24
Arkawal ǝn tassaq gǝr Mǝššina ǝd Kǝl-Israyil
1 Inna Amaɣlol i Musa: «Gazzay sa sǝr-i, tidawaɣ ǝd Harun, ǝd Nadab, d Abihu, d ǝssayat tǝmǝrwen daɣ ǝmɣaran ǝn Kǝl-Israyil tǝssǝjǝdam-i daɣ igǝg. 2 Kay ɣas a di-du-z-ihazan, meddan win dǝr tǝddewa wǝr di-du-z-ihazan. Amaran tamattay wǝr dǝr-ǝk za tidaw ɣur ǝgǝzzǝy wa za taga.»
3 Ikka Musa tamattay iɣrad-as emel n aratan kul win das-inna Amaɣlol, d ǝlqanun-net kul, tǝzzar tǝjajjayat tamattay adakal ǝn maslan-nasan, ǝnnan: «Arat kul wa inna Amaɣlol, a tu-nagu!» 4 Dǝffǝr awen iktab Musa aratan kul win inna Amaɣlol. Iga-du tanakra tǝnzayat aɣôra n ǝzǝl wa hadan, ikras edag ǝn tǝkutawen daɣ ares n ǝdɣaɣ, issǝɣta ɣur-ǝs marawat tǝhun ǝd sanatat ǝs tǝzzǝgrǝt-nasnat, ǝmmittalnen marawat tawšeten ǝn Kǝl-Israyil ǝd sanatat, 5 dǝffǝr awen iqqan daɣ tǝmmǝdrǝyt ǝn Kǝl-Israyil igi y Amaɣlol šinufa ǝs hărân win ǝmosnen šikutawen šin tirǝkǝmmitnen, ǝd win tǝkutawen šin tassaq. 6 Issǝgdal-du azni ǝn mudaran win ǝgzamnen da, iga aganna-net daɣ kassan, infaz aganna wa hadan fǝl adag wa n tǝkutawen. 7 Dǝffǝr adi obaz-du ǝlkǝttab wa n Arkawal ǝn Tassaq s ǝnta a daɣ ǝktaban alwajiban ǝn Mǝššina, iɣr-ay i tamattay s ǝmǝsli idkâlan. Ǝnnan Kǝl-Israyil: «Ad nagu arat kul wa inna Amaɣlol, nabbardag y awalan-net kul.» 8 Tǝzzar obaz-du Musa azni wa ihan ikassan, infaz-tu fǝl Kǝl-Israyil, inna: «Azni wa isitadda arkawal ǝn tassaq wa dǝr-wan iga Amaɣlol, s as dawan-d-imal alwajiban win kul.»
Ǝgǝzzǝy ǝn Musa ǝd madhalan-net adɣaɣ wa n Sinay
9 Iggǝzzay Musa adɣaɣ iddew ǝd Harun, ǝd Nadab, d Abihu, d ǝssayat tǝmǝrwen n ǝmɣar ǝn Kǝl-Israyil. 10 Ǝnayan Ǝmǝli n Israyil. Tǝlla tǝssut ǝn tǝhun daw daran-net. Šihun šin den bilazlaznat ǝgânat taddalǝt ta n jǝnnawan. Esǝm-nasnat Safir. 11 Mǝššina wǝr iga tǝkma waliyyat i mizwaran n Israyil win t-id-osanen da a tan-ǝmosnen Musa, ǝd Harun ǝd Nadab d Abihu d ǝssayat tǝmǝrwen n ǝmɣar win dǝr ǝddewan. As t-ǝyyǝwanan ǝzǝggǝzdi ǝtšan ǝšwan.
Ǝmǝnǝy ǝn Musa d Amaɣlol
12 Inna Amaɣlol i Musa: «Gazzay-du adɣaɣ, takkaɣ-idu, tǝdrǝra da da, a kay-akfaɣ isǝlluman ǝganen daɣ tǝhun, iwar-tan ǝššǝriɣa, d alwajiban win ǝktaba y ad tawaɣrin.» 13 Isammatag Musa iddew d ǝmadhal-net Joswe, iggǝzzay adɣaɣ wa n Mǝššina. 14 Dat teklay-net, inna y ǝmɣaran: Ǝqqǝlat-ana dada har kawan-du-nǝqqǝl. Harun ǝd Xur ǝddi, a dǝr-wan annattafan, as ila awedan almasalat iyyat as ira amaknaw-net, imǝl-asan-tat. 15 As imal Musa den daɣ ǝgǝzzǝy n ǝdɣaɣ, ilsa agarak adɣaɣ wen. 16 Tǝwar tanaya n Amaɣlol adɣaɣ, ils-ay agarak har fall-as iga sǝdis adan. As iga ǝzǝl wa n ǝssa, iɣra-du Amaɣlol Musa daɣ ammas n agarak en da. 17 Tanaya n Amaɣlol tǝqqal ǝs Kǝl-Israyil zun temsay tǝmihandarat daɣ afalla n ǝdɣaɣ. 18 Iggaz Musa agarak wa ilsan adɣaɣ, igla itagazzay s afalla n ǝdɣaɣ, iqqim-in fall-as har din-iga ǝkkozat tǝmǝrwen n ǝzǝl.