Te Aj Owok Jotoꞌ Tuj Twitz Te Waꞌnch
1
Aj Tok Jotoꞌ Jesus Tuj Twitz Waꞌnch
1 Bwen, te ja ntzani jun tpakbꞌalil aj oxik tyekꞌuꞌ te Qtata Dios te Jesukrist tiꞌj te aj okyꞌel naj, tzan txik tqꞌumaꞌ tetz kye aj qꞌapoꞌ kyibꞌ nkyeꞌaqꞌunan te tetz. Yatzunji tetz otzaj tlajoꞌ jun ángel tzan stzaj tqꞌumaꞌ te ntzani tukyꞌi Waꞌnch aj qꞌapoꞌ tibꞌ nꞌaqꞌunan te Qtata Dios. 2 Bꞌix yaji, te Waꞌnch oxik tqꞌumaꞌ tumeꞌl tiꞌj te tyol Qtata Dios bꞌix tiꞌj Jesukrist bꞌix kyaqil aj owok jotoꞌ tuj twitz. 3 Galanx-alo te aj njaw teꞌeꞌ te ja tyolbꞌen Qtata Diosni bꞌix galanx-alo kye aj nkyechaꞌon tiꞌj bꞌix nqet kyokslaꞌ te aj tzꞌibꞌankajni, komo chꞌinky tpon or [tzan tpon kyaqil ntzani].
4 Bwen, wetz aꞌin Waꞌnch nqet ntzꞌibꞌaꞌ te etetz aj wuqa bꞌuchꞌuj qerman aꞌix aj atikxqet tuj tkwentil Asy. Tzaj siꞌxwit jun nim bꞌan galan etajsik bꞌix qetxwit chewsaꞌ ekꞌuꞌj tzan Qtata Dios aj atqet kixiꞌ bꞌix aj atqet tuq tbꞌayaꞌ bꞌix tzul junkyꞌel,* tetz kyukyꞌi kye wuq txew aj akyeqet twitz twitꞌlel aj jaꞌ nkꞌulun mandad. 5 Bꞌix ax te Jesukrist ntzaj tsiꞌ ja tpakbꞌalilni te etetz, tetz aj kꞌontiꞌl nkaj tsiꞌ tzan tyolin bꞌanꞌax. A tetz te tbꞌay aj ojaw anqꞌin kxol kye kamnaq,* bꞌix mas nim tajwalil kywitz kye kywitzaleꞌ kꞌulul mandad tzani twitz txꞌoꞌtxꞌ.* Tetz nqoqet tganiꞌ nim bꞌix otkolpij aꞌoꞌ tiꞌj qchoj telen xhchikyꞌel [aj tkamik], 6 bꞌix otkꞌuluj tzan jkaj tuj tqꞌabꞌ bꞌix tzan qox twitz Qtata Dios naꞌol tetz,* aj Stat tetz. Intqetxwit jiqꞌbꞌaꞌ, bꞌix instenxwit tetz te kꞌulul mandad tiꞌj kyaqil te jun-eleꞌx. Intkyꞌikxwit ikxji. 7 Intok esiꞌ enabꞌl tiꞌj te ja ntzani: Tetz tzul tuj muj* bꞌix oxeꞌl eꞌeꞌ tzan kyaqil xjal bꞌix tzan kye aj eqet kansan tetz,* bꞌix kyaqil kyijajil xjal twitz txꞌoꞌtxꞌ okyeꞌoqꞌel bꞌix oxeꞌl kyanim tuj bꞌis.* Ikxji okyꞌel.
8 Te Qajaw oje tqꞌumaj ikxjani:* “Wetz aꞌin te tbꞌay bꞌix aꞌin te tmankbꞌil;b (aꞌin wetz nkyinꞌaqꞌsan kyaqil bꞌix aꞌin wetz nkyinmankunsan kyaqil;)c wetz akyinqet [ajnaꞌl] bꞌix akyinqet tuq tbꞌayaꞌ bꞌix kyinꞌul junkyꞌel [tzani twitz txꞌoꞌtxꞌ],* aꞌin wetz aj mas nim wajwalil twitz kyaqil.”
Aj Tjaw Kanet Jesukrist Tuj Twitz Te Waꞌnch Tuj Pátmos
9 Wetz aꞌin Waꞌnch, wetz aꞌin jun eterman bꞌix jun etukyꞌiꞌl tiꞌj te xhchoꞌnal aj nꞌok qen, bꞌix junchꞌin aqoqet tuj tqꞌabꞌ te Qajawil bꞌix junx qkyaqil nqoꞌipan tidiꞌchq tukyꞌi qpasens. Wetz akyinqet tuq Pátmos, aj txꞌoꞌtxꞌ tuj te nim aꞌ. Akyinqex tuq [pres] tzi tzan tpaj [npakbꞌen tiꞌj] te tyol Qtata Dios bꞌix te bꞌanꞌax tiꞌj te Jesus. 10 Wetz tuj jun qꞌij aj qꞌij tzan qnaꞌon Qajawil, oqet te Txew Dios wajsik bꞌix oxik nchaꞌoꞌ wiꞌajx jun xjal nqꞌolbꞌen tuq kongan iktzaꞌ twiꞌ jun trompet. 11 Ntyoliꞌ tuq ikxjani:d “Intqet atzꞌibꞌaꞌ tuj jun uꞌj kyaqil aj nxik awenni, bꞌix intxik asamaꞌ kye wuq bꞌuchꞌuj qerman: kye aj Efeso, bꞌix kye aj Esmirn, bꞌix kye aj Pérgamo, bꞌix kye aj Tyatir, bꞌix kye aj Sárdis, bꞌix kye aj Piladelpy, bꞌix kye aj Lawdisey.”
12 Ntons inꞌaj meltzꞌjik tzan txik wen abꞌl tuq te aj nyolin wukyꞌiꞌl. Bꞌix ya ma kyinꞌaj meltzꞌjik, oxik wen wuq tqatel kandel xtxꞌotxꞌal oro. 13 Bꞌix kxol kye aj wuq tqatel kandelni, oxik wen jun mer iktzaꞌ xjal.* Atok tuq tqꞌanaq xluj, nkyaqon tuq max txetoq, bꞌix atok tuq jun tkꞌalel nqet twitz.* 14 Te stzamal twiꞌ bꞌan txameꞌy bꞌan saq iktzaꞌ saqsbꞌaqon,* bꞌix kye tbꞌaqꞌ twitz [nkyetxaqtxon] naqe toq qꞌaqꞌ. 15 Kye toq iktzaꞌ kꞌuxbꞌil brons bꞌan nswoyeꞌ iktzaꞌ patemeꞌ, bꞌix titzaꞌ nyolin iktzaꞌ twiꞌ jun nim aꞌ tibꞌx nxojin.* 16 Tuj tbꞌanqꞌabꞌ akyeqet tuq wuq cheꞌw, bꞌix tuj stziꞌ nꞌetz tuq jun machit kansbꞌil* bꞌix kykabꞌil palaj at teꞌ, bꞌix tetz twitz iktzaꞌ qꞌij bꞌan xhqitzꞌun.
17 Ya ma xik wen, bꞌeyx inqet mejlet naj txeꞌ toq bꞌix wetz iktzaꞌ inkamik [tzan nxobꞌal]. Per tetz oqet tsiꞌ tbꞌanqꞌabꞌ wajsik, otzaj tqꞌumaꞌ wetz ikxjani: “Kꞌon txobꞌ. Wetz akyinqet tuq atx aj bꞌan tbꞌay oqtxiꞌ, bꞌix akyinqet te jun-eleꞌx,* 18 bꞌix itzꞌojin te jun-eleꞌx; jun-el inkamik per ajnaꞌl itzꞌojin te jun-eleꞌx. Wetz at wajwalil tiꞌj te kamikyj bꞌix tiꞌj aj jaꞌ akyeqet kyanim kye kamnaq.e 19 Intqet atzꞌibꞌaꞌ najji te aj ma tzꞌok awen, bꞌix tiꞌj te aj at, bꞌix tiꞌj te aj okyꞌel mas yaj oj tkyꞌik kyaqil ntzani. 20 Ntons te ntzani telponx te aj kꞌontiꞌl nꞌel anikyꞌ kyiꞌj kye wuq cheꞌw aj ma kyexik awen tuj nbꞌanqꞌabꞌ, bꞌix kyiꞌj kye wuq tqatel kandel pur xtxꞌotxꞌal oro: Kye wuq cheꞌw telponx kye ángel aj kye wuq bꞌuchꞌuj qerman tuj tkwentil Asy, bꞌix kye tqatel kandel telponx kye wuq bꞌuchꞌuj qerman txini.”