29
Tangad ǝn limaman
1 «Ǝntada arat wa za tagaɣ i Harun ǝd bararan-net as tan-tǝskata y ǝššǝɣǝl-in wa n tišit ǝn Kǝl-tǝkutawen: Sǝnnǝfrǝn ǝhǝri wǝr nǝga ǝlɣib, d ǝššin jǝɣal wǝr nǝga ǝlɣib, 2 tabǝza-du egel n alkama wa n tǝfrǝnt, taga sǝr-ǝs šigǝlwen wǝr iha xamira, taga sǝr-ǝs šigǝlwen ǝrwaynen ǝd widi s ǝntanatay da wǝr tanat-iha xamira, taga sǝr-ǝs masatan wǝr iha xamira ǝnfasnen ǝs widi. 3 Tagaq-qan daɣ tasayt tawǝyaq-qan s ahan wa zǝddigan, ǝntanay d ǝhǝri, ǝd jǝɣal win ǝššin. 4 Tǝssuka Harun ǝd bararan-net ǝmi n ahaket wa n ǝmǝnǝy, tǝšširǝdaɣ-asan. 5 Tǝzzǝzlǝga Harun isǝlsa-net ǝmosnen: tǝkadkat, d ǝbǝrnuz, ǝd talɣaššabat, ǝd šikǝst ta n tawǝy idmaran tǝlât ǝljib, tǝsǝsaɣ-as-tan s ǝsatǝb ǝn talɣaššabat. 6 Tǝngǝdaɣ-as, tabǝza-du ejwal-in di zǝddigan, tǝqqǝnaq-qu fǝl tǝkannart-net. 7 Tabǝza-du widi wa zǝddigan, tǝnɣǝlaq-qu fǝl aɣaf-net, issikna awen ǝtǝwǝsǝnǝfrǝn-net. 8 Tannaɣ i bararan ǝn Harun a d-ihazan, tǝzzǝzlǝgaq-qan šikadkaden-nasan, 9 tǝngǝdaɣ-asan, tǝqqǝnaɣ-asan isutab-nasan šilat n awa tǝgeɣ i Harun. Tǝsǝnnǝttǝfa Harun ǝd bararan-net d ǝššǝɣǝl-nasan wa n tišit ǝn limaman har faw.
10 Ǝlwǝy-du ǝhǝri dat ahaket wa n ǝmǝnǝy, issǝwǝr Harun ǝd bararan-net ifassan-nasan eɣaf n ǝhǝri en, 11 tǝgzǝmaq-qu dat-i dagma n ǝmi n ahaket wa n ǝmǝnǝy. 12 Tǝssǝgdǝla-du arat daɣ ǝzni-net, tǝzwǝyaq-qu s adad-nak y ǝskawan win ǝwarnen majmar wa zǝwwǝran, tǝnɣǝlaɣ a wa d-iqqiman daɣ ǝzni fǝl ares ǝn majmar wa zǝwwǝran. 13 Tabǝza-du tadǝnt ta tǝlsat šisǝllad šin ammas n ǝmudar, ǝd tasa, ǝd tǝgǝzzal ǝd tǝdǝnt ta tanat-tǝlsat, tǝzzar tǝssǝqqǝdaɣ awen kul, ad iqqǝl tǝrorat fǝl majmar wa zǝwwǝran. 14 Arat wa imos takutay ta fǝl z'ǝgrǝwan Kǝl-tǝkutawen tǝsureft ǝn bakkadan-nasan. Awa d-iqqiman daɣ ǝhǝri wa, gǝr isan-net, wala agašek-net, wala ǝdǝfi-net, kul ad ammawayan ǝqqǝdan daɣ adag iyyan sǝdi.
15 Tǝlwǝya-du iyyan daɣ jǝɣal, issǝwǝr Harun ǝd bararan-net ifassan-nasan eɣaf-net, 16 tǝgzǝmaɣ ajaɣol wen tǝssǝgdǝla-du azni-net, tǝssǝlǝlaq-qu i tamawen kul ǝn majmar wa zǝwwǝran. 17 Tǝsǝmmǝslǝdaq-qu, tǝssǝwǝraq-qu majmar wa zǝwwǝran ǝnta d aɣaf-net, tǝšširǝdaɣ ikǝrukǝrawan-net, ǝd sǝbdad-net, tǝssǝwǝraq-qan afalla-net. 18 Tǝsǝrrǝkǝmmeɣ ajaɣol wen ketnet imos takutay ta tǝtirǝkǝmmet a di-tǝge. Takutay tǝdi, nak iman-in Amaɣlol as oggamaɣ aḍu n ǝhu-net.
19 Tǝlwǝya-du ajaɣol wa hadan, issǝwǝr Harun ǝd bararan-net ifassan-nasan eɣaf-net. 20 Tǝgzǝmaɣ ajaɣol wen, tǝssǝgdǝla-du ǝzni-net tǝssǝwǝra daɣ-as arat i tǝlaɣlaq ǝn tǝmǝzzuk ǝn Harun ta n ǝɣil, ǝnta harkid bararan-net, tagaɣ awen da i gǝmzan ǝn fassan-nasan win ǝɣil, ǝd šinšawen šin zawwarnen ǝn daran-nasan win ǝɣil, dǝffǝr adi tǝssǝlǝlaɣ a wa d-iqqiman daɣ ǝzni i tamawen kul ǝn majmar wa zǝwwǝran. 21 Tabǝza-du arat n ǝzni fǝl majmar wa zǝwwǝran, d arat ǝn widi wa zǝddigan, tǝnfǝsaq sǝr-ǝs Harun ǝd tǝbǝddaɣ-net, tagaɣ awen da i bararan-net ǝd tǝbǝddaɣ-nasan. A obazan ɣur amazay wǝdi, ǝnta ad itawaskat Harun ǝd bararan-net y-i nak Amaɣlol ǝntanay ǝd tǝbǝddaɣ-nasan. 22 Takutay ta n ajaɣol wa n ǝššin, ǝnta a tǝmosat ǝsǝnnǝttǝf ǝn Harun ǝd bararan-net d ǝššǝɣǝl-nasan. Abǝz-du idaggan win tǝha tǝdǝnt, ǝmosnen: tasbat n ajaɣol wa, ǝd tǝdǝnt ta tǝlsat šisǝllad-net šin ammas, ǝd tasa-net, ǝd tǝgǝzzal-net, ǝd tǝdǝnt ta tanat-tǝwarat, ǝd taɣma n adar-net wa n ǝɣil. 23 Takka tesayt ta daɣ ǝnsanat tǝgǝlwen wǝr iha xamira, tǝnsat dat-i, tǝdkǝla-du daɣ-as tagǝlla tǝgilallet, ǝd tǝgǝlla tǝŋŋat ǝd widi, ǝd masa, 24 tassansaɣ awen kul fǝl fassan ǝn Harun ǝd bararan-net, tannaɣ-asan a dǝr-ǝs ǝdkǝlan ifassan-nasan, imos awen takutay ta dǝr tamadkalan fassan dat-i nak Amaɣlol. 25 Dǝffǝr adi ǝssuɣǝlan-ak-kan-du, tǝsǝrrǝkǝmmeɣ awen kul fǝl majmar wa zǝwwǝran iqqǝl tǝrorat, fǝl afalla ǝn tǝkutay ta tǝtirǝkǝmmet tǝgât s ajaɣol wa azzaran. Arat wa ad iqqǝl tǝnafut a di-tǝtiwaggat nak Amaɣlol, amaran oggamaɣ aḍu-net. 26 Tabǝza-du idmaran n ajaɣol kay iman-nak Musa, tǝttǝfaq-qan, tǝdkǝla dǝr-san ifassan-nak ǝmosan takutay ta dǝr tamadkalan fassan dat-i nak Amaɣlol. Dǝffǝr adi tǝqqǝl tǝslǝt ten adagar-nak. 27 Šisǝllad n ajaɣol wa n tangad šin di, ag-enat arat iskatan y Amaɣlol. Ǝntanatay a mosnen adagar ǝn Harun ǝd bararan-net. Šisǝllad šin ǝmosnat idmaran ǝd taɣma win dǝr ǝmmǝdkalan fassan dat Amaɣlol. 28 Adi da fǝlas har faw as di-taggin maddanǝs n Israyil šikutawen šin tassaq, a daɣ-asnat d-ǝkkǝsan šisǝllad šin di ǝmosnat adagar ǝn Harun d ǝzzurrǝyya-net. 29 Isǝlsa ǝn Harun win tǝllǝmumǝya, as t-aba, a tan-igrǝw arat daɣ ǝzzurrǝyya-net, iqqǝn-tan daɣ ǝzǝl wa fall-asan itawanɣal widi wa zǝddigan y ad itǝwǝsǝnnǝttǝf d ǝššǝɣǝl-net. 30 Ǝmuzar ǝn Kǝl-tǝkutawen wa z'iggǝzan edag ǝn Harun, ad agu ǝssa adan iqqân šisǝlsan win daɣ ahaket wa n Ǝmǝnǝy, y ad agu ǝššǝɣǝl-net daɣ adag wa zǝddigan.
31 Tabǝzaɣ ajaɣol wa n tangad, tǝsassaŋŋaɣ isan-net daɣ adag zǝddigan. 32 Isan win ǝd tǝgǝlla ta tǝhat tesayt, a tan-atšu Harun ǝd bararan-net ɣur ǝmi n ahaket wa n ǝmǝnǝy. 33 Ǝmmǝk wǝdi daɣ as z'atšin arat wa iqqalan ǝsǝknǝf fǝl ǝddǝlil n ǝtǝwǝskat-nasan i tišit ǝn limaman. Isan win ǝd tǝgǝlla ta, wǝr tan-z-atšu ar aytedan win as itawagga ǝsǝknǝf wen fǝlas ǝskâtan sǝr-i nak Amaɣlol. 34 As d-affaw aglǝz daɣ ṣân ǝn tǝkutay ta ǝd tǝgǝlla, tǝssǝqqǝdaq-qu. Ad wǝr ammatšu fǝlas arat iskâtan y Amaɣlol a imos. 35 Harun ǝd bararan-net ag-asan arat inimannakan d awa as kay-omara ketnet. Ǝdkǝl ǝssa adan ǝɣradnen i tangad y-asan.
36 Ǝkkullu n ǝzǝl tǝgeɣ takutay s ǝhǝri, imos wen ǝsǝknǝf. Tǝzzǝzdǝga majmar wa zǝwwǝran ǝn tǝkutawen s ǝzni n ǝsǝknǝf wǝdi, tǝzzar tǝzwǝyaq-qu y ad izdag. 37 Agu ǝssa adan tǝtâgga takutay ta n ǝsǝknǝf fǝl majmar wa zǝwwǝran, iqqǝl majmar wa arat iknân tazdak, aratan win t-ǝdasnen deɣ kul ad izdagan.»
Takutay ta n ǝzǝl kul
38 «Aratan da win as za taga takutay fǝl majmar wa zǝwwǝran: Ǝkkullu n ǝzǝl tǝkata daɣ-as ǝššin jǝɣal ǝn maswatayan, har faw. 39 Iyyan daɣ jǝɣal a ǝkǝt-tu aɣora, tǝkǝta wa hadan agadal ǝn tǝfuk. 40 Ajaɣol wa azzaran šidǝw-tu ǝd tǝyya n agel igân eẓed wa n ǝsrǝɣ. Egel wa irwây ǝs widi ǝn zaytun imosan ǝddukad ǝn litǝr d aganna. Irtǝy deɣ ǝd tǝnafut ta tǝnaqqalat tǝmosat litǝr d aganna n aman n alɣanab ikkizaman. 41-42 Takutay ta hadat tǝgat s ajaɣol wa igazzaman ɣur agadal ǝn tǝfuk, ǝnta da šidǝw-tat d aratan win da tǝššedawaɣ ǝd ta tazzarat, a tan-imosan: tǝnafut ta n tǝbzǝst ǝd ta tǝnaqqalat, tǝgat daɣ aratan tamašwinen. Arat wen ad iqqǝl takutay ta tǝtirǝkǝmmet as oggam Amaɣlol aḍu-net. Ad tǝqqǝl arat a z'itaggu ǝzzurrǝyya-nawan daɣ azzaman kul win d-ǝzaynen har faw, ɣur ǝmi n ahaket wa n ǝmǝnǝy, dat-i: ǝddi da dǝr-wan za tamanaya, amaran ǝddi da a dak-za-šawala. 43 Ǝddi daɣ ad za tamanayaɣ ǝd maddanǝs n Israyil, iqqǝl edag as tanaya-nin a tu-za-tǝzzǝzdǝgat. 44 Ad agaɣ ahaket wa n ǝmǝnǝy arat a sǝr-i iskâtan ǝnta ǝd majmar wa zǝwwǝran. Harun ǝd bararan-net deɣ a tan-ǝssǝwǝraɣ aganna ǝqqǝlan ilimaman-in. 45 A d-azzabbeɣ, ǝzdǝɣa gǝr maddanǝs n Israyil, ǝqqǝlaɣ Ǝmǝli-nasan. 46 Ǝssǝnan as nak a imosan Amaɣlol, Ǝmǝli-nasan, ǝssǝnan deɣ as nak a tan-d-ikkasan daɣ Masar y a d-azzabbeɣ ǝzdǝɣa gar-essan. Nak a imosan Amaɣlol, Ǝmǝli-nasan.»