣ-ak a kay wǝr iggez alham. Kay iman-nak da tǝssanaɣ awa dǝr ogda ǝsǝrǝg wa tǝtaggu tamattay a s igi n arak mazalan. 23 Assa a di d-ǝgan ǝnnan-i: "Ag-anaɣ ǝmǝli a danaɣ-izazzalalaɣan, fǝlas wǝr nǝssen awa iga alǝs wa dana-d-ikkasan daɣ Masar, a t-imosan Musa." 24 Assaɣa wǝdi da a tan-ǝssǝstana kud ih-en i ilan urǝɣ. Tarmad as d-ǝkkasan uɣǝnan-nasan, ǝkfan-i-tan. Tǝzzar ǝllǝɣlaɣaɣ uɣǝnan win, amaran abarkaw ǝddi wa daɣ-san igan. » 25 Igr-in Musa as šiyyit a iga Harun tamattay tǝga arat was tǝra igi-net, daɣ adi ig-asan ǝssǝbab n ad ǝqqǝlan ajjab daɣ nǝmmǝnjaɣ-nasan. 26 Ikka tama ǝn ɣawnatan ibdad den da inna: «Aytedan win ǝwarnen aganna wa n Amaɣlol akkinet-i-du!» Ǝddewan-in sǝr-ǝs Kǝl-Lebi. 27 Inn-asan: «Arat da was omar Amaɣlol, Ǝmǝli ǝn Kǝl-Israyil: "ǝkkullu n iyyan daɣ-wan obâz-du takoba-net, tǝssǝwǝlam ǝd ɣawnatan di, tǝnaqqim imǝdrayan-nawan, ǝd midawan-nawan, ǝd naragan-nawan."» 28 Ǝbbǝrdagan Kǝl-Lebi i Musa. Edag ǝn karad gim n awedan a ǝmmutnen daɣ Kǝl-Israyil ǝzǝl wen. 29 Tǝzzar inna Musa i Kǝl-Lebi: «Azalada aytedan a tǝmosam tiwaskatnen y ǝššǝɣǝlan win ǝqqalnen ǝlɣibada n Amaɣlol, fǝlas bararan-nawan ǝd mǝdrayan-nawan da wǝr tǝsammasandadam y a tan-tanɣim. Amaɣlol ya tǝzizabbe-du fall-awan albaraka daɣ ǝzǝl a.»
30 As affaw inna Musa i tamattay: «Kawanay tǝgam abakkad labasan. Ǝmǝrǝdda ad ǝlǝsaɣ ǝgǝzzǝy n ǝdɣaɣ, akkaɣ Amaɣlol. Mijas a ɣur-ǝs d-ǝgrǝwaɣ a dawan-issurǝf.» 31 Ǝmmǝk en daɣ as iqqal Musa Amaɣlol, inn-as: «Ya Ǝmǝli-nin! Tamattay tǝga abakkad labasan, imosan as ǝgan ǝmǝli n urǝɣ. 32 Onsayaq-qay a dasan-tǝssurǝfa! As wǝr iga adi tǝmǝsaɣ esǝm-in daɣ ǝlkǝttab ǝn tǝmǝddurt wa tǝktaba.» 33 Inn-as Amaɣlol: «Kala, wǝr z'ǝmǝsa daɣ ǝlkǝttab-in ar esmawan n aytedan win di-ǝmmǝzraynen. 34 Ǝmǝrǝdda aglu tǝsǝnnǝmiwǝla tamattay d adag wa dak-ǝmala tǝssǝnaɣ as azzar-ak angalos-in. Dǝr iga awen da ilkâm ǝzǝl a daq-qan z'awwaddaba fǝl abakkad wa ǝgan da.» 35 Agamay wa ǝgan Kǝl-Israyil daɣ Harun as dasan-iga ǝmǝli da, ig-asan abarkaw, eway-du s Amaɣlol as tan-iwwǝddab dǝffǝr awen.