3
Jun Tpakbꞌalil Kye Qerman Aj Sárdis
1 Ntons, ax intqet atzꞌibꞌaꞌ ikxjani tukyꞌi te yolil nmandada aj atqet kxol kye qerman aj Sárdis: “Wetz aꞌin te aj [nkyinkꞌulun mandad kyiꞌj kye] wuq txew* aj nkyeꞌaqꞌunan te Qtata Dios, bꞌix aꞌin wetz te aj eqꞌiꞌ wuq cheꞌw tuj nqꞌabꞌ.* Bꞌix nxik nqꞌumaꞌ ikxjani:
Wetz webꞌen te aj nqet ekꞌuluꞌ, etetz nkxꞌok qꞌumaꞌ itzꞌojix per wetz webꞌen etetz kamnaqix.b 2 Intetz etebꞌeꞌ ewitz bꞌix intok esiꞌ ekꞌuꞌj tzan tok mas bꞌan jwert exol te [aj galan] aj tzunx eqꞌiꞌ etitzaꞌ per chꞌinky tponaj tzan tpaj te aj nꞌekꞌuluꞌ kꞌontiꞌl nqet tuj twitz Ntat. 3 Instzaj enaꞌoꞌ aj oje xik xnaqꞌtzaꞌ etetz bꞌix oje tzꞌok echaꞌoꞌ. Intqet ekꞌuluꞌ ikxji bꞌix intjaw ekyꞌixpuꞌ enabꞌlin. Qa nlay tzꞌok esiꞌ enabꞌl tiꞌj te nini, kyinpon etiꞌj iktzaꞌ jun eleqꞌ, bꞌix kꞌontiꞌl etebꞌen janikꞌbꞌaꞌn kyinpon etiꞌj.*
4 Per tzunx ateꞌ junjun xjal exol etetz aj minaꞌ tox ksamoꞌ kyibꞌ tuj te nyaꞌtx galan. Kyetz okyebꞌetel wukyꞌiꞌl tukyꞌi kyqꞌanaq saqc tzan tpaj kyetz nkyajoꞌ. 5 Kye aj okyipaꞌtz bꞌix oqtel te nyaꞌtx galan kyitzaꞌ, okyebꞌetel wukyꞌiꞌl tukyꞌi kyqꞌanaq saq,* bꞌix nlay jatz win kybꞌi tuj te uꞌj aj nyolin abꞌleꞌ kye aj okyeꞌanqꞌiyon te jun-eleꞌx,* bꞌix oxeꞌl nqꞌumaꞌ galan kyiꞌj kyetz tukyꞌi te Ntat bꞌix kywitz kye ángel tuj kaꞌj.*
6 Ntons etetz aj atok exkyin, instzaj echaꞌoꞌ aj ntqꞌumaꞌ te Txew Dios te etetz aj nkxꞌokslan.”
Jun Tpakbꞌalil Kye Qerman Aj Piladelpy
7 Ntons, ax intqet atzꞌibꞌaꞌ ikxjani tukyꞌi te yolil nmandadd aj atqet kxol kye qerman aj Piladelpy: “Wetz aꞌin te aj bꞌan kꞌontiꞌl nchoj bꞌix [nxik nqꞌumaꞌ] te bꞌanꞌax. Wetz at wajwalil iktzaꞌ te Dawid aj nkꞌulun mandad tuq oqtxiꞌ.e Wetz bꞌaꞌn tzan njaqon jun lamel bꞌix kꞌontiꞌl abꞌl bꞌaꞌn tzan tlamon tetz, bꞌix bꞌaꞌn tzan nlamon tetz bꞌix kꞌontiꞌl abꞌl bꞌaꞌn tzan tjaqon tetz.* Bꞌix nxik nqꞌumaꞌ ikxjani:
8 Wetz webꞌen te aj nꞌekꞌuluꞌ, bꞌix maꞌtx qet nsiꞌ ajnaꞌl jun lamel cha jaqoꞌ bꞌix kꞌontiꞌl abꞌl bꞌaꞌn tzan tlamon tetz. Anke etetz nyaꞌtx jwert aꞌix, per maꞌtx qet etokslaꞌ nyol bꞌix kꞌontiꞌl oqet etewaꞌ qa etotzqimin. 9 Kye aj ateꞌ tuj tqꞌabꞌ Satanas, kye aj nkyqꞌumaꞌ kyetz tijajil Israel per nyaꞌtx, wetz ajnaꞌl oqtel nkꞌuluꞌ tzan kyqet mejlet ewitz* etetz, bꞌix onkꞌuluꞌtz tzan tok kyen etetz ganimix witzaꞌ. 10 Komo etetz maꞌtx qet etokslaꞌ tukyꞌi nim epasens te aj oxik nqꞌumaꞌ, wetz okxtel nkoloꞌ tiꞌj te aj nyaꞌtx galan aj tzul kyajsik kyaqil xjal twitz txꞌoꞌtxꞌ kꞌulul probar kyetz.* 11 Wetz kyinpon luwew; kꞌon kaj esiꞌ aj nꞌetokslaꞌ tzan kꞌon txik in te ekanabꞌ tzan junky. 12 Kye aj okyipaꞌtz bꞌix oqtel te nyaꞌtx galan kyitzaꞌ, wetz onkꞌuluꞌtz tzan kyok jwertf tuj te jay aj nabꞌil Qtata Dios. Kyetz akyeqet txini bꞌeyx te jun-eleꞌx, bꞌix oqtel ntzꞌibꞌaꞌ tbꞌi te Qtata Dios kyiꞌj kyetz [tzan kyok en aꞌeꞌ te tetz], bꞌix tbꞌi te amaqꞌ aj jaꞌ nkꞌulun mandad te Qtata Dios, te amaqꞌ aj nqetz tuj kaꞌj,* bꞌix te nbꞌi akꞌaꞌj ax oqtel ntzꞌibꞌaꞌ kyiꞌj.
13 Ntons etetz aj atok exkyin, instzaj echaꞌoꞌ aj ntqꞌumaꞌ te Txew Dios te etetz aj nkxꞌokslan.”
Jun Tpakbꞌalil Kye Qerman Aj Lawdisey
14 Ntons, ax intqet atzꞌibꞌaꞌ ikxjani tukyꞌi te yolil nmandadg aj atqet kxol kye qerman aj Lawdisey: “Wiꞌj wetz opoyonkix kyaqil aj tqꞌumbꞌen te Qtata Dios.h Wetz kꞌontiꞌl nkaj nsiꞌ tzan nyolin bꞌanꞌax, bꞌix wetz aꞌin akyinqet tuq tbꞌay twitz kyaqil tkꞌulbꞌen Qtata Dios.* Bꞌix nxik nqꞌumaꞌ ikxjani:
15 Wetz webꞌen te aj nꞌekꞌuluꞌ bꞌix kꞌontiꞌl nkyinꞌel etikꞌoꞌ. Per ax nyaꞌtx tukyꞌi jun tkꞌuꞌjlal nkxkꞌulun jun tidiꞌ te wetz; mejor-tal tzan wel etikꞌoꞌ qatzun tzan ekꞌulun galan te wetz tukyꞌi jun tkꞌuꞌjlalji.i 16 Per tzan tpaj etetz kꞌontiꞌl jun tumelil etukyꞌiꞌl, ni tukyꞌi jun tkꞌuꞌjlal ni kꞌontiꞌl nkyinꞌel etikꞌoꞌ, astilji okxꞌelax nxoꞌoꞌ tuj kyꞌis naqe xaꞌawj.j 17 Etetz nꞌeqꞌumaꞌ: ‘Qetz bꞌan qꞌinon aꞌoꞌ, oje qoꞌok bꞌan qꞌinon bꞌix kꞌontiꞌl tidiꞌ npaltin qetz.’ Per etetz kꞌontiꞌl nꞌel enikyꞌ, kꞌontiꞌl jun chewsbꞌil tuj etanim, bꞌekꞌbꞌajil ewitz, kꞌontiꞌl tidiꞌ etetz, moy aꞌix, bꞌix sqitlikix. 18 Wetz oxeꞌl nsiꞌ jun konsej etetz tzan eloqꞌon wukyꞌiꞌl jun oro aj txikomaj aj nꞌoken tzan etok bꞌanꞌax qꞌinon, bꞌix peꞌeloqꞌon wukyꞌiꞌl eqꞌanaq saq tzan kꞌon ekyꞌixwik tzan kꞌon etok en sqitlikix, bꞌix peꞌeloqꞌon wukyꞌiꞌl jun eremey te ewitz tzan ekaꞌyin. 19 Kkyaqil kye aj nkyeqet nganiꞌ, wetz nxik nyoliꞌ te kyetz te aj nyaꞌtx galan nkykꞌuluꞌ, bꞌix nkyexik nkawiꞌ.* [Astilji nxik nqꞌumaꞌ etetz], peꞌetokslan tukyꞌi jun ekꞌuꞌj bꞌix intjaw ekyꞌixpuꞌ titzaꞌ nkxbꞌet. 20 Intok esiꞌ enabꞌl, wetz nkyinqꞌolbꞌen etiꞌj; qa at abꞌl ma tzaj xhchaꞌoꞌ nwiꞌ bꞌix okyintkꞌamoꞌtz, okyinꞌokex tukyꞌiꞌl bꞌix qoꞌokelna qajyol qibꞌ.k 21 Kye aj okyipaꞌtz iktzaꞌx wetz owipaj, bꞌix oqtel te nyaꞌtx galan kyitzaꞌ, oxeꞌl nsiꞌ te kyetz tzan kywitꞌlet junchꞌin wukyꞌiꞌl tuj nwitꞌlel jaꞌ nkyinkꞌulun mandad, iktzaꞌx wetz oqet te nyaꞌtx galan witzaꞌ bꞌix maꞌtx kyinqet witꞌlet tukyꞌi ntat tuj twitꞌlel.
22 Ntons etetz aj atok exkyin, instzaj echaꞌoꞌ aj ntqꞌumaꞌ te Txew Dios te etetz aj nkxꞌokslan.””