23
Lǝkkum y ǝššǝriɣa wa n Mǝššina
1 «Ad wǝr tǝziwǝziwizaɣ isalan wǝr nǝttǝdda. Ad wǝr tǝggaraɣ aganna n azangaw s igi ǝn tǝgǝyya tǝmosat bahu. 2 Ad wǝr taga tǝkma fǝl as tat-ǝgan taššam n aytedan, wala taga tǝgǝyya ǝn bahu fǝl lǝkkum y aganna wa fǝl ǝggǝtan aytedan imosan ǝmǝzrǝy n ǝššǝriɣa. 3 Ad wǝr tǝggaraɣ aganna n awedan wǝr nǝla tidǝt daɣ elǝkan kuddeɣ imos talǝqqay.
4 As tǝjiwanke har tǝnayaɣ azgar n azangaw-nak, madeɣ ajad-net issiggalan, ad wǝr taqqama wǝr das-t-idu-tǝzzǝrgaza.
5 As tǝnayaɣ ajad n awedan tǝgzâra har t-iggǝdla ǝzuk, wǝr tareɣ tilalt y alǝs wen, tilalaɣ-as s afalla as ikkǝs ilalan.
6 Ad wǝr tabǝza daɣ tǝlǝqqay tidǝt-net daɣ elǝkan.
7 Ad wǝr tǝtinǝmǝnnika ǝd talɣa wǝr nǝmos tidǝt. Ad wǝr tagaɣ iman n awedan itiwadlaman madeɣ imos aw tidǝt, fǝlas nak wǝr hǝkkaɣ azangaw tidǝt. 8 Ad wǝr tǝtabaza tǝmǝs imi, fǝlas ǝsǝddǝrɣǝl a tǝtaggu aytedan win da ǝmosnen imalan ǝn tayttay, tǝtaway-du ǝtǝrmǝs ǝn tidǝt daɣ mǝssawǝs.
9 Ad wǝr tǝdaggazaɣ ǝnaftaɣ iɣsaran daɣ akal-nak, fǝlas tǝssânam awa dǝr tola tišit ǝn naftaɣan ǝɣsarnen daɣ akal iyyan, id idas-kawan as tan-tǝmosam daɣ Masar.»
Ǝššǝriɣa wa iqqalan ǝzǝl wa n tǝsanfawt
10 «Sǝdis elan a za tǝtagga tǝgayyaka tawagost-nak tǝtalaya-du tǝnfa-net. 11 Mišan as iga awatay wa n ǝssa, tayyaq-qat da wǝr tat-tǝnbela, a daɣ-as atšinat tǝlǝqqawen ǝn tamattay-nak, atšin imudaran n ǝsuf awa daɣ-as d-iqqiman. Ifǝrgan-nak win alɣanab ǝd win zaytun da tagg-asan awen da.
12 Sǝdis adan a za tǝtagga tǝšɣala. Ǝzǝl wa n ǝssa zǝrǝz daɣ-as ǝššǝɣǝl, fǝl ad assanfu azgar-nak, d ajad-nak, assanfu ǝšku-nak, d ǝɣǝrib a ɣur-ǝk išɣalan.
13 Sǝsǝmat y aratan kul win dawan-ǝnne nak Amaɣlol. Ad wǝr tǝtimudam y ǝssǝnǝman, amaran ǝllǝfǝd da, ad wǝr tǝlaffadam ǝsmawan-nasan.»
Imaddan karad win zawwarnen daɣ awatay
14 «Awatay kul taggu daɣ-as karad maddan ǝmosnen zazwar-in. 15 Ǝssa adan a za tagaɣ iga fall-ak ǝmud wa n tǝgǝlla wǝr nǝkuf. Tattu tagǝlla ten daɣ ǝssa adan win di. Arat wen ag-ay s asaway inimannakan d arat was kay-omara. Ag-ay daɣ tamert ta ǝskata y awen daɣ tǝllit tas inta awatay wa n Kǝl-Ǝlyǝhud. Fǝlas tallit ten da daɣ du-tǝgmada Masar. A dat-i wǝr tǝbdǝdaɣ tǝsikarayrayaɣ ifassan. 16 Sǝbdǝd amud wa n ɣarat ta tazzarat n awa tǝnbala daɣ tǝwǝgas-nak. As du-tewaya tǝnfa ǝn tǝwǝgas-nak s aɣaywan, tagaɣ amaran amud wa n ǝɣrud ǝn ɣarat. 17 Meddan kul iwar-tan a d-aglin ǝbdǝdan dat-i daɣ ǝkkullu n iyyan daɣ maddan win karad a, Nak Ǝmǝli di n Amaɣlol.
18 Azni ǝn tǝkutawen šin di tawagganen, a tu-wǝr-tǝššidǝwa ǝd tǝgǝlla iha arat wa isakafan. Imudaran win tǝgazzama daɣ maddan, imos awen zazwar-in, ad wǝr tǝssansa tadǝnt-nasan har ifaw.
19 Taway-du s ahan n Amaɣlol di n Ǝmǝli-nak, tafrǝnt daɣ tǝnfa ta tazzarat daɣ sǝgyak-nak. Ad wǝr tǝsaŋŋaɣ eɣayd s ǝx ǝn mas.»
Arkăwalan ǝganen daɣ batu n iguz n akal ǝn Kanan
20 «Nak a din-assaglaɣ angalos a dat-ǝk z'imǝlan, fǝl a kay-agǝz daɣ tarrayt har tawǝdaɣ edag wa dak-sammataga. 21 Angalos wǝdi sǝɣmǝrat-tu, tabbardagam-as. A fall-as wǝr taffallagam, amaran wǝr z'iqbǝl lahanan-nawan, fǝlas tazdak-in a z'isǝnnǝfilǝl. 22 Mišan as das-tǝbbǝrdagam, tǝgam arat kul was kawan-omara, ǝddi imagzaran-nawan kul nak a dǝr-san z'ammagaran. 23 Angalos-in a dak-izar, izǝzzǝlulǝq-qay har tasaɣ akal n Amoritatan, ǝd wa n Xitatan, ǝd wa n Fǝrizitatan, ǝd wa n Kananitatan, ǝd wa n Xiwitatan, ǝd wa n Yebusatan, tǝzzar ǝɣrǝdaq-qan tenaɣay. 24 Ad wǝr tǝsajada dat malan-nasan, wala tǝɣbǝdaq-qan. Ad wǝr tagaɣ ǝmazal wa taggin, mišan a tan-tǝɣlǝba, tǝzzar tǝɣrǝda terazay n ǝssǝnǝman-nasan. 25 Iwar-kawan a di-tǝɣbǝdam nak Amaɣlol, Ǝmǝli-nawan, ǝddi ad agaɣ albaraka daɣ mensewan-nawan, d aman-nawan, ǝssǝgǝgaq-qawan deɣ a imosan šiwǝrnawen. 26 Wǝr tu-za-tǝmǝl tǝntut tǝššošafat, wala iyyat tǝggigrat daɣ akal-nawan, akfaq-qawan taɣrǝst zagret.
27-28 A dawan-in-ǝzzuzǝra tasa tǝrmaɣat, har ǝwǝfnat tǝmattiwen kul šin za tǝmmǝram. A dat-wan sǝddǝggǝgaɣ izǝnga-nawan ǝmosnen Xiwitatan ǝd Kananitatan, ǝd Xitatan, har ǝfǝlan daw-wan. 29 Mišan ya wǝrgeɣ awatay iyyanda a daq-qan z'ǝstǝɣa, fǝl ad wǝr ǝgmedan akal, ayyin-tu issuf, a daɣ-as tittǝyan wǝxsan a dawan-tǝha tǝkma. 30 Sollan sollan as daɣ-san z'abǝzaɣ akal wa, akfaɣ-awan-tu iket tǝtittǝyam, fǝl ad tawǝdam iduf n akal wen. 31 Ad ǝfrǝsaɣ iyyakatan-nawan, abǝz amadal-nawan ɣur agaraw wa n Telant, har agaraw wa Zǝwwǝran, abǝz ǝntada ɣur taneray ta n agala har agarew wa n Efrat fǝlas Kǝl akal wǝdi a kawan akfa fall-asan tarna, tǝzzar tǝstǝɣam-tan. 32 A dǝr-san wǝr tagim tassaq waliyyat, ǝntanay wala imalan-nasan. 33 Ad wǝr tayyaɣ aytedan win di ǝxsǝran daɣ akal-nak, fǝlas as tan-toyyeɣ ad tudeɣ daɣ taftawen-nasan ǝmosnen ǝlɣibada ǝn malan-nasan, awǝy-du sǝr-wan awen igi n abakkad dat-i.»