26
Imutag win ǝsǝfǝl n ahaket
1 «Zazdu marawat tǝsǝwad daɣ tǝnǝlwa ǝn lin wa n ǝlǝsǝl ǝrtaynen ǝd tǝduft n ayfǝd tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhay tǝzuɣay, ǝd ta zaggaɣat, tǝsǝssuga daɣ-asnat ahaket. Tagaɣ i tǝsǝwad šin tezatay a daɣ ǝdlâgnat ǝs fototan ǝn kǝruban ǝgân aytedan sinahalnen tǝla ǝn madas 2 Ǝkkullu n iyyat daɣ tǝsǝwad šin marawat a, ad tǝqqǝl sanatat tǝmǝrwen n ǝɣil d ǝttam sa sǝr tǝzzǝgrǝt, tǝqqǝl ǝkkoz ɣallan sa sǝr tasaga. 3 Tǝwisǝɣnat sǝmmosat daɣ tǝsǝwad šin ǝs tǝsǝgwen-nasnat, itǝwǝggu awen da i sǝmmosat šin hadatnen. 4-5 Iyyat daɣ tǝsǝwad šin tama ǝn sǝmmosat šin osaɣnen da, sǝmmǝtǝrtǝr daɣ afay-net sǝmmosat tǝmǝrwen ǝn tanjart ǝganen taddalǝt ta n jǝnnawan tǝlhay tǝzuɣay, tagaɣ awen da i tǝsǝwad šin hadatnen ǝn sǝmmosat osaɣnen. Šinjar šin za tagaɣ i sǝmmosat tǝsǝwad šin azzarnen, ad nǝmiwǝlnat ǝd šin za tagaɣ i sǝmmosat šin hadatnen. 6 Taga sǝmmosat tǝmǝrwen n ǝsǝrdǝf ǝganen daɣ urǝɣ, tasǝɣa sǝr-san tamawen ǝn tǝsǝwad šin daɣ tǝge šinjar, fǝl ad ǝqqǝlnat tǝsǝwad šin marawat en ahaket.»
7 Taga marawat tǝsǝwad d iyyat ǝganen daɣ azaw, taga sǝr-ǝsnat ǝsǝfǝl y ahaket. 8 Šisǝwad šin ketnasnat ad agdinat. Ǝkkullu n iyyat tǝmos karadat tǝmǝrwen n ǝɣil, tǝmos ǝkkoz ɣallan sa sǝr tasaga. 9 Ag-asnat assaɣ daɣ as sǝmmosat ǝwarnat aganna iyyan, sǝdisat šin hadatnen ǝwarnat aganna ǝntanatay da. Tǝsǝwǝt ta n marawat d iyyat sǝnnǝtfǝs-tat-in a du-tagdu d afay n ahaket sa sǝr dat. 10 Iyyat daɣ tǝsǝwad šin tama ǝn šin sǝmmosat tosaɣa, sǝmmǝtǝrtǝr daɣ tama-net sǝmmosat tǝmǝrwen ǝn tanjart, tagaɣ awen da y iyyat daɣ tǝsǝwad šin tama ǝn sǝdisat šin hadatnen tosaɣa. 11 Taga sǝmmosat tǝmǝrwen n ǝsǝrdǝf ǝn daroɣ, tǝwǝrdǝfan daɣ šinjar sin den. Ǝmmǝk wǝdi daɣ as za tasǝɣaɣ ahaket, iqqǝl arat iyyanda. 12 Ǝsǝfǝl n ahaket, ad ilu tǝzǝglǝzt tǝmosat ǝššin ɣallan. Tǝzǝglǝzt ta, ǝnta a du-za-tǝbǝrjukǝmat fǝl aganna wa n ataram har daɣ-as ǝssǝwan ǝššin ɣallan fǝl amadal. 13 Fǝl aganna wa n tǝdǝl, a d-ibǝrjukǝm har idǝs amadal, isǝnnǝhǝl ǝsǝfǝl wa telassay n ahaket.
14 Taga y ahaket ǝsǝfǝl iyyan a fall-as du-z-ibǝrjukǝman, igan daɣ agašek n akar, immuɣan daɣ tǝnǝɣmit, tǝssǝlǝlaq-qu tǝsǝlsit iyyat tǝgât daɣ agašek issohen.
Isǝkras n ahaket
15 «Tǝwǝɣtǝsan-du gǝttan ǝn tǝggart a z'affaltaɣnen aɣtin ǝqqǝlan šiɣurad y ahaket. 16 Igǝttan win ǝkkullu n iyyan daɣ-san ad tǝqqǝl tǝzzǝgrǝt-net maraw ɣallan, tǝqqǝl tǝffǝltǝq-net aɣil d aganna. 17 Ǝkkullu n ǝgǝt agu y ǝmi-net ǝššin faškan nimallalnen. 18 Igǝttan win agu daɣ-san sanatat tǝmǝrwen y aganna wa n agala daɣ ahaket. 19 Ǝššin faškan win ǝhanen ǝkkullu n ǝgǝt, akkiyyan ag-as tabataqqat a daɣ z'issǝd. 20 Aganna n ahaket wa n tamasna, ǝnta da ag-as sanatat tǝmǝrwen n ǝgǝt faltoɣnen, 21 ǝlanen ǝkkozat tǝmǝrwen ǝn tǝbataqqat ǝganen daɣ ǝzrǝf. Ǝššin faškan win ǝhanen ǝkkullu n ǝgǝt, akk iyyan ag-as tǝbataqqat a daɣ z'issǝd. 22 Tandǝq n ahaket ta n ataram, sǝmmutǝg-as sǝdis gǝttan ǝn tǝggart faltoɣnen. 23 Tagaɣ ǝššin gǝttan wiyyad faltoɣnen i tǝɣǝmmar n ahaket. 24 Igǝttan win ǝššin a ad alin, asǝɣan sa sǝr ares, tǝzzar tasǝq-qan tǝzǝbit iyyadda sa sǝr afalla, amaran kul ad alin, ǝqqǝlan šiɣurad i tǝɣǝmmar n ahaket. 25 Daɣ adi igǝttan win kul, ad ǝqqǝlan ǝttam ǝlanen marawat tǝbataqqaten ǝd sǝdisat ǝganen daɣ ǝzrǝf. Ǝkkullu n iyyan daɣ-san ila sanatat tǝbataqqaten. 26 Dǝffǝr adi tagaɣ sǝmmos zegǝran ǝn tǝggart a z'ǝttǝfnen igǝttan win matartarnen daɣ tadalay n ahaket, 27 taga sǝmmos i tadalay ta hadat, taga sǝmmos zegǝran wiyyad i tǝndǝq n ahaket ta n ataram. 28 Ǝzegǝr wa n ammas, ad akǝy daɣ tǝsǝggǝrigǝrǝyt ǝn gǝttan, ɣur tama ta har ta hadat. 29 Izegǝran harkid gǝttan win den, a tan-alsu urǝɣ, tǝwǝgginat tǝzabaten n urǝɣ i gǝttan, s ǝntanay a daɣ z'ǝssǝdan zegǝran. 30 Ahaket wa, ǝkrǝs-tu ǝs tǝmǝwit tǝnimannakat d awa kay-itawasaknan fǝl ǝdɣaɣ.»
Ifǝrwan win anaɣer ǝd win ǝhanen imi n ahaket
31 A du-tǝsǝssugaɣ afǝr wa n anaɣer igan daɣ tǝduft n ayfǝd, tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhay tǝzuɣay, ǝd ta zaggaɣat, ǝd lin wa n ǝlǝsǝl, agu tezatay a daɣ z'idlǝg ǝs kǝruban iga awedan isinnahalan tǝla ǝn madas. 32 Ǝqqǝn-tu daɣ ǝkkoz gǝttan zawwarnen ǝn tǝggart ilsa urǝɣ, ǝlân šizabaten ǝganen daɣ urǝɣ, aɣtin daɣ ǝkkozat tǝbataqqaten ǝgânen daɣ ǝzrǝf. 33 Tǝššilǝyaɣ afǝr wa n anaɣer a daɣ sǝrdaf. Afǝr wa n anaɣer a ǝnta a dǝffǝr za tassansaɣ ǝssǝnduq wa n tassaq. Amaran ǝnta a dawan-z-iqqǝlan tǝzǝmmǝzzǝyt gǝr adag wa zǝddigan d adag wa ogaran tazdak.
34 Tǝdkǝla-du ǝsǝhǝr wa n ǝsǝknǝf tassansaq-qu fǝl ǝssǝnduq wa n tassaq, daɣ adag wa ogaran tazdak.
35 Tǝzzar tassansa tabǝl daɣ tamasna n ahaket daɣ adag wa zǝddigan, tassansaɣ ǝsǝkbǝl ǝn fǝtǝlaten daɣ tǝnǝmiwǝla ǝn tabǝl en da daɣ aganna wa n agala n ahaket daɣ adag wa zǝddigan.
36 «Tazzazdaɣ afǝr iyyan a z'ikǝrirǝyan ɣur ǝmi n ahaket. Afǝr wa zazd-ay daɣ tǝduft n ayfǝd, tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhay tǝzuɣay, ǝd ta zaggaɣat, ǝd lin wa n ǝlǝsǝl, ǝwǝran-tu ǝddǝlugan iga awedan isinnahalan tǝla ǝn madas. 37 Afǝr wa n ǝmi n ahaket a, ag-as sǝmmos gǝttan zawwarnen ǝn tǝggart ilsa urǝɣ, ilen šizabaten n urǝɣ, tǝzzar tagaɣ-asan sǝmmosat tǝbataqqaten ǝn daroɣ.»