Te Uꞌj Stzꞌibꞌen Juds
1
Jun Limbꞌil
1 Wetz aꞌin Juds, qꞌapoꞌ wibꞌ nkyinꞌaqꞌunan te Jesukrist bꞌix aꞌin titzꞌin te Chaw,* wetz nqet ntzꞌibꞌaꞌ ja uꞌj ntzani te etetz aj ukꞌlemix bꞌix ganimix nim tzan te Qtata Dios bꞌix kolomix tzan te Qajaw Jesukrist. 2 Tzꞌokxwit loꞌet tkꞌuꞌj Qtata Dios etiꞌj bꞌix qetxwit xhchewsaꞌ ekꞌuꞌj bꞌix kxqetxwit tganiꞌ nim.
Ikxjani Titzaꞌ Tzan Tel Qnikyꞌ Kyiꞌj Kye Aj Nyaꞌtx Tumeꞌl Nkyexnaqꞌtzan
3 Etetz waq erman aj bꞌan ganimix tzan Qtata Dios, wetz ngan tuq tzan tqet ntzꞌibꞌaꞌ te etetz tiꞌj te tumeꞌl titzaꞌ nqokolet parej qkyaqil. Per ajnaꞌl nꞌok wen bꞌan presis tzan tqet ntzꞌibꞌaꞌ tzan nnimsan ekꞌuꞌj chꞌin tzan tqet ekoloꞌ tukyꞌi jun tkꞌuꞌjlal te tumeꞌl aj jaꞌ witꞌlik jkꞌuꞌj, te tumeꞌl aj otzaj qꞌapoꞌ qetz aj pawamoꞌ te Qtata Dios. 4 Komo ateꞌ junjun xjal oje tzꞌox ksamoꞌ kyibꞌ qxol cha laꞌj-eꞌ, aꞌeꞌ aj atx bꞌan oqtxiꞌ ebꞌajkaj swaꞌ tzan kxik siꞌ tuj il. Kye ja xjal aj kꞌontiꞌl Dios tuj kywitzni, te galan aj nkꞌulun te Qtata Dios qxol nꞌoken kyitzaꞌ cha tzan kykꞌulun tidiꞌchq nyaꞌtx galan, bꞌix nꞌel kyikꞌoꞌ te Qajaw Jesukrist aj aꞌox tetz at nim tajwalil tiꞌj kyaqil. 5 Anke etetz etebꞌen kyaqil ntzani, wetz ngan tzan stzaj nnaꞌoꞌ te etetz te ja ntzani: Te Qajaw aj kyetz teqꞌiꞌ kye qijajil Israel tuj Ejipt, aj kyqet tkoloꞌ kyiꞌj kye xjal txini,* otkꞌuluj tzan kyponaj kye [qijajil] aj kꞌontiꞌl ebꞌajꞌokslan tiꞌj.* 6 Bꞌix ax ikxji otkꞌuluj kyukyꞌi kye ángel aj kꞌontiꞌl ebꞌajqet ten tuj kyluwar jaꞌ ojetq kykaj siꞌ sinoke okaj kykolaꞌ kyluwar, bꞌix astilji te Qtat oje kyekaj tsiꞌ te jun-eleꞌx tuj jun luwar aj bꞌan xop max oj tul te jwisy. 7 Bꞌix ax ikxji okyꞌik kyiꞌj kye aj Sodom bꞌix Gomor bꞌix kye txqꞌanky amaqꞌ qaynin tzi aj jaꞌ kye xjal cha nkyekꞌajajin tuq bꞌix pur xhqꞌe-eꞌ tuq.* Astilji owok kyen twitz xhchoꞌnal tzan kyten iktzaꞌ jun yekꞌbꞌil kyiꞌj kye aj owokel kyen twitz te nim qꞌaqꞌ aj kꞌontiꞌl nqextzaj. 8 Bꞌix anke oje kyꞌik kyaqil nini, yatzun kye ja xjal ajnaꞌlni cha nkyeximan, tidiꞌchq nyaꞌtx galan nkykꞌuluꞌ tukyꞌi kchiꞌjel, nꞌel kyikꞌoꞌ kyaqil aj at kyajwalil, bꞌix nkyeyolin bꞌan nyaꞌtx galan kyiꞌj kye [ángel] aj at nim kyajwalil tuj kaꞌj. 9 Yatzun te Migel, aj ángel aj mas nim tajwalil, tetz aj nqꞌojin tuq* tukyꞌi te Tajaw Choj tiꞌj te xhchiꞌjel Moisés,* tetz kꞌontiꞌl oxik tpoqoꞌ, sinoke cha oxik tqꞌumaꞌ ikxjani: “Qajawxwit xik poqon te yatz.”* 10 Per ajnaꞌl kye ja xjal ntzani, kyetz nkyeyolin bꞌan nyaꞌtx galan tiꞌj kyaqil tidiꞌchq aj kꞌontiꞌl nꞌel kynikyꞌ tiꞌj, bꞌix te aj nkyekꞌulun kꞌontiꞌl nqet kybꞌisuꞌ tiꞌj, iktzaꞌ pur txkup-eꞌ, bꞌix tzan tpaj nini npon kynajsaꞌ kyibꞌx. 11 Last-alo kyetz, tzan tpaj oje xik kyin aj owok kyen tiꞌj Kain.* Oje xik kyin junky bꞌey tzan kykambꞌan jun twiꞌ kykꞌuꞌj iktzaꞌx te nyaꞌtx galan aj oqet tkꞌuluꞌ te Balam,* bꞌix iktzaꞌx te Korey, ax ikxji kyetz okyekamel tzan ktzꞌakal.* 12 Oj ewaꞌan tzan enaꞌon tkamlen te Qajawil, kyetz ateqet exol per kꞌontiꞌl ebꞌajil te kylaꞌjul tuj kyanim.a Nkyewaꞌan etukyꞌiꞌl per kꞌontiꞌl Dios tuj kywitz; cha nkyebꞌisun tiꞌj kykꞌuꞌjx; kyetz iktzaꞌ muj aj chꞌinwt jabꞌ eqꞌiꞌ titzaꞌ, cha nxik eqꞌiꞌ jaꞌchq tzan kyaqꞌiqꞌ; kyetz iktzaꞌ tzeꞌ aj kꞌontiꞌl nkyewitzan, oje kyejatz txꞌoqoꞌ, bꞌan kamnaqeꞌ; 13 kyetz cha iktzaꞌ te nim aꞌ aj npununun, nxik xtoloqꞌin,* njaw potx tajsik iktzaꞌ te aj nꞌel kyeqꞌiꞌ kkyꞌexaw; kyetz naqe cheꞌw aj cha nkyesutin twitz kaꞌj bꞌix cha okyekajel tuj qlolj te jun-eleꞌx. 14 Te Enok,* aj twuqiꞌ chmanbꞌaj atx aj taqꞌlen tiꞌj te Adan, tetz otyolij tyol Qtata Dios kyiꞌj kyetz ikxjani: 15 “Wetz oxik wen te Qajawil ikjaꞌn tuq stzaj kxol kyꞌilaꞌj mil kye aj pawameꞌ aꞌox te tetz,* ikjaꞌn tuq stzaj qꞌumal abꞌl at kypaj kxol kyaqil xjal, bꞌix tzan kxik tsiꞌ tuj il kye aj kꞌontiꞌl tuq Dios tuj kywitz tzan tpaj kyaqil kykꞌulbꞌen aj bꞌan nyaꞌtx galan bꞌix tzan tpaj kyaqil aj yol nyaꞌtx galan oxik kyqꞌumaꞌ tiꞌj tetz.” 16 Ntons kye aj xjalji cha kyyolinqet nyaꞌtx galan tiꞌj jun tidiꞌ qa galan qatzun nyaꞌtxji, cha kswanqet tpaj junky, cha nkyejoyon tzan kykꞌulun iktzaꞌ kyetzx kygan, cha kyyolinqet nim bꞌan galan kyiꞌjx, bꞌix nkyeyolin galan kyiꞌj xjal cha tzan kykꞌamon jun tidiꞌ galan te kyetz kyukyꞌiꞌl.
17 Per etetz waq erman aj bꞌan ganimix, instzaj enaꞌoꞌ te aj oxik kyqꞌumaꞌ kye tkyꞌixel te Qajaw Jesukrist etetz, 18 komo oxik kyqꞌumaꞌ etetz ikxjani: “Aj chꞌinky tponbꞌaj kyaqil twitz txꞌoꞌtxꞌ, kyeꞌul xjal aj xmayiyon-eꞌ, bꞌix okyekꞌuluyon tidiꞌchq aj nyaꞌtx galan iktzaꞌx kyetz kygan.”* 19 Aꞌeꞌ kyetz nkyekꞌulun tzan kyqet kypawaꞌ kyibꞌ kye qerman, cha nkyekꞌulun aj nꞌel kyganiꞌ te kchiꞌjel, bꞌix kyetz kꞌontiꞌl Txew Dios tuj kyanim.
Ntzani Titzaꞌ Tzan Qbꞌet Chaꞌoj Kyul Kye Aj Xmayiyon-eꞌ
20 Yatzun etetz waq erman aj ganimix, peꞌeten jwert tukyꞌi Qtata Dios aj jaꞌ witꞌlik ekꞌuꞌj, peꞌexnaqꞌtzan waq tukyꞌi Txew Dios, 21 kꞌon tzꞌaj naj tiꞌj etanim titzaꞌ te Qtata Dios nkxqet tganiꞌ, bꞌix peꞌetiyon tiꞌj te Qajaw Jesukrist tzan tpaj nꞌok loꞌet tkꞌuꞌj etiꞌj bꞌix oxeꞌl tsiꞌ jun etanqꞌin te jun-eleꞌx. 22 Intok loꞌet chꞌin ekꞌuꞌj kyiꞌj kye aj tzunx nnaꞌnon chꞌin kyanim, 23 bꞌix kyiꞌj kye txqꞌanky a tgan tzan kykolet etitzaꞌ tzan kꞌon kxik tuj te nim qꞌaqꞌ. Yatzun kyiꞌj kye txqꞌanky, intok loꞌet chꞌin ekꞌuꞌj kyiꞌj, per intok esiꞌ enabꞌl, intel etikꞌoꞌ te nyaꞌtx galan aj nkykꞌuluꞌ tzan kꞌon tel etin etetz ikxji.b 24 Ntons te Qtata Dios aj nkxqet tkꞌuluꞌ kwent, tetz bꞌaꞌn tzan tkꞌulun tzan kꞌon eqet tzꞌaqik, bꞌix tzan exik teqꞌiꞌ tzan epon twitz tetz aj jaꞌ atqet tukyꞌi nim xhchqitzꞌunal, bꞌix tzan epon tukyꞌiꞌl tukyꞌi nim chalajsbꞌil bꞌix saq etanim. 25 Aꞌox tetz te Qtata Dios aj koloyon qiꞌj tzan tpaj te Qajaw Jesukrist. Intqetxwit jiqꞌbꞌaꞌ, instenxwit tetz te twitzaleꞌ tiꞌj kyaqil, instenxwit tetz te kꞌulul mandad tiꞌj kyaqil, instenxwit tetz tajwalil mas nim twitz kyaqil. Ikxji atx aj minaꞌ tuq tbꞌantik te twitz txꞌoꞌtxꞌ, bꞌix instenxwit ikxji ajnaꞌl bꞌix tuj kyaqil tyemp te jun-eleꞌx. Ikxji kixiꞌ.