25
Tǝmǝwit tas z'ikrǝs ahaket
Šinufa šin tawagginen daɣ ahaket
1 Inna Amaɣlol i Musa: 2 «Annu i maddanǝs n Israyil a di-d-awǝyan širgiten. Awedan kul wa di-igan širgit ǝs man ǝrdanen, wǝdi ǝqbǝlat-as-tat. 3 Aratan da win za tǝqabbalam daɣ tǝrgiten: Urǝɣ, d ǝzrǝf, ǝd daroɣ, 4 ǝd tǝduft n ayfǝd tǝmmuɣat daɣ taddalǝt ta n jǝnnawan, ǝd ta tǝgat taddalǝt ta n jǝnnawan tǝlhay tǝzuɣay, ǝd ta zaggaɣat, ǝd lin, d azaw. 5 D agašek n akar immuɣan daɣ tǝnǝɣmit, d aɣayt n ǝmudar iyyan n agaraw, d ešǝkan ǝn tǝggart. 6 Ǝd widi wa n ǝsǝrɣi ǝn fǝtǝla, d aḍutan ǝzodnen win taggaznen widi wa zǝddigan, d aḍutan win ǝsǝqqǝd. 7 Ǝd tǝhunt iyyat tǝlat karad ǝlmawan tǝgat esǝm onǝyks, ǝd tǝhun šiyyad ǝlanen almaqam, y a sǝr-ǝsnat tǝdrǝɣ tǝbdoq ta z'itaqqan ǝlimam. Tabdoq ta, a daɣ-as tagu talɣaššabat ta n afalla as itawannu efod ǝd šikǝst ta n tawǝy idmaran. 8 Ann-asan a di-agin ehan a sǝr-i iskâtan ad ǝzdǝɣa gar-essan. 9 Tagim-tu ǝnta ǝd mutag-net kul s ǝmmǝk wa kay-ǝssǝkna.»
Ǝssǝnduq wa n tassaq
10 «Ad tagim ǝssǝnduq igan daɣ tǝggart, tǝmos tǝzzǝgrǝt-net ta n tama ǝššin ɣallan d aganna, tǝmos tasaga-net aɣil iyyanda d aganna, tǝmos tǝzzǝgrǝt-net sa sǝr afalla aɣil iyyanda d aganna. 11 Tǝzzar tǝnkǝra s afalla-net d ammas-net tǝɣrǝdaq-qan ǝsǝlǝl n urǝɣ wa izdaran, tagaɣ i fayyan-net abǝl n urǝɣ. 12 Sǝwǝt ǝkkoz ɣabatan n urǝɣ tagaq-qan daɣ tǝɣǝmmar n ǝssǝnduq šin ǝkkozat. Ǝggǝzan ǝššin tama-net iyyat, ǝggǝzan ǝššin tama ta hadat. 13 Taga sanatat tallaɣen ǝn tǝggart, tǝssǝlǝlaq-qanat urǝɣ. 14 Tallaɣen šin, ǝssǝd-tanat daɣ ɣabatan win ǝhanen tamawen n ǝssǝnduq, fǝl a das-ǝqqǝlnat isǝssiway as z'itamadkal, 15 aqqaminat ǝssâdnat daɣ ɣabatan win tama n ǝssǝnduq, wǝr tan-du-z-ǝlǝsnat agamad. 16 Taga daɣ ǝssǝnduq wa, ǝššin sǝlluman win kay z'akfa a fǝl ǝktâban alwajiban-in. 17 Dǝffǝr adi tabǝza-du urǝɣ wa izdaran, taga daɣ-as y ǝssǝnduq wǝdi ǝsǝhǝr. Ǝsǝhǝr wa, ǝnta a fǝl z'inaqqal ǝzni ǝn tǝkutawen šin ǝmmasnen ibakkadan. Ǝsǝhǝr wǝdi, ad iqqǝl ǝššin ɣallan d aganna sa sǝr tǝzzǝgrǝt, iqqǝl aɣil iyyanda d aganna sa sǝr tasaga. 18-19 Tǝwǝta daɣ urǝɣ ǝššin kǝruban tagaq-qan daɣ sanatat tamawen šin gazzolnen n ǝsǝhǝr wa n ǝsǝknǝf. Awen ad agu ǝs tǝmǝwit as ǝsǝhǝr wa ǝd kǝruban win ǝššin a zun as ad agin ewet iyyanda. 20 Angalosan win ad ammarin ǝfrutan-nasan, agin sǝr-san telay y ǝsǝhǝr n ǝssǝnduq, amaran nǝmǝswǝdan ǝššiggân daɣ ǝsǝhǝr. 21 Tǝnkǝra s ǝsǝhǝr wa n ǝsǝknǝf, tǝhǝra sǝr-ǝs ǝssǝnduq, taga daɣ-as ǝššin sǝlluman win kay-z-akfa a fǝl ǝktâban alwajiban. 22 Afalla n ǝsǝhǝr en da a fǝl dak-du-za-tinǝfilila gǝr kǝruban win ǝššin di, ǝmmalaɣ-ak aratan win ǝssǝwara maddanǝs n Israyil.»
Tabǝl ta ǝggarnat tǝgǝlwen
23 «Taga tabǝl tǝgat daɣ tǝggart, tǝmosat ǝššin ɣallan sa sǝr tǝzzǝgrǝt, tǝmos aɣil iyyanda sa sǝr tasaga, tǝmos tǝzzǝgrǝt-net ta n afalla aɣil d aganna. 24 Tabǝl ta, sals-et urǝɣ izdaran, tǝzzar tǝnkǝra s afay-net tǝɣrǝdaqq-id ǝsǝɣlǝy n ǝbǝl igan daɣ urǝɣ. 25 Tagaɣ-as efay iyyan a z'agin dǝnnǝg aɣarɣar-net ahaku ogdan d ǝdekǝl, tǝssǝɣlǝyaq-qu abǝl n urǝɣ ǝntada. 26 Tǝssǝwǝtaɣ ǝkkoz ɣabatan, tagaq-qan daɣ ǝkkozat tǝɣǝmmar šin namawalnen ǝd daran ǝn tabǝl. 27 Iɣabatan win ad nǝmihǝzan d afay wa iɣlayan tabǝl, tǝzzar ǝssǝdnat daɣ-san tallaɣen šin z'ǝqqǝlnen isǝssiway-net as za tǝtamadkal. 28 Tallaɣen šin, a tanat-taga daɣ tǝggart, tǝzzar als-enat urǝɣ, ǝqqǝlnat arat as za tǝtamadkal tabǝl. 29 Tagaɣ ikassan ǝmosnen attablatan, d arat ǝn tǝfataylalen, ǝd kǝbran ǝd tǝkǝbren win taggaznat tǝkutawen šin tawanɣalnen ǝmosnen aratan tamašwinen. Ikassan win kul urǝɣ wa izdaran a daq-qan za taga. 30 Tabǝl ta, a fall-as tassansa tagǝlla ta tǝge tǝnafut dat-i. Tagǝlla ta, ad wǝr ilkǝm ad tǝqqim wǝr tǝnsa dat-i.»
Ǝsǝkbǝl ǝn fǝtǝlaten
31 «Tagaɣ ǝsǝkbǝl ǝn fǝtǝlaten igân ewet iyyanda daɣ urǝɣ wa izdaran. Tǝsaddakamt-net, ǝd tadra-net tǝdrâɣat ǝnta harkid lǝɣwan-net ǝs tǝjigawen as ibilalaɣ ares-nasnat, kul ǝgan dǝr-ǝs ewet iyyanda. 32 Sǝdis lǝɣwan a z'ǝgmǝdnen tadra n ǝsǝkbǝl ǝn fǝtǝlaten, ǝkkullu n aganna ǝwaran-tu karad. 33 Ǝkkullu n alawaɣ idrâɣ ǝs karadat tǝjigawen a daɣ-as mitartarnen, s ǝkkullu n iyyat ibilalaɣ ares-net. 34 Tadra n ǝsǝkbǝl en, ad tǝdrǝɣ s ǝkkozat tǝjigawen a daɣ-as mitartarnen s akkiyyat ibilalaɣ ăres-net. 35 Ilǝɣwan win sǝdis a, ǝkkullu n ǝššin daɣ-san edag iyyanda a daɣ in-ǝntan daɣ tadra, tǝlla daw-san tǝkǝrduft. 36 Šikǝrdaf šin tadra n ǝsǝkbǝl en, ǝd sǝdis lǝɣwan win daɣ-asnat in-ǝntanen, kul ad agin ewet iyyanda, daɣ urǝɣ wa izdaran. 37 Ǝkkullu n alawaɣ agu daɣ ǝmi-net tǝdangast a za tǝqqǝlat fǝtǝla, tagaɣ awen da y ǝmi n alawaɣ wa imosan tadra, iqqǝl awen kul ǝssayat fǝtǝlaten. Fǝtǝlaten šin ad arɣinat tǝtǝwǝgg-asnat tǝmǝwit a daɣ za sǝmmǝlǝwlǝwnat edag wa dat-ǝsnat. 38 Šilmidas šin as za tǝfarrasa tenallay ǝn fǝtǝla, d attablatan, kul, ag-en daɣ urǝɣ wa izdaran. 39 Edag ǝn karadat tǝmǝrwen ǝn kilaw n urǝɣ wa izdaran a daɣ z'agu ǝsǝkbǝl ǝn fǝtǝlaten ǝd mutag-net. 40 Daɣ adi ǝswǝd, tagaɣ aratan win di kul s ǝmmǝk wa kay-ǝssǝkna fǝl ǝdɣaɣ.»