4
Te Tumeꞌl Titzaꞌ Tzan Tel Qnikyꞌ Kyiꞌj Kye Aj Nyaꞌtx Bꞌanꞌax Kyitzaꞌ
1 Erman aj ganimix witzaꞌ, kꞌon xik etokslaꞌ kyyol kye aj nkyqꞌumaꞌ qa kyetz nyolin Qtata Dios kyukyꞌiꞌl, sinoke intqet ebꞌisuꞌ aj nkyyoliꞌ tzan tel enikyꞌ qa a te Txew Dios atqex tuj kyanim qa nyaꞌtxji. Komo twitz ja txꞌoꞌtxꞌni ateꞌ kyꞌilaꞌj aj nkyqꞌumaꞌ qa kyetz aj yolil tyol Dios-eꞌ per nyaꞌtx bꞌanꞌax kyitzaꞌ. 2 Ikxjani etetz bꞌaꞌn tzan tel enikyꞌ qa bꞌanꞌax a te Txew Dios nyolin: Abꞌl aj ntqꞌumaꞌ qa te Jesukrist owul tzani twitz txꞌoꞌtxꞌ bꞌix tetz xhchiꞌjel bꞌan bꞌanꞌax xhchiꞌjel xjal tuq, tetzji aj te Qtata Dios. 3 Yatzun abꞌl te aj ntqꞌumaꞌ qa te Jesukrist kꞌontiꞌl owul bꞌix kꞌontiꞌl tuq xhchiꞌjel bꞌan bꞌanꞌax, tetzji nyaꞌtx aj te Qtata Dios, sinoke tetz txew aj te tajqꞌoj te Qajaw Jesukrist, te tajqꞌoj aj oje tzꞌok echaꞌoꞌ owulel bꞌix ajnaꞌl oje tzul, atqet tzani twitz txꞌoꞌtxꞌ.*
4 Nkꞌwaꞌal, etetz aꞌix aj te Qtata Dios bꞌix etetz oje kyeqet etitzaꞌ [kye aj laꞌj-eꞌni], tzan tpaj te [Txew Dios] aj atqet exol etetz mas nim tajwalil twitz te [Tajaw Choj] aj atqet kxol kye aj te twitz txꞌoꞌtxꞌ. 5 Kyetz qꞌapoꞌ kyibꞌ tuj tqꞌabꞌ te ja twitz txꞌoꞌtxꞌni, astilji cha nkyeyolin tiꞌj aj nbꞌaj twitz ja txꞌoꞌtxꞌni, bꞌix kye txqꞌanky aj cha twitz ja txꞌoꞌtxꞌni, nꞌok ksiꞌ kywiꞌ kyiꞌj.* 6 Qetz aꞌoꞌ aj te Qtata Dios, bꞌix kye aj kyotzqiꞌ Qtata Dios nꞌok ksiꞌ kywiꞌ qiꞌj, yatzun kye aj nyaꞌtx aꞌeꞌ aj te Qtata Dios kꞌontiꞌl nꞌok ksiꞌ kywiꞌ qiꞌj.* Ikxji nꞌel qnikyꞌ [abꞌleꞌ kye aj] te tumeꞌl bꞌanꞌax bꞌix [abꞌleꞌ kye aj] te nyaꞌtx bꞌanꞌax.
Tzan Tpaj Te Qtata Dios, Bꞌaꞌn Tzan Kyqet Qganiꞌ Kye Txqꞌanky
7 Erman aj ganimix witzaꞌ, intqet qganiꞌ qibꞌ, tzan tpaj te tumeꞌl titzaꞌ tzan tqet qganiꞌ junky ntzaj tukyꞌi Qtata Dios. Te aj nqet tganiꞌ junky, tetz jun tkꞌwaꞌal Qtata Dios bꞌix tetz oje tok totzqilaꞌ Qtata Dios. 8 Te aj kꞌontiꞌl nqet tganiꞌ abꞌl tetz, tetz minaꞌ tok totzqilaꞌ Qtata Dios, komo te Qtata Dios nkyeqet tganiꞌ kye xjal. 9 Te Qtata Dios oqet tyekꞌuꞌ titzaꞌ tuq tetz bꞌan nqoqet tganiꞌ stzajlen tlajoꞌ te Tkꞌwaꞌal tzani twitz txꞌoꞌtxꞌ, te tkꞌwaꞌal aj cha jun tuq, bꞌix otzaj tlajoꞌ tzan qanqꞌin qetz tzan tpaj tetz.* 10 Ikxjani atok titzaꞌ te Qtata Dios nqoqet tganiꞌ: Nyaꞌtx tzan tpaj-wit aꞌoꞌ qetz tbꞌay oqet qganiꞌ te Qtata Dios, sinoke a tetz oqet tganiꞌ aꞌoꞌ tbꞌayaꞌ bꞌix otzaj tlajoꞌ te Tkꞌwaꞌal tzan tkamik te chojbꞌil te qchoj. 11 Erman aj ganimix witzaꞌ, komo te Qtata Dios oqet tganiꞌ aꞌoꞌ ikxji, ax qetz presis tzan tqet qganiꞌ qibꞌ qxolx. 12 Nijunwt abꞌl oje tzꞌok eꞌen te Qtata Dios,* per qa qetz oqtel qganiꞌ qibꞌ qxolx, ntons te Qtata Dios atqet qxol, bꞌix titzaꞌ tetz nqoqet tganiꞌ, ax ikxji nkyeqet qganiꞌ txqꞌanky.
13 Ikxjani te tumeꞌl titzaꞌ nꞌel qnikyꞌ qa nqobꞌet tukyꞌiꞌl bꞌix tetz qukyꞌiꞌl: Tetz oje tzaj tsiꞌ te Txew tuj qanim.* 14 Bꞌix aꞌoꞌxk qetz oje tzꞌok qen bꞌix nxik jqꞌumaꞌ te Qtata Dios oje tzaj tlajoꞌ te Tkꞌwaꞌal te kolol kye xjal twitz txꞌoꞌtxꞌ.* 15 Abꞌl aj ntqꞌumaꞌ qa te Jesus Tkꞌwaꞌal Qtata Dios, ntons te Qtata Dios atqex tuj tanim bꞌix tetz atqet tukyꞌi Qtata Dios. 16 Bꞌix qetz oje tzꞌel qnikyꞌ, bꞌix nqokslaꞌ, te Qtata Dios nqoqet tganiꞌ. Te Qtata Dios bꞌaꞌn ganin xjal. Abꞌl aj kꞌontiꞌl nkaj tsiꞌ tzan kyqet tganiꞌ txqꞌanky ntons nbꞌet tukyꞌi Qtata Dios bꞌix te Qtata Dios atqex tuj tanim. 17 Ikxji kyebꞌayleꞌ mas nkyeqet qganiꞌ txqꞌanky, bꞌix oj tul te jwisy, witꞌlik jkꞌuꞌj tiꞌj tzan tpaj qetz nqobꞌet twitz te ja txꞌoꞌtxꞌni iktzaꞌx te Jesukrist. 18 Tzan tpaj ganimoꞌ tzan Qtata Dios, kꞌontiꞌl nqoxobꞌ, komo npon tnajsaꞌ kyaqil xobꞌalj tzan tpaj te Qtata Dios nqoqet tganiꞌ bꞌan bꞌanꞌax; komo te xobꞌalj at xhchoꞌnal eqꞌiꞌ titzaꞌ, bꞌix abꞌl aj nxobꞌ minaꞌ tok totzqilaꞌ titzaꞌ te Qtata Dios nqoqet tganiꞌ. 19 Qetz nqet qganiꞌ te Qtata Dios tzan tpaj tetz oqet tganiꞌ aꞌoꞌ tbꞌayaꞌ. 20 Qa at abꞌl ntqꞌumaꞌ, “Wetz nqet nganiꞌ Qtata Dios,” per qa nꞌok tajqꞌojaꞌ jun abꞌl tetz, tetz cha jun laꞌj. Komo jun xjal aj kꞌontiꞌl nqet tganiꞌ jun abꞌl tetz aj nꞌok teꞌeꞌ, ax kꞌontiꞌl nqet tganiꞌ Qtata Dios aj kꞌontiꞌl nꞌok teꞌeꞌ. 21 Iktzaꞌx oje kaj qꞌumaꞌ te qetz ikxjani: Abꞌl aj nqet tganiꞌ Qtata Dios, ax intqet tganiꞌ jun abꞌl tetz.*