2
Jun Tpakbꞌalil Kye Qerman Aj Efeso
1 “Ntons, intqet atzꞌibꞌaꞌ ikxjani tukyꞌi te yolil nmandada aj atqet kxol kye qerman aj Efeso: “Wetz aꞌin aj akyeqet wuq cheꞌw tuj nbꞌanqꞌabꞌ bꞌix nkyinbꞌet kxol kye wuq tqatel kandel pur xtxꞌotxꞌal oro, bꞌix nxik nqꞌumaꞌ ikxjani:
2 Wetz webꞌen te aj etaqꞌumbꞌen bꞌix te aj nkxkꞌulun, bꞌix nkxꞌipan tukyꞌi nim epasens bꞌix kꞌontiꞌl nꞌetzoqpiꞌ exol etetz xjal nyaꞌtx galan, bꞌix maꞌtx qet ebꞌisuꞌ tbꞌayaꞌ kyiꞌj kye aj nkyqꞌumaꞌ qa kyetz aꞌeꞌ nkyꞌixel per nyaꞌtx, bꞌix maꞌtx tzꞌok eten cha laꞌj-eꞌ. 3 Maꞌtx etipaj twitz xhchoꞌnal tukyꞌi nim epasens bꞌix kyaqil nini tzan tpaj etokslbꞌen wiꞌj, bꞌix kꞌontiꞌl nkxsiktik [tzan etokslan wiꞌj].
4 Per at jun etil, ajnaꞌl kꞌontiꞌl nkyinqet eganiꞌ iktzaꞌ tuq tbꞌayaꞌ. 5 Astilji instzaj enaꞌoꞌ tuj etanim titzaꞌ nkxkꞌulun tuq tbꞌayaꞌ, bꞌix intjaw ekyꞌixpuꞌ enabꞌlin bꞌix intqet ekꞌuluꞌ iktzaꞌ tuq nqet ekꞌuluꞌ tbꞌayaꞌ. Qa nlay ntons kyinpon etiꞌj, bꞌix owelal win tuj tluwar te aj tqatel ekandel qa minaꞌ tuq tjaw ekyꞌixpuꞌ enabꞌlin.b
6 Per at jun galan aj nꞌekꞌuluꞌ: Etetz nꞌel etikꞌoꞌ te aj nqet kykꞌuluꞌ kye aj te bꞌuchꞌuj Nicolaítas, kye aj nkyeꞌel wikꞌoꞌ wetzky.
7 Ntons etetz aj atok exkyin, instzaj echaꞌoꞌ aj ntqꞌumaꞌ te Txew Dios te etetz aj nkxꞌokslan. Kye aj okyipaꞌtz bꞌix oqtel te nyaꞌtx galan kyitzaꞌ, oxeꞌl nsiꞌ tzan kyloꞌon twitz te tzeꞌ* aj ntzaj tsiꞌ qanqꞌin tuj kaꞌj aj jaꞌ atqet te Qtata Dios.”c
Jun Tpakbꞌalil Kye Qerman Aj Esmirn
8 Ntons, ax intqet atzꞌibꞌaꞌ ikxjani tukyꞌi te yolil nmandadd aj atqet kxol kye qerman aj Esmirn: “Wetz akyinqet tuq atx aj bꞌan tbꞌay oqtxiꞌ bꞌix akyinqet te jun-eleꞌx. Wetz inkamik bꞌix injaw anqꞌin junkyꞌel,* bꞌix nxik nqꞌumaꞌ ikxjani:
9 Wetz webꞌen kyaqil aj nyaꞌtx galan nkyꞌik etiꞌj, bꞌix kyaqil te emebꞌaꞌul (per etetz qꞌinon aꞌix [wukyꞌiꞌl]), bꞌix webꞌen tiꞌj kyaqil aj bꞌan nyaꞌtx galan nkyyoliꞌ kye aj nkyqꞌumaꞌ qa kyetz aꞌeꞌ aj tijajil Israel per nyaꞌtx bꞌanꞌax sinoke aꞌeꞌ aj ateꞌ tuj tqꞌabꞌ Satanas.
10 Kꞌon kxobꞌ tiꞌj te aj okyꞌel etiꞌj. Oxeꞌl nqꞌumaꞌ bꞌanꞌax, te Tajaw Choj chꞌinky kyqex tsiꞌ junjun te etetz tuj pres tzan eqet kꞌuluꞌ probar, bꞌix owokel eten twitz xhchoꞌnal lajuj qꞌij.e Kꞌon kaj esiꞌ tzan etokslan max oj ekamik, bꞌix wetz oxeꞌl nsiꞌ etanqꞌin te jun-eleꞌx iktzaꞌ jun ekanabꞌ.
11 Ntons etetz aj atok exkyin, instzaj echaꞌoꞌ aj ntqꞌumaꞌ te Txew Dios te etetz aj nkxꞌokslan. Kye aj okyipaꞌtz bꞌix oqtel te nyaꞌtx galan kyitzaꞌ, kyetz nlay tzꞌok kyen twitz te tkabꞌiꞌ kamikyj.”*
Jun Tpakbꞌalil Kye Qerman Aj Pérgamo
12 Ntons, ax intqet atzꞌibꞌaꞌ ikxjani tukyꞌi te yolil nmandadf aj atqet kxol kye qerman aj Pérgamo: “Wetz aꞌin te aj at te nmachit kansbꞌil, bꞌaꞌn xhjuꞌy bꞌix kykabꞌil palaj at teꞌ.* Bꞌix nxik nqꞌumaꞌ ikxjani:
13 Wetz webꞌen nkxnajan aj jaꞌ atqet twitꞌlel te Satanas aj jaꞌ nkꞌulun mandad, bꞌix webꞌen etetz kꞌontiꞌl nkxkyꞌixwik wiꞌj, kꞌontiꞌl nkaj esiꞌ tzan tok witꞌlet ekꞌuꞌj wiꞌj, ni aj tkamik te [qerman] Antipas exol, aj bꞌan kꞌontiꞌl tuq nkaj tsiꞌ tzan tyolin bꞌanꞌax wiꞌj, bꞌix yaji oqet kansaꞌ exol [tuj etamaqꞌ] aj jaꞌ nnajan te Tajaw Choj.
14 Per at junjun etil aj ngan tzan txik nqꞌumaꞌ tzan tpaj tzunx akyeqet exol kye aj eqꞌiꞌ kyitzaꞌ te txnaqꞌtzbꞌen Balam, aj oxik xnaqꞌtzaꞌ tzan te Balak tzan kyqet teqꞌiꞌ kye aj tijajil Israel, tzan txik kywan tuq te aj ojetq xik kyqꞌapoꞌ kye kyitzbꞌalil tidiꞌchq, bꞌix tzan kykꞌajajin.* 15 Bꞌix [junky tidiꞌ aj kꞌontiꞌl nqet tuj nwitz] ax tzunx nkyeqet ekꞌamoꞌ kye aj eqꞌiꞌ kyitzaꞌ te kxnaqꞌtzbꞌen kye aj te bꞌuchꞌuj Nicolaítas. 16 Intjaw ekyꞌixpuꞌ enabꞌlin najji; qa nlay, kyinꞌul luwew etiꞌj bꞌix okyinqꞌojiyon kyiꞌj junjun exol aj eqꞌiꞌ kyitzaꞌ te nini, okyinqꞌojiyon tukyꞌi nyol aj naqe jun nmachit kansbꞌil.*
17 Ntons etetz aj atok exkyin, instzaj echaꞌoꞌ aj ntqꞌumaꞌ te Txew Dios te etetz aj nkxꞌokslan. Kye aj okyipaꞌtz bꞌix oqtel te nyaꞌtx galan kyitzaꞌ, oxeꞌl nsiꞌ te wabꞌj mana aj kꞌuꞌuꞌ witzaꞌ.* Bꞌix oxeꞌl nsiꞌ te junjun kyetz jun chꞌi tal abꞌj saq bꞌix tiꞌj te abꞌj tzꞌibꞌan-ok jun tbꞌi akꞌaꞌj* aj kꞌontiꞌl abꞌl otzqilal tetz sinoke aꞌox te aj okꞌamoyon tetz.”
Jun Tpakbꞌalil Kye Qerman Aj Tyatir
18 Ntons, ax intqet atzꞌibꞌaꞌ ikxjani tukyꞌi te yolil nmandadg aj atqet kxol kye qerman aj Tyatir: “Wetz aꞌin te Tkꞌwaꞌal Qtata Dios, bꞌix wetz aj naqe qꞌaqꞌ kye tbꞌaqꞌ nwitzh bꞌix kye woq naqe kꞌuxbꞌil brons bꞌan nswoyeꞌ.i Bꞌix nxik nqꞌumaꞌ ikxjani:
19 Wetz webꞌen te aj nꞌekꞌuluꞌ bꞌix titzaꞌ nkyinqet eganiꞌ bꞌix titzaꞌ nkyeqet eganiꞌ kye txqꞌanky, bꞌix titzaꞌ nꞌok witꞌlet ekꞌuꞌj wiꞌj, bꞌix webꞌen titzaꞌ nkxꞌaqꞌunan tzan kyten jwert kye qerman exol, bꞌix nꞌetipaꞌ twitz xhchoꞌnal tukyꞌi nim epasens, bꞌix te etaqꞌun aj nqet ekꞌuluꞌ mas tbꞌanil twitz te aj oje qet ekꞌuluꞌ tbꞌayaꞌ.
20 Per ax at jun etil aj ngan tzan txik nqꞌumaꞌ: Nꞌetzoqpiꞌ tzan txnaqꞌtzan kye txqꞌanky te aj xuj Jesabel.* Tetz aj ntqꞌumaꞌ qa aji jun yolil tyol Dios, bꞌix tzan tpaj txnaqꞌtzbꞌen nkyeqet tzꞌaqik kye aj qꞌapoꞌ kyibꞌ nkyeꞌaqꞌunan te wetz, nkyekꞌajajin bꞌix nkyewaꞌan tidiꞌchq aj qꞌapomaj kye kyitzbꞌalil tiꞌchq. 21 Bꞌix oje xik nsiꞌ tyemp tetz tzan tjaw tkyꞌixpuꞌ tnabꞌlin, per kꞌon tgan tzan tkaj tsiꞌ tzan tkꞌajajin.
22 Ajnaꞌl wetz oqtel nxon tuj twatubꞌ, bꞌix yatzun kye aj nꞌok kyjunbꞌeꞌ kyibꞌj tukyꞌiꞌl, kyetz owokel kyen jun nim xhchoꞌnal qa nlay jaw kkyꞌixpuꞌ kynabꞌlin tiꞌj te aj ntkꞌuluꞌ te [Jesabel kyukyꞌiꞌl]. 23 Bꞌix kye aj nkyeꞌok lapet tiꞌj,k okyeqtel nkansaꞌ. Ikxji kyaqil kye aj nkyeꞌokslan wiꞌj owokel kchan, wetz nꞌel nnikyꞌ kyaqil te aj nkybꞌisuꞌ kye xjal tuj kywiꞌ bꞌix tuj kyanim, bꞌix oxeꞌl nsiꞌ te junjun iktzaꞌx kykꞌulbꞌen.*
24 Yatzun etetz aj atix tuj Tyatir, etetz aj kꞌontiꞌl eqꞌiꞌ etitzaꞌ te aj xnaqꞌtzbꞌilj nyaꞌtx tumeꞌl, etetz aj kꞌontiꞌl nkxkꞌamon te aj nim xnaqꞌtzbꞌilj tiꞌj te Satanas, oxeꞌl nqꞌumaꞌ etetz ya nlay xik nsiꞌ junky tidiꞌ tzan tqet ekꞌuluꞌ. 25 Per te aj eqꞌiꞌ etitzaꞌ ajnaꞌl, intxik etin max oj wul wetz. 26 Kye aj okyipaꞌtz bꞌix oqtel te nyaꞌtx galan kyitzaꞌ max chaꞌoj tpon te tmankbꞌil bꞌix oqtel kykꞌuluꞌ te aj nxik nkꞌuluꞌ mandad, wetz oxeꞌl nsiꞌ jun kyajwalil tzan kykꞌulun mandad kyajsik kyaqil amaqꞌl 27 tukyꞌi jun kytortol kꞌuxbꞌil [tzan kꞌon kykaj alkawet tiꞌj nijunwt] iktzaꞌ oj tqet bꞌuchiꞌ jun bas txꞌoꞌtxꞌ [tzan te tzꞌaqol].* Bꞌix [oxeꞌl nsiꞌ jun kyajwalil] iktzaꞌx te Ntat oje tzaj tsiꞌ wajwalil wetz, 28 bꞌix oxeꞌl nsiꞌ kyetz te cheꞌw aj njakul oj stzaj txekaꞌj.m
29 Ntons etetz aj atok exkyin, instzaj echaꞌoꞌ aj ntqꞌumaꞌ te Txew Dios te etetz aj nkxꞌokslan.”