31
Imaššaɣalan win z'aginen imutag n Ahaket
1 Inna Amaɣlol i Musa: 2 «Ǝnǝy: Besalel wa n ag Uri imosan ahaya ǝn Xur, n iyyan daɣ tawšet ta n Yahuda, ǝnta a sannafrana, 3 sannahala-du fall-as ǝzǝzzǝbbi n Rux ǝn Mǝššina, y ad t-agaɣ awedan iknân tǝla ǝn madas, ikna tǝla ǝn tayttay ǝd masnat, issan ǝššǝɣǝlan kul. 4 Issan igi n ǝnnizam olâɣan was z'agin ǝššǝɣǝlan win urǝɣ d ǝzrǝf ǝd daroɣ, ifrâg deɣ ǝzǝmmizǝl n ǝnnizam wen. 5 Issân deɣ amaknaw ǝn tǝhun šin ǝlanen almaqam, d ǝsǝttǝbbi-nasnat daɣ tǝssǝwen-nasnat. Ila madas n igi n aratan daɣ ašǝk, xasil issan aratan di kul. 6 Ad t-ǝššidǝwa d Oholǝyab, wa n ag Axisamak, imosan iyyan daɣ tawšet ǝn Dan, akfaɣ aytedan wiyyad ǝntanay da madas aggen, ǝrtǝyan ketnasan, ad kannin aratan kul win as kay-omara s igi-nasan, a tan-imosan: 7 Ahaket wa n ǝmǝnǝy, d ǝssǝnduq wa n tassaq d ǝsǝhǝr-net, ǝd mutag n ahaket ketnasan, 8 ǝd tabǝl ta fǝl nassinat tǝgǝlwen, d ǝsǝkbǝl ǝn fǝtǝlaten igan daɣ urǝɣ izdaran, ǝd mutag-nasan kul, ǝd majmar wa n ǝsǝqqǝd n aḍutan ǝzodnen, 9 ǝd majmar wa zǝwwǝran n ǝsǝqqǝd ǝn tǝkutawen, ǝd mutag-net kul, d ǝɣlal wa n ǝzǝzdǝg, d ǝsǝkbǝl-net, 10 ǝd sǝlsa win limaman, ǝd sǝlsa win zaddognen a z'itaqqan ǝlimam Harun ǝd bararan-net as taggin ǝššǝɣǝl-nasan wa n tišit ǝn limaman, 11 ǝd widi wa zǝddigan, d aḍutan win ǝsǝqqǝd ǝskâtnen y adag wa zǝddigan. Aratan win kul a tan-agin, ǝlkâman daɣ-san y awa as kay-omara.»
Ǝsǝbdǝd n ǝzǝl wa n tǝsanfawt
12 Inna Amaɣlol i Musa: 13 «Annu i maddanǝs n Israyil: "Ǝzǝl wa n tǝsanfawt iwâr-kawan a tu-tǝzzǝzwǝram. Ǝzǝl wen, har faw ad iqqǝl asannal ǝn tassaq gǝr-i dǝr-wan; a kawan d-isaktu as nak Amaɣlol, ǝmosaɣ Ǝmǝli-nawan, tǝskâtam sǝr-i. 14 Ǝzǝl wa ǝssǝnat fall-as, fǝlas ǝzǝl zǝwwǝran a imos. Awedan wa tu-wǝr-nǝssǝɣmar a daɣ-as tǝwǝkkǝsan man. I daɣ-as išɣalan illikan as ad itǝwǝkkǝs daɣ tamattay. 15 Ǝssuk kul taggiwat daɣ-as sǝdis adan n ǝššǝɣǝl, ǝzǝl wa n ǝssa imos ǝzǝl ǝn tǝsanfawt amaran itiwaskat-i. Awedan kul wa daɣ-as išɣalan a daɣ-as tǝwǝkkǝsan man. 16 Kǝl-Israyil iwar-tan zazwar n ǝzǝl wa, ǝntanay d ǝzzurrǝyya-nasan har faw, imos awen arkawal ǝn tassaq iɣlâlan. 17 Ǝzǝl wa, har faw imos asannal ǝn tassaq gǝr-i ǝd maddanǝs n Israyil. Fǝlas nak iman-in da sǝdis adan a daɣ d ǝxlakaɣ ijǝnnawan d amadal, ǝzǝl wa n ǝssa ǝzzǝraza daɣ-as ǝššǝɣǝl ǝssǝnfa."».
18 As iɣrad Amaɣlol ǝmǝššiwal ǝd Musa fǝl ǝdɣaɣ wa n Sinay, ikf-ay-du ǝššin sǝlluman ǝn tǝhunt ǝwaran alwajiban-net, as Amaɣlol iman-net a tan-iktaban s ǝfus-net.