27
Majmar wa zǝwwǝran n ǝsǝqqǝd ǝn tǝkutawen
1 «Agu ǝzzǝnǝf ǝn majmar iyyan zǝwwǝran a fǝl za taqqadnat tǝkutawen. Majmar wa ad agu daɣ eškan ǝn tǝggart, aknu tugdat fǝl ǝkkullu n aganna, tǝqqǝl ǝkkullu ǝn tasaga-net sǝmmos ɣallan, agu ahaku ogdan ǝd karad ɣallan sa sǝr afalla. 2 Ǝkkullu n iyyat daɣ tǝɣǝmmar-net, ag-as a olan d ǝskawan a daɣ-as d-ǝntanen ǝmosan dǝr-ǝs arat iyyanda. Awen kul ǝɣrǝd-tu ǝsǝlsi ǝn daroɣ. 3 Tagaɣ kaskawtan a daɣ z'itawanɣal eẓǝd ǝn tǝkutawen, ǝd felutan, ǝd sǝlkaw zawwarnen, ǝd šokalen šin ǝlanen išenan, ǝd sǝksâl ǝn tǝmakaten. Imutag win kul ag-en daɣ daroɣ. 4 Tǝsǝssugaɣ ǝssǝrir imišaragragan, igan daɣ daroɣ. Tǝsǝssugaɣ ǝkkoz ɣabatan ǝn daroɣ i majmar. Ǝkkullu n iyyat daɣ tǝɣǝmmar-net šin afalla ih-et iyyan. 5 Ǝssǝrir wa ad itǝwǝggu daw ǝbǝl ǝn majmar wa zǝwwǝran, ɣur tǝsaddakamt-net, isǝggǝrigǝrǝy daɣ majmar gǝr afalla d ares. 6 Taga tallaɣen i majmar wa zǝwwǝran ǝn tǝkutawen. Tallaɣen šin ag-enat daɣ tǝggart, alsinat daroɣ. 7 Ǝntanatay a z'ǝssǝdnen daɣ ɣabatan ǝn majmar wa zǝwwǝran fǝl ǝššin gannatan, ǝqqǝlnat isǝssiway-net. 8 Majmar wa, ad agu daɣ gǝttan ǝn tǝggart, amaran ammas-net wǝr t-iha wala, inimannak awen d ǝlmital wa kay-ǝssǝkna da fǝl ǝdɣaɣ wa.»
Ammas n afarag n ahaket
9 Ahaket ad ilu tǝfǝrray ǝɣlaynat tǝsǝwad ǝganen daɣ lin wa n ǝlǝsǝl. Fǝl aganna wa n agala, šisǝwad šin, ad tǝqqǝl tǝzzǝgrǝt-nasnat temeday n ǝɣil. 10 Šisǝwad šin, a tanat-ǝkbǝlnat sanatat tǝmǝrwen n ǝgǝt ǝɣtanen fǝl sanatat tǝmǝrwen ǝn tǝbataqqat ǝn daroɣ a fǝl ǝzgarnat tallaɣen n ǝzrǝf ǝttafnat tǝzabaten n ǝzrǝf. 11 Aganna wa n tamasna ǝnta da ad t-alsinat tǝsǝwad ǝmosnen temeday n ǝɣil, ǝkbalnat-tanat sanatat tǝmǝrwen n ǝgǝt ǝlânen šizabaten n ǝzrǝf, ǝɣtân fǝl sanatat tǝmǝrwen ǝn tǝbataqqat, ǝzgârnat fall-asan tallaɣen s ǝntanatay da ǝganat daɣ ǝzrǝf. 12 Šisǝwad šin du-z-ǝwǝrnen tasaga ǝn tǝfǝrray n ahaket ta n ataram, ad ǝqqǝlnat sǝmmosat tǝmǝrwen n ǝɣil, ǝkbǝlan-tanat maraw gǝttan, ǝɣtânen fǝl marawat tǝbataqqaten. 13 Tasaga ǝn tǝfǝrray ta torayat s aganna wa n dǝnnǝg s ǝnta as d-itawaggaz ahaket, ad tǝqqǝl sǝmmosat tǝmǝrwen n ǝɣil ǝntada. 14 Imi n afarag wa iɣlayan ahaket, aganna-net iyyan a fall-as aɣtinat karadat tǝgǝttawen s akkiyyat tǝɣta fǝl tǝbataqqat-net, alsinat-tanat tǝsǝwad ǝmosnen maraw ɣallan ǝd sǝmmos. 15 Aganna wa hadan n ǝmi n afarag a ǝnta da a fall-as aɣtinat karadat tǝgǝttawen s ǝkkullu n iyyat tǝɣta daɣ tǝbataqqat-net, alsinat-tanat deɣ tǝsǝwad ǝmosnen maraw ɣallan ǝd sǝmmos. 16 Imi n afarag a daɣ-as ikǝrirǝy ǝfǝr, imosan sanatat tǝmǝrwen n ǝɣil, itǝwǝdlǝg tǝduft n ayfǝd, tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhay tǝzuɣay, ǝd ta zaggaɣat, ǝd lin wa n ǝlǝsǝl, tǝzzar itǝwǝqqǝn fǝl ǝkkoz gǝttan, ǝɣtanen daɣ tǝbataqqaten. 17 Igǝttan kul win daɣ z'agu afarag ad ilen šibataqqaten ǝn daroɣ, ilen deɣ šizabaten n ǝzrǝf. Šizabaten šin ǝntanatay a z'ǝttǝfnen tallaɣen n ǝzrǝf šin z'ǝzgǝrnen fǝl gǝttan. 18 Daɣ adi šisǝwad šin ǝɣlaynen afarag ad tǝqqǝl tama-nasnat temeday n ǝɣil fǝl aganna was zǝgrǝt afarag, tǝqqǝl sǝmmosat tǝmǝrwen n ǝɣil sa sǝr tasaga, iqqǝl ahaku-nasnat sǝmmos ɣallan. Šibataqqaten ǝn gǝttan win, kul ad aginat daɣ daroɣ. 19 Ilalan kul win as itaggu ǝššǝɣǝl daɣ akaras n ahaket madeɣ afatay-net, madeɣ ǝsǝggǝli-net, ad agin daɣ daroɣ. Šimǝttitay n ahaket ǝd šin afarag wa t-iɣlayan, da daroɣ a daɣ z'aginat.
Widi wa n fǝtǝla
20 «Kay Musa a z'amǝran Kǝl-Israyil s a dak-d-ǝgrǝwan tafrǝnt daɣ widi wa n azzayt, fǝl a sǝr-ǝs raqqinat fǝtǝlaten ahad kul. 21 Fǝtǝlaten šin, ad ansinat dat ǝfǝr wa n anaɣer s ǝnta a dǝnnǝg illa ǝssǝnduq wa n tassaq. Harun ǝd bararan-net dǝr-ǝsnat z'annattafnen daɣ ahaket wa n ǝmǝnǝy. Ad raqqinat ɣur agadal ǝn tǝfuk har agamad-net. Alwajib wa da, as z'ǝlkǝman Kǝl-Israyil har faw.»