4
Titzaꞌ Ntzaj Kynaꞌoꞌ Te Qajaw Tuj Kaꞌj
1 Ntons, ya ma kyꞌik kyaqil nini, oxik wen twitz kaꞌj jaqoꞌ tuq jun lamel, bꞌix oxik nchaꞌoꞌ junkyꞌel twiꞌ te xjal aj oxik nchan tbꞌay. Tetz twiꞌ iktzaꞌ trompet, nyolin tuq wukyꞌiꞌl, otzaj tqꞌumaꞌ wetz ikxjani: “Pajatz tzani, bꞌix wetz oxeꞌl nyekꞌuꞌ yatz te aj okyꞌel mas yaj.” 2 Bꞌeyxnajji oqet te Txew Dios wajsik bꞌix oxik wen tuj kaꞌj jun witꞌlelj te jun kꞌulul mandad, bꞌix tuj te witꞌlelj witꞌlik tuq jun xjal. 3 Kaꞌyin te aj witꞌlik tuq tuj te twitꞌlel [nspoqꞌeꞌ] iktzaꞌ abꞌj jasp bꞌix kornalin, bꞌix peꞌoniꞌ tuq tiꞌj te twitꞌlel tukyꞌi jun kyaqmaljabꞌ bꞌan ntxaqtxon tuq iktzaꞌ abꞌj esmeralt.* 4 Bꞌix akyeqet tuq tiꞌj te witꞌlelj sipaꞌ kyibꞌ kaj tuj kawnaq (24) witꞌlelj bꞌix oxik wen kyuj kye witꞌlelj kaj tuj kawnaq (24) tijxjal, atok tuq kyqꞌanaq saq bꞌix atjax kykoron pur xtxꞌotxꞌal oro. 5 Bꞌix tuj te witꞌlelj [ninkꞌajchaq] nꞌetz tuq xhlikyꞌlikaꞌj, bꞌix oxik nchaꞌoꞌ txini naqe kywiꞌ xjal tukyꞌi ray nkyetrenun tuq,* bꞌix twitz te witꞌlelj [ninkꞌajchaq] txaqomeꞌ wuq qꞌanalbꞌilj* aj telponx kyiꞌj kye wuq txew aj nkyeꞌaqꞌunan te Qtata Dios.* 6 Bꞌix twitzky te witꞌlelj, bꞌan chqꞌaj bꞌix nim twitz bꞌix xtxꞌotxꞌal iktzaꞌ bidrio qatzun xtxꞌotxꞌal kristalji.* Bꞌix sipaꞌ kyibꞌ tiꞌj te witꞌlelj akyeqet tuq kaj txkup [aj nxik kynaꞌoꞌ tuq te Qtata Dios] bꞌix ajun tbꞌaqꞌ kywitz kyiꞌjx kyaqil.* 7 Te tbꞌay txkup iktzaꞌ jun leon, bꞌix te tkabꞌiꞌ iktzaꞌ jun tor, bꞌix te toxiꞌ te twitz iktzaꞌ twitz jun xjal, bꞌix te tkajiꞌ iktzaꞌ jun yoqꞌon nlipan. 8 Bꞌix kye kykajil txkup at tuq waqaq kxikyꞌ,* bꞌix nojnaq kyiꞌj bꞌix kyujx ajun tbꞌaqꞌ kywitz.* Bꞌix bꞌajqꞌij bꞌix bꞌajaqꞌbꞌil kꞌontiꞌl tuq nkaj ksiꞌ tzan kyqꞌuman ikxjani: “Bꞌan chꞌinwt xhchoj, bꞌan chꞌinwt xhchoj, bꞌan chꞌinwt xhchoj te Qajaw Dios. Tetz mas nim tajwalil twitz kyaqil. Tetz atqet tuq bꞌix atqet ajnaꞌl bꞌix tzul junkyꞌel.”
9 Bꞌix oj txik kyqꞌumaꞌ kye txkup te Qtata Dios mas nim tajwalil twitz kyaqil, bꞌix oj tqet kyjiqꞌbꞌaꞌ bꞌix oj txik ksiꞌ pixon te tetz te aj witꞌlik tuj twitꞌlel bꞌix itzꞌoj te jun-eleꞌx, 10 yaji kye aj kaj tuj kawnaq (24) tijxjal nkyeqet mejlet twitz te aj witꞌlik tuj twitꞌlel bꞌix itzꞌoj te jun-eleꞌx, bꞌix nkyenaꞌon tetz bꞌix te kykoron aj telponx tiꞌj kyajwalil, nqet ksiꞌ twitz, bꞌix nxik tuq kyqꞌumaꞌ ikxjani: 11 “Qajaw, Qtata Dios aj nxhstzaj qnaꞌoꞌ, yatz at awoklen tiꞌj jun awajwalil bꞌan nim, bꞌix at awoklen tzan aqet jiqꞌbꞌaꞌ bꞌix tzan sten kyaqil tuj aqꞌabꞌ, tzan tpaj yatz oqet akꞌuluꞌ kyaqil aj at, tzan tpaj ikxji yatz agan tuq bꞌix ikxji oqet akꞌuluꞌ.”