30
Majmar wa n ǝsǝqqǝd n aḍutan win ǝzodnen
1 Tagaɣ majmar wa n ǝsǝqqǝd n aḍutan win ǝzodnen, igan daɣ eškan ǝn tǝggart. 2 Šaššagd-ay d ǝɣil fǝl ǝkkullu n aganna, tǝqqǝl tǝzzǝgrǝt-net ǝššin ɣallan sa sǝr afalla, tagaɣ-as iskawan a dǝr-ǝs ǝmosnen arat iyyanda. 3 Tassalsaq-qu urǝɣ izdaran. Afalla-net, ǝd tamawen-net, d ǝskawan-net, kul sals-en urǝɣ, tǝzzar tagaɣ-as abǝl n urǝɣ a t-id-iɣlâyan. 4 Agu ǝššin ɣabatan n urǝɣ fǝl ǝššin gannatan ǝn majmar win namaswadnen. Iɣabatan win, ad ǝmǝlan daw ǝbǝl-net, tǝwǝssǝdnat daɣ-san sanatat tallaɣen, fǝl a sǝr-ǝsnat itamadkal. 5 Tallaɣen šin sanatat en, ad aginat daɣ tǝggart, amaran tǝwǝsǝlsinat urǝɣ. 6 Majmar wa, ad imǝl ǝfǝr wa n anaɣer gar-es d ǝssǝnduq wa n tassaq ǝhan sǝlluman win ǝwaran alwajiban, d ǝsǝhǝr wa n ǝsǝknǝf. Edag wǝdi da iha ǝssǝnduq di daɣ dǝr-ǝk za tamanaya. 7 Aɣora kul issiqqad fall-as Harun aḍu izodan, imos awen tǝnafut, daɣ amazay wa daɣ išarad fǝtǝlaten šin ǝhanen edag wa zǝddigan, 8 agu awen da ɣur agadal ǝn tǝfuk daɣ alwaq wa daq-qanat isarɣu. Har faw saqqadat aḍu izodan dat Amaɣlol, har ǝzzurrǝyya-nawan. 9 A fall-as wǝr tǝsaqqadam šinufa ǝganen s aḍutan wǝr nǝmos win dawan-ǝmala, wala tǝsirǝkǝmmem fall-as šikutawen šin ǝganen daɣ mudaran, wala tǝsaqqadam fall-as šin ǝganen daɣ tǝbzǝst, wala tǝnaqqalam fall-as šiyyad tamašwinen. 10 Awatay kul, daɣ ǝzǝl wa n tǝkutay ta tǝmosat ǝsǝknǝf i bakkadan ǝn tamattay, a d-issǝgdǝl Harun azni ǝn tǝkutay en, inɣǝl-tu fǝl ǝskawan ǝn majmar wa. Arat wa awatay kul iga igi iyyanda s ǝmmǝk en da, har faw. Edag n ǝsǝqqǝd n aḍutan win ǝzodnen di, edag a imos iknân tazdak iskât-i.
Ikus ǝn ɣafawan
11 Inna Amaɣlol i Musa: 12 «As tǝšadana Kǝl-Israyil, ǝkkullu n iyyan daɣ-san ad ikkǝs eɣaf-net, fǝl a daɣ-wan wǝr izzǝbbat alwaba waliyyan daɣ azzaman win tuddant. 13 Alǝs kul wa tǝwar tuddant, ad ikkǝs eɣaf-net ǝs tafelt n ǝzrǝf wa mallan tǝmosat sǝdis gramatan ǝkâtnen ǝs tǝsǝkǝt ta n adag wa zǝddigan. Iɣafawan win i-nu nak Amaɣlol. 14 Awedan kul wa ewadan sanatat tǝmǝrwen n awatay madeɣ okay-tan iddun deɣ, iwar-tu ikus n aɣaf wa. 15 Imǝggǝrgas wǝr z'agǝran šilǝqqawen ǝrruzmatan, za wǝr z'ǝrzǝmnat tǝlǝqqawen a d-orayan šifelen n ǝzrǝf šin ǝttǝmalnen ǝddi, ǝmosnen ikus ǝn ɣafawan-nawan fǝl ad tǝɣlǝsam daɣ tǝmattant. 16 Azrǝf wa du-z-akfin maddanǝs n Israyil da imos ikus ǝn ɣafawan-nasan, ǝnta as za tǝkannaɣ ǝššǝɣǝlan n ahaket wa n ǝmǝnǝy. Arat wen ad iqqǝl isaktan i maddanǝs n Israyil, n ikus wa ǝgan iɣafawan-nasan ǝɣlasan daɣ tǝmattant.»
Aɣlal wa n alwallatan
17 Inna Amaɣlol i Musa: 18 «Agu aɣlal ǝn daroɣ, tǝssǝwǝraq-qu tǝsǝkbǝlt ǝn daroɣ, tassansaq-qu gǝr ahaket wa n ǝmǝnǝy ǝd majmar wa zǝwwǝran, tǝdnǝyaq-qu aman. 19 Aman win ǝntanay as z'išarad Harun ǝd bararan-net ifassan-nasan ǝd daran-nasan, 20 dat iguz-nasan ahaket wa n ǝmǝnǝy, fǝl a tan-wǝr-iba, madeɣ dat ǝnǝmihaz-nasan ǝd majmar wa zǝwwǝran amazay wa daɣ di-saqqadan šinufa. 21 Ǝširǝd ǝn fassan ǝd daran wa, iwar-tan a tu-taggin fǝl a tan-wǝr-aba. Imos alwajib a tan-iwaran har faw ǝntanay d ǝzzurrǝyya-nasan.»
Widi wa zǝddigan
22 Inna Amaɣlol i Musa: 23 «Ǝgrǝw-du aḍutan ǝzodnen win tǝfrǝnt, ǝgânen daɣ taɣǝlbast iyyat tǝmosat aman itawann-as mir a za tǝqqǝlat sǝmmos kilawtan, d ǝššin ǝzzǝnǝfan ǝn tǝfaršiten šiyyad, s ǝkkullu n iyyan a daɣ-as du-tǝgrǝwaɣ ǝššin kilawtan d aganna, 24 ǝd sǝmmos kilawtan ǝn tǝjigay tǝqqurat n ašǝk iyyan as itawannu kasǝya. Aratan en ǝkâtan ǝs tǝsǝkǝt ta n adag wa zǝddigan. Tǝgrǝwa-du ǝntada sǝdis litǝran ǝn widi wa n zaytun. 25 Aratan win di, a tan-issǝrtǝy awedan as imos ǝššǝɣǝl-net amaknaw n aḍutan win ǝzodnen, agu sǝr-san widi wa n azaway. 26 Widi wa da, as za tǝtagga šinǝfas y ahaket wa n ǝmǝnǝy, d ǝssǝnduq wa n tassaq, imos awen asakat-nasan y Amaɣlol. 27 Agu sǝr-ǝs awen daɣ i tabǝl ta n tǝgǝlwen, d ǝsǝkbǝl ǝn fǝtǝlaten, ǝd mutag-nasan kul, ǝd majmar wa n ǝsǝqqǝd n aḍutan win ǝzodnen, 28 ǝd majmar wa zǝwwǝran ǝd mutag-net, d ǝɣlal wa daɣ tawaggin alwallatan, ǝd tǝsǝkbǝlt-net. 29 Ag-en aratan a sǝr-i ǝskâtnen. Adi a fǝl z'aknin tazdak. A tan-idasan ketnet ad izdag. 30 Widi wa zǝddigan a, ǝnɣǝl daɣ-as fǝl aɣaf ǝn Harun, ǝd bararan-net, imos awen asakat-nasan, fǝl ad ǝqqǝlan ilimaman izaran y ǝššǝɣǝl kul wa n ǝlɣibada-nin. 31 Dǝffǝr a di-tannaɣ i Kǝl-Israyil: Ǝnta da widi zǝddigan wa z'iskǝtan s Amaɣlol har faw. Iqqǝlet arat wǝr nǝtǝwǝsǝtǝɣmil ar daɣ talɣa tǝskatat s Amaɣlol. 32 Ad wǝr itǝwǝzwǝy y awedan waliyyan, wala deɣ itǝwǝggu iyyan a dǝr-ǝs olân. Widi a imos zǝddigan, amaran iwar-kawan a das-tagim iduf wǝdi da. 33 I iknan widi olân ǝd wa, inɣal-tu fǝl awedan wǝr nǝla turagat-net, wǝdi a din-itǝwǝmǝs esǝm-net daɣ tamattay.»
Amaknaw n aḍutan win taqqadnen
34 Inna Amaɣlol i Musa: «Ǝgrǝw-du aḍutan ǝgânen daɣ taɣǝlbast tas itawannu storakǝs, d alɣambar, d iyyat taɣǝlbast as itawannu galbanum, d ǝlmǝsǝk izdâran a dǝr-san ogdân as ǝrtayan. 35 Tǝgmǝya d awedan as imos ǝššǝɣǝl-net amaknaw n aḍutan a tan-issǝrtǝy d ǝsalǝɣ, agu sǝr-san aḍu ifrânan a z'itaqqadan, iskât y aratan win ǝqqalnen ǝlɣibada-nin. 36 Aḍu wa edes-net ad iqqǝl egel, ansu daɣ ahaket wa n ǝmǝnǝy, dat ǝssǝnduq wa n tassaq, daɣ adag wa z'iqqǝlan asammanay-nin dǝr-ǝk. Aḍu wa, zǝzwǝrat-tu tǝssǝnam âs ikna tazdak. 37 Wǝr tǝlem turagat n ad tagim tulat-net, y a tu-tǝsǝttǝɣmǝlam daɣ tarrayt wǝr nǝmos ta-nin, fǝlas arat zǝddigan a imos a sǝr-i iskâtan. 38 Daɣ adi i iknăn aḍu izodan a dǝr-ǝs olân, fǝl a sǝr-ǝs itaggu aḍu i man-net, wǝdi a din-itǝwǝmǝs esǝm-net daɣ tamattay.»