Te Tkabꞌiꞌ Uꞌj Stzꞌibꞌen Waꞌnch
1
Jun Limbꞌil
1 Wetz aj tijxjal aꞌin [aj at wajwalil kxol kye qerman], wetz nqet ntzꞌibꞌaꞌ ja uꞌjni te yatz nan,a yatz aj joyomich [tzan Qtata Dios], bꞌix ax nqet ntzꞌibꞌaꞌ kye awal. Wetz nkxqet nganiꞌ bꞌan bꞌanꞌax, bꞌix nyaꞌtx aꞌox wetz sinoke ax nkxqet kyganiꞌ kyaqil kye aj oje tzꞌok kyotzqilaꞌ te tumeꞌl bꞌanꞌax. 2 Nkxqet qganiꞌna tzan tpaj te tumeꞌl bꞌanꞌax aj atqex tuj qanim bꞌeyx te jun eleꞌx. 3 Te Qtata Dios bꞌix te Qajaw Jesukrist aj Tkꞌwaꞌal, otzajel ksiꞌ jun nim bꞌan galan qajsik, bꞌix owokel loꞌet kykꞌuꞌj qiꞌj, bꞌix oqtel kchewsaꞌ jkꞌuꞌj, bꞌix oqtel kykꞌuluꞌ te ntzani tuj tumeꞌl bꞌanꞌax bꞌix iktzaꞌx nqoqet kyganiꞌ.
A Tgan Tzan Tqet Qganiꞌ Qibꞌ Qxolx
4 Wetz bꞌan nkyinchalaj kyoklen weꞌeꞌ junjun kxol kye awal nkyebꞌet tuj tumeꞌl iktzaꞌx okaj tqꞌumaꞌ te Qtata Dios qetz.* 5 Ajnaꞌl nan, ngan tzan tqet nwitz awitz, per te aj oqtel ntzꞌibꞌaꞌ nyaꞌtx jun yol aj minaꞌ tok achaꞌoꞌ, sinoke axkix aj ojkꞌamoj bꞌan tbꞌay-el ikxjani: Intqet qganiꞌ qibꞌ qxolx.* 6 Bꞌix ikxjani titzaꞌ tzan tqet qganiꞌ qibꞌ: A tgan tzan qbꞌet tuj tumeꞌl iktzaꞌ okaj tqꞌumaꞌ [te Qtata Dios]. Aj ntzani te aj okaj tqꞌumaꞌ iktzaꞌx owok echaꞌoꞌ atx bꞌan oqtxiꞌ tzan ebꞌet tuj tumeꞌl ikxji.*
Kꞌontiꞌl Tzan Tkaj Jkolaꞌ Txnaqꞌtzbꞌen Jesukrist
7 [Nxik nqꞌumaꞌ ntzani tzan tpaj] oje kyeꞌex [qxol] kyꞌilaꞌj xjal aj nkyeꞌeqꞌin txqꞌanky xjal, kyetz kꞌontiꞌl nkyokslaꞌ qa te Jesukrist owul iktzaꞌx jun xjal bꞌan bꞌanꞌax. Jun xjal ikxji, tetz cha jun eqꞌil xjal bꞌix jun tajqꞌoj te Qajaw Jesukrist.* 8 Intok esiꞌ waq enabꞌl tzan kꞌon tponaj exol etetz kyaqil te galan aj owok exol tzan tpaj qaqꞌumbꞌen, sinoke tzan ekꞌamon kyaqil te aj bꞌan galan. 9 Abꞌl aj nkaj tkolaꞌ te tumeꞌl bꞌan bꞌanꞌax bꞌix ya kꞌontiꞌl nqet tokslaꞌ te txnaqꞌtzbꞌen Krist, tetz kꞌontiꞌl nbꞌet tukyꞌi Qtata Dios; per yatzun te aj kꞌontiꞌl nkaj tkolaꞌ te txnaqꞌtzbꞌen Krist, te nini nbꞌet tukyꞌi Qtata Dios bꞌix tukyꞌi Tkꞌwaꞌal [aj Jesukrist].* 10 Qa at abꞌl tzpon exol bꞌix nxnaqꞌtzan junky tidiꞌ aj nyaꞌtx tumeꞌl iktzaꞌx ja xnaqꞌtzbꞌenni, kꞌon ekꞌamoj tuj ejay bꞌix kꞌon kxliman tetz [iktzaꞌ jun qerman], 11 komo abꞌl aj owokel liman tetz [iktzaꞌ jun qerman], ntons ax tetz nxik tsamoꞌ tibꞌ tukyꞌi te aj nyaꞌtx galan ntkꞌuluꞌ.
Jun Kawbꞌil
12 Wetz at tidiꞌchq tzan txik nqꞌumaꞌ etetz, per kꞌon ngan tzan txik nqꞌumaꞌ cha tuj uꞌj. Wetz loꞌik nkꞌuꞌj tzan npon eꞌel etetz bꞌix ngan yolin nwitzaleꞌ etukyꞌiꞌl,* ikxji tzan qchalaj bꞌan byenech. 13 [Bꞌix yatz nan], jun limbꞌil te yatz tzan kye tal awerman aj joyoꞌ [tzan Qtata Dios].