Te Toxiꞌ Uꞌj Stzꞌibꞌen Waꞌnch
1
Jun Limbꞌil
1 Wetz aj tijxjal aꞌin [aj at wajwalil kxol kye qerman], wetz nqet ntzꞌibꞌaꞌ ja uꞌjni te yatz wamiw Gay* aj bꞌan bꞌanꞌax ajbꞌilaꞌ aꞌich witzaꞌ. 2 Yatz erman aj bꞌan ganimich, wetz nkyinxnaqꞌtzan tukyꞌi Qtata Dios tzan tel galan kyaqil awukyꞌiꞌl iktzaꞌx te galan nꞌok tuj awanim, bꞌix tzaj tsiꞌxwit jun axwinqlal. 3 Wetz nim nkyinchalaj tuq aj kyul txqꞌan qerman bꞌix otzaj kyqꞌumaꞌ kyaqil titzaꞌ yatz nchbꞌet, qa yatz kꞌontiꞌl nkaj asiꞌ tzan abꞌet tuj te tumeꞌl bꞌanꞌax.* 4 Wetz kꞌontiꞌl junky tidiꞌ aj mas nkyinchalaj tiꞌj sinoke oj tok nchaꞌoꞌ qa kye nkꞌwaꞌala nkyebꞌet tuj te bꞌanꞌax.
Qoꞌonen Kyukyꞌi Kye Qerman Laqꞌchik Xjal Aj Nkyeꞌul Pakbꞌon Qxol
5 Yatz erman aj ganimich, galan nchkꞌulun tzan kꞌon kaj asiꞌ tzan awonen kxol kye qerman bꞌix mas kyukyꞌi kye aj [laqꞌchik xjal aj nkyepon exol bꞌix] nyaꞌtx otzqiꞌmj-eꞌ. 6 Kyetz oje xik kyqꞌumaꞌ kywitz kkyaqil kye qerman titzaꞌ yatz nkyeqet aganiꞌ. Galan qa yatz nlay kaj asiꞌ tzan awonen kyukyꞌiꞌl tukyꞌi te aj presis te kyetz, iktzaꞌ te Qtata Dios tgan, bꞌix ikxji bꞌaꞌn tzan kxik galan tuj kybꞌey. 7 Komo kyetz eꞌex [tuj kyamaqꞌ tzan kypakbꞌan] tzan tpaj nqet kyganiꞌ [te Qajawil], bꞌix kꞌontiꞌl maꞌtx ktzoqpij tzan kyok oneꞌ tzan kye aj kꞌontiꞌl nkyeꞌokslan. 8 Astilji aꞌoꞌ qetz presis tzan jkꞌamon kye qerman aj iktzaꞌ kyetz, tzan qonen kyukyꞌiꞌl tzan kypakbꞌan te bꞌanꞌax.
Kꞌontiꞌl Tzan Tel Qin Kyiꞌj Txqꞌanky Te Aj Nyaꞌtx Galan Nkykꞌuluꞌ
9 Wetz oje xik nsamaꞌ jun uꞌj kye kyaqil qerman tzi, per te Diótrefes aj mer tgan tzan tok tetz tbꞌay kxol kye qerman, tetz kꞌontiꞌl nqoqet tokslaꞌ. 10 Astilji qa okyinpoyon wetz tzi, okyinyoliyon kyukyꞌi kye qerman titzaꞌ tetz tidiꞌchq yol njaw bꞌantik titzaꞌ, tidiꞌchq njaw tnikꞌoꞌ qiꞌja. Bꞌix pyor twitz nini, tetz kꞌontiꞌl nkyeqet tkꞌamoꞌ kye qerman aj nkyepon, bꞌix kye qerman tzi aj kygan tzan kyqet kykꞌamoꞌ, tetz kꞌontiꞌl nstzoqpiꞌ tzan kykꞌulun ikxji, qa kyetz nkyekꞌulun ikxji ntons nkyeꞌex tlajoꞌ kxol.
11 Yatz erman aj ganimich, kꞌon tzꞌel awin yatz aj nyaꞌtx galan nqet yekꞌuꞌ awitz, sinoke aꞌox aj galan. Abꞌl aj nkꞌulun tumeꞌl, te nini nbꞌet tukyꞌi Qtata Dios; yatzun te aj nkꞌulun nyaꞌtx galan, te nini kꞌontiꞌl totzqiꞌ Qtata Dios.* 12 Kyaqil nkyeyolin galan tiꞌj te Met, bꞌix tetz nkꞌulun ikxtzaꞌx te Tyol Qtata Dios nyolin. Ax qetza ax nqoyolin galan tiꞌj tetz, bꞌix yatz awebꞌen tumeꞌl nqoyolin.
Jun Kawbꞌil
13 Wetz at tidiꞌchq tzan txik nqꞌumaꞌ yatz per kꞌon ngan tzan txik nqꞌumaꞌ cha tuj uꞌj 14 tzan tpaj loꞌik nkꞌuꞌj nlay kyinnachqꞌin tzan npon eꞌel yatz bꞌix ngan yolin nwitzaleꞌ awukyꞌiꞌl.* 15 Qet chewsaꞌxwit akꞌuꞌj. Kye tal awanabꞌ nkyesaman jun limbꞌil te yatz.