5
1 Abꞌl aj ntokslaꞌ qa te Jesus ajixk tetz te Krist Aj Joyomajkix Tuq, tetz jun tkꞌwaꞌal Qtata Dios. Bꞌix abꞌl aj nqet tganiꞌ te Kꞌwaꞌlon, ax nqet tganiꞌ te Tkꞌwaꞌal. 2 Ikxjani te tumeꞌl titzaꞌ nꞌel qnikyꞌ qa nkyeqet qganiꞌ kye tkꞌwaꞌal Qtata Dios: Nqet qganiꞌ te Qtata Dios bꞌix nqet qokslaꞌ te aj okaj tqꞌumaꞌ. 3 Komo oj tqet qganiꞌ Qtata Dios telponx tzan tqet qokslaꞌ aj ntzaj tqꞌumaꞌ, bꞌix te aj ntzaj tqꞌumaꞌ nyaꞌtx jun tidiꞌ aj bꞌan kwest te qetz.* 4 Komo kyaqil kye aj nkyeꞌok tkꞌwaꞌal Qtata Dios, kyetz nqet te nyaꞌtx galan kyitzaꞌ, bꞌix qetz tzan tpaj toklen witꞌlet jkꞌuꞌj tiꞌj Qajawil oje qet te nyaꞌtx galan qitzaꞌ. 5 ¿Abꞌl te aj nqet te nyaꞌtx galan titzaꞌ? Aꞌox te aj ntokslaꞌ qa te Jesus Tkꞌwaꞌal Qtata Dios.
Qebꞌenky Alkyetz Te Bꞌanꞌax Tiꞌj Te Tkꞌwaꞌal Qtata Dios
6 Te ja Jesusni a tetz te aj owul bꞌix ojaw siꞌ aꞌ twiꞌ bꞌix owel xhchikyꞌel aj tkamik, nyaꞌtx aꞌox ojaw siꞌ aꞌ twiꞌ, sinoke ojaw siꞌ aꞌ twiꞌ bꞌix ax owel xhchikyꞌel aj tkamik. Te Txew Dios a tetz te aj nyolin te bꞌanꞌax tiꞌj ntzani [tuj qanim], tzan tpaj te Txew Dios nyolin tumeꞌl. 7 Komo ateꞌ ox kye aj nkyeyolin te bꞌanꞌax tiꞌj:a 8 Jun, te Txew Dios, bꞌix yaji aj tjawlen siꞌ aꞌ twiꞌ, bꞌix te junky aj telen xhchikyꞌel aj tkamik, bꞌix kyoxil parej nkyeyolin. 9 Qa galan tzan qokslan aj nkyqꞌumaꞌ kye xjal, ntons mas nim toklen te aj ntqꞌumaꞌ te Qtata Dios twitz kyyol kye xjal, bꞌix te Qtata Dios oje yolin te tumeꞌl tiꞌj te Tkꞌwaꞌal.* 10 Abꞌl te aj nꞌokslan tiꞌj te Tkꞌwaꞌal Qtata Dios, tuj tanimx nyolin bꞌanꞌax ikxji. Per yatzun te aj kꞌontiꞌl nꞌokslan tiꞌj Qtata Dios, tetzji ntqꞌumaꞌ iktzeꞌxtzun te Qtata Dios jun laꞌj, tzan tpaj kꞌontiꞌl nxik tokslaꞌ aj oje tzaj tqꞌumaꞌ Qtata Dios tiꞌj te Tkꞌwaꞌal. 11 Aj ntzani te aj oje tzaj tqꞌumaꞌ: Tetz oje tzaj tsiꞌ jun qanqꞌin te jun-eleꞌx, bꞌix te ja qanqꞌinni tzajnaq tukyꞌi te Tkꞌwaꞌal. 12 Abꞌl aj galan atqet tukyꞌi te Tkꞌwaꞌal Dios, at jun tanqꞌin; yatzun te aj nyaꞌtx galan atqet tukyꞌi te Tkꞌwaꞌal Qtata Dios, kꞌontiꞌl jun tanqꞌin.*
13 Wetz nqet ntzꞌibꞌaꞌ kyaqil ntzani te etetz aj nkxꞌokslan tiꞌj Tkꞌwaꞌal Qtata Dios, tzan tok echaꞌoꞌ at jun etanqꞌin te jun-eleꞌx.* 14 Bꞌix qetz bꞌan witꞌlik jkꞌuꞌj, qa oxeꞌl jqaniꞌ jun tidiꞌ tukyꞌiꞌl iktzaꞌx tetz tgan, tetz ntzaj tsiꞌ twiꞌ qiꞌj, oqotzajel xhchaꞌoꞌ. 15 Bꞌix qa qebꞌen tetz ntzaj xhchaꞌoꞌ aj maꞌtx xik jqaniꞌ tukyꞌiꞌl, ntons ax qebꞌen maꞌtx stzaj tsiꞌ qetz te aj maꞌtx xik jqaniꞌ tukyꞌiꞌl.* 16 Qa at abꞌl nꞌok ten jun qerman njoyon choj iktzaꞌ choj aj kꞌontiꞌl nqoxik tin tuj jkamiky, a tgan tzan txnaqꞌtzan tiꞌj aj qermanji, bꞌix ikxji te Qtata Dios otzajel tsiꞌ tanqꞌin te qerman. Ax at choj aj nqoxik tin tuj jkamiky, per wetz kꞌontiꞌl nxik nqꞌumaꞌ tzan qxnaqꞌtzan tiꞌj jun aj nkꞌulun te nini. 17 Kyaqil jkꞌulbꞌen aj nyaꞌtx galan, te nini choj, per ax at choj aj kꞌontiꞌl nqoxik tin tuj jkamiky.
18 Ax qebꞌenky abꞌl aj nꞌok jun tkꞌwaꞌal Qtata Dios, ya kꞌontiꞌl njoyon choj, tzan tpaj te Tkꞌwaꞌal Qtata Dios nkꞌulun kwent tetz, bꞌix te Tajaw Choj kꞌontiꞌl jun tidiꞌ bꞌaꞌn tzan tok tkꞌuluꞌ tiꞌj. 19 Qetz aj aꞌoꞌ te Qtata Dios, qetz qebꞌenky kyaqil kye xjal aj twitz txꞌoꞌtxꞌ akyeqet tuj tqꞌabꞌ te Tajaw Choj. 20 Bꞌix ax qebꞌenky te Tkꞌwaꞌal Qtata Dios oje tzul bꞌix oje tzaj tsiꞌ jun qnabꞌl tzan tok qotzqilaꞌ te [Qtata Dios aj] bꞌanꞌax, bꞌix qetz mojbꞌaꞌ qibꞌ tukyꞌi Tkꞌwaꞌal tetz, aj Jesukrist. A tetz te Dios bꞌan bꞌanꞌax bꞌix a tetz te aj ntzaj swan qanqꞌin te jun-eleꞌx.* 21 Etetz nkꞌwaꞌal, intok esiꞌ enabꞌl kyiꞌj kye aj nyaꞌtx dios bꞌan bꞌanꞌax.