28
Isǝlsa ǝn Harun ǝd maddanǝs
1 Kay Musa aɣra-du ǝmaqqar-nak Harun, ǝd bararan-net Nadab, d Abihu, d Elɣazar, d Itamâr, tǝzǝmmǝzzǝyaq-qan-du ǝd Kǝl-Israyil win hadatnen, fǝl ad ǝqqǝlan ilimaman, izaran y ǝššǝɣǝl kul wa iqqalan ǝlɣibada-nin. 2 Agu i Harun isǝlsa a sǝr-ǝs ǝskâtnen, ǝknanen šihussay a z'assakninen adkul-net. 3 Ǝššǝɣǝl wǝdi aɣra-du sǝr-ǝs aytedan win ǝlanen tayttay, ǝkfeq-qan madas. Ǝntanay a z'aginen isǝlsa win z'itaqqan Harun fǝlas awedan a sǝr-i iskâtan a imos, izar y ǝššǝɣǝl kul wa n ǝlɣibada-nin. 4 Isǝlsa da win z'agin: Arat ǝn šikǝst ta n tawǝy idmaran tǝlât ǝljib, ǝd talɣaššabat as itawannu efod, d ǝbǝrnuz, ǝd tǝkadkat tǝdlagat ǝs zamayan, ǝd tǝgǝlmust, d ǝsatǝb. Ǝntanay a z'ǝqqǝlnen isǝlsa ǝskâtnen i Harun ǝd bararan-net fǝlas ǝntanay a z'ǝqqǝlnen ilimaman win azzarnen y ǝššǝɣǝl wa iqqalan ǝlɣibada-nin.
5 Aratan win ad agin ǝs tǝnǝlwa n urǝɣ, ǝd tǝduft n ayfǝd, tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhay tǝzuɣay, ǝd ta zaggaɣat, ǝd lin wa n ǝlǝsǝl. 6 Talɣaššabat amaran ad tagu ǝs tǝnǝlwa n urǝɣ, ǝd tǝduft n ayfǝd, tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhay tǝzuɣay, ǝd ta zaggaɣat, ǝd lin wa n ǝlǝsǝl. Ǝššǝɣǝl wa, ad t-agin aytedan a t-ǝssannen s ǝlluɣ. 7 Talɣaššabat ten, ad tǝwǝggin ǝššin suɣan win du-z-ǝɣlǝynen izeran, ǝzmǝyan fǝl tamawen-net fǝl a tat-ǝttǝfan. 8 Ǝsatǝb-net ad agu daɣ aratan win da daɣ tǝga. Tabdoq ta ǝntada ad tagu daɣ tǝnǝlwa n urǝɣ, ǝd tǝduft n ayfǝd, tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhây tǝzuɣay, ǝd ta zaggaɣat, ǝd lin. 9 Ammadkalnat-du sanatat tǝhun ǝlanen almaqam as itawannu šoham, tǝssǝwǝraq-qanat ismawan ǝn maddanǝs ǝn Yaqub. 10 Ǝwǝran sǝdis ǝsmawan tǝhunt iyyat, ǝwǝran sǝdis ta hadat, ewâl awen s ǝmǝzuzar-nasan ǝs tǝhǝwt. 11 Ǝššǝɣǝl wa n ǝsǝwǝr n ǝsmawan win šihun šin, sǝssug-ay y awedan a t-iknan masnat, a tu-z-agin s ǝmmǝk was tawakninat tǝhun šin taqqalnen ejwal. As fall-asnat iktab ismawan win di isǝttǝbbǝt-tanat daɣ tǝssǝwen-nasnat ǝgânen daɣ urǝɣ. 12 Šihun šin sanatat en, ag-enat fǝl suɣan win ǝmosnen izeran ǝn talɣaššabat. Ǝqqǝlnat isaktan i maddanǝs n Israyil. A tanat-itaqqan Harun fǝl zeran-net ǝmosnat isaktan dat Amaɣlol. 13 Tǝssǝwen šin daɣ ǝttǝbbatnat tǝhun šin, ag-enat daɣ urǝɣ. 14 Tǝqqǝna daɣ tǝssǝwen šin arat ǝn sassaran ǝššin n urǝɣ izdaran, ǝgânen ewet a d-isaktin tenallay tǝllamat.
Šikǝst ta n tawǝy idmaran
15 Šikǝst ta n tawǝy idmaran, s ǝnta a ǝhan aratan win as itassan ǝlimam wa zǝwwǝran tara ǝn Mǝššina, ad tǝqqǝl arat ǝgan aytedan win ogarnen tǝla ǝn madas. Ag-as igi olan ǝd wa tǝgeɣ y efod, gǝr za daɣ urǝɣ, wala tǝduft n ayfǝd, tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhay tǝzuɣay, ǝd ta zaggaɣat, ǝd lin wa n ǝlǝsǝl. 16 Tǝsǝnnǝdfǝsaq-qat, tǝqqǝl aganna n ǝɣil fǝl ǝkkullu n aganna.
17 Tǝtǝwǝdlǝg s ǝkkoz tattaran ǝn tǝhun ǝlanen almaqam s akkiyyat tǝttibbat daɣ tǝssut-net n urǝɣ. Atattar wa azzaran ad agu ǝs tǝhunt zaggaɣat as itawannu sardwan, d iyyat araɣat as itawannu tofaz, ǝd ta tǝgat taddalǝt ta n yel itawann-as emrod. 18 Atattar wa n ǝššin ad agu daɣ tǝhunt zaggaɣat tǝtibǝlǝzzet as itawannu rubis, d iyyat tǝgat taddalǝt ta n jǝnnawan irdaɣ asawad, tǝgat esǝm safir, d iyyat tǝhunt tǝlât ǝnnur wǝllen as itawannu dǝyaman. 19 Atattar wa n karad ad agu daɣ tǝhunt araɣat tǝbilazlazat as itawannu obbal, d iyyat zǝmlǝlat tǝlhây takkawalt as itawannu agat, d iyyat tǝgat taddalǝt ta n jǝnnawan tǝlhây tǝzuɣay, itawann-as ametist. 20 Atattar wa n ǝkkoz amaran ad agu daɣ tǝhunt tǝgat tǝruɣay ta n urǝɣ as itawannu krizolit, tǝlhay-tat taddalǝt ta n yel, ǝd tǝhunt iyyat tǝgat karad ǝlmawan as itawannu onǝyks. Ǝd tǝhunt iyyat irdaɣ asawad dalet tǝgât esǝm jasfa. 21 Ǝkkullu n iyyat daɣ tǝhun šin a tat-iwǝr esǝm n iyyat daɣ marawat tawšeten ǝd sanatat n Israyil, zund ǝmmǝk as isawar awedan ejwal-net y arat.
22 Šikǝst ta n tawǝy idmaran a, a das-tǝwǝggin arat ǝn sassaran ǝššin n urǝɣ wa izdaran ǝgânen ewet a d-isaktin tenallay tǝllâmat, 23 ǝd sanatat tǝzabaten n urǝɣ a z'ǝggǝznen šiɣǝmmar-net šin afalla. 24 Šizabaten šin sanatat tǝge daɣ tǝɣǝmmar ǝn šikǝst a, sǝrdǝɣ daɣ-asnat isassaran n uɣǝr win du-tǝsassaga da. 25 Tǝrdǝfaɣ ǝššin mawan win hadatnen ǝn sassaran win daɣ tǝssǝwen n urǝɣ šin daɣ ǝttǝbbatnat tǝhun sanatat šin ǝwarnen isuɣan n efod fǝl zeran sa sǝr dat. 26 Tǝsǝssuga sanatat tǝzabaten n urǝɣ šiyyad tǝrdǝfaq-qanat daɣ tǝɣǝmmar šin ares ǝn šikǝst ta n tawǝy idmaran, fǝl aganna-net wa orayan s efod. 27 Tǝsǝssuga šizabaten sanatat n urǝɣ šiyyad, tǝrdǝfaq-qanat daɣ suɣan win zeran n efod sa sǝr eres a daɣ orâynat sa sǝr dat. Edag wa daɣ ǝrdafnat ihoz ǝsatǝb n efod. 28 Šizabaten šin ǝhanen šikǝst ta n tawǝy idmaran, ad asǝɣnat ǝd šin efod ǝs tǝsǝwǝt tǝgâ taddalǝt ta n jǝnnawan. Ǝmmǝk en daɣ as din-za-tǝttǝf šikǝst ten fǝl ǝdmaran ǝn efod.
29 As itaggaz Harun edag wa zǝddigan, ad issǝwǝr idmaran-net ismawan ǝn marawat tawšeten ǝd sanatat ǝn maddanǝs n Israyil ǝwarnen šikǝst ta tǝsusunat daɣ tara ǝn Mǝššina. Imos awen isaktan ǝn maddanǝs n Israyil har faw dat Amaɣlol. 30 Šikǝst ta n tawǝy idmaran, kay iman-nak Musa as za taga daɣ ǝljib-net Urim ǝd Tummim. Daɣ adi Urim ǝd Tummim faw da ǝhân idmaran ǝn Harun daɣ mazayan win daɣ ibaddad dat-i. Ǝntanay a mosnen aratan win susunnen Harun daɣ awa as ira Amaɣlol a tu-tagu tamattay-net.
Isǝlsa win hadatnen n Ǝlimam wa Zǝwwǝran ǝd bararan-net
31 Tagaɣ ǝbǝrnuz igan daɣ tǝduft tǝgât taddalǝt ta n jǝnnawan tǝlhây tǝzuɣay. 32 Tagaɣ-as šinwiri, as z'iɣlǝy ǝbǝl ǝẓdân aytedan win zattinen tabdoq. Abǝl wa, ad issuhǝt wǝllen fǝl ad wǝr azzarrat. 33 Eres n ǝbǝrnuz wa, a daɣ-as bǝšakšakan aratan n ašǝk as itawannu ǝrrumman ǝganen ǝs tǝduft n ayfǝd tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhây tǝzuɣay, ǝd ta zaggaɣat, ǝkfǝsan ǝs naynan n urǝɣ. 34 Ad tagaɣ anayna n urǝɣ, tagaɣ ara n ǝrrumman, har d-iɣǝlǝllǝwǝt s awen da. 35 Ǝbǝrnuz wa da a z'izallag Harun as itaggu ǝššǝɣǝl-net wa n ǝlimam. As d-igallu y ad ibdǝd dat-i daɣ adag wa zǝddigan, madeɣ igammad-tu, ad bǝrǝɣrǝɣan naynan win da, as wǝr iga adi ad t-iba.
36 Tǝsǝssugaɣ ǝzzǝnǝf ǝn širawt ta n aɣaf tǝgât daɣ urǝɣ izdâran, itǝwǝsǝwǝr-tat as: «Iskat y Amaɣlol», zun d ǝmmǝk an ajwăl. 37 Širawt ta ǝqqǝn-tat i Harun ǝs tǝsǝwǝt tǝgât tǝzuɣay tǝlhây taddalǝt ta n jǝnnawan. 38 As dat-i ibdad Harun nak Amaɣlol, ad iqqǝn širawt ta daɣ tǝkannart-net. Ǝddǝlil n adi da fǝl z'ǝqbǝla šikutawen šin di-za-taggin Kǝl-Israyil, kuddeɣ ǝgân daɣ-asnat lahan. 39 Tazdaɣ i Harun tǝkadkat ǝn lin, tazdaɣ-as deɣ tǝgǝlmust ǝn lin, d ǝsatǝb idlagan ǝs zamayan iga awedan a tan-isinahalan masnat. 40 Amaran maddanǝs ǝn Harun da, a dasan-tǝwǝggin sǝlsa a z'assakninen adkul-nasan, hossayanen, ǝgan daɣ tǝkadkaden, ǝd sutab, ǝd tǝgǝlmas. 41 Kay iman-nak Musa as za tassalsaɣ isǝlsa win y ǝmaqqar-nak Harun ǝd bararan-net, tǝnɣǝla fǝl ɣafawan-nasan widi wa zǝddigan, tǝsǝnnǝttǝfaq-qan d ǝššǝɣǝlan win tan-ǝlzamnen. Ǝmmǝk en daɣ as z'ǝqqǝlan ilimaman ǝskâtnen i tizart y ǝššǝɣǝlan win ǝlɣibada-nin. 42 Sǝssug-asan šikarbayen ǝn lin a z'alsinen taɣmiwen-nasan, fǝl a tan-ǝstǝrnat. 43 Isǝlsa win da a z'itaqqan Harun ǝd bararan-net as taggazan ahaket wa n Ǝmǝnǝy, madeɣ tinǝmihizan ǝd majmar wa zǝwwǝran taggin ǝššǝɣǝl wa n tišit ǝn limaman, fǝl ad wǝr ǝzzǝfan iwǝr-tan lahan, awǝy-du sǝr-san awen a tan-iba. Alwajib wa har faw ill-ay, iwâr Harun d ǝzzurrǝyya-net.